Ndayano 28 - Libuka Lya Kuyela

Mfuywezi zaha kwombatala

¹ “Ndi mukwombatala Nyambi ya Ngula, Nyambi yenu, kami ndi mu kulama na kukonka mazu wendi nimwawo aya na kumipanika lelo, ukamitenda babanene shikuma kupitakana matunga amina nimwawo hano hanci.

² Ombatalenu mazu a Nyambi ya Ngula, Nyambi yenu, pe mfuywezi nimwazo eze zikenga zenu.

³ “Nyambi ya Ngula ukafuywela minzi yenu hamo na mafuba wenu.

⁴ “Nyambi ya Ngula ukamifuywela kwikala na bana babengi, hamo na byakulya byabingi na zingombe zazingi na bambelele.

⁵ “Nyambi ya Ngula ukafuywela mbuto yenu ya mpeka na byakulya mwatendangaho.

⁶ “Nyambi ya Ngula ukafuywela mu byuma nimwabyo mu kutenda.

⁷ “Nyambi ya Ngula ukakoma bamalamo benu oho ba kumilwisha. Bakamilwisha kufuminina ku mbalila yimo, ngoboni bakamitina na kwitukila ku zimbalila mutanu na zibili.

⁸ “Nyambi ya Ngula, Nyambi yenu ukafuywela milimo yenu na kwinzalisha bishete byenu na mbuto, kami ukamifuywela mu litunga liya akamipanika.

⁹ “Ndi mukwombatala Nyambi ya Ngula, Nyambi yenu na kukonkezeka mazu wendi nimwawo, ukaminga bantu bendi, ngonehe alibezele kukwenu.

¹⁰ Niho bantu nimwabo ba hano hanci bakamona ngayi munehaniwi na lizina lya Nyambi ya Ngula, kwinga bantu bendi, pe bakamitina.

¹¹ Nyambi ya Ngula ukamipanika bana babengi, hamo na bimuna babengi na byakulya byabingi mu litunga liya alibezele ku bankakazenu kumipanikalyo.

¹² Nyambi ya Ngula ukashinkulula liyilu ukalokesha mvula shikati sha mayinza, kami ukafuywela mulimo wenu nimwawo, ngayi matunga amengi akalambilile kukwenu, ngoboni enu kukalambilila ku matunga winge mukoka ngani mufwako.

¹³ Nyambi ya Ngula, Nyambi yenu, ukamitenda bakakutwaminina mukati ka matunga, kaliha bakakukonkangiza. Enu mukatumpuka shikati nimwasho, kukaboka ha nceto mufwako, ndi mukwombatala mazu wendi nimwawo aya na kumipanika lelo.

¹⁴ Ngoboni hinga mukalimbulula awa mazu mu nzila yinge yiti hinge yiti, hinge ndi kulemesha banyambi bashenge.”

Bikuto bimina kami ku bakakubula kwombatala

¹⁵ “Ngoboni ndi mu kulimbulula Nyambi ya Ngula, Nyambi yenu na kubula kulama ndayano zendi nimwazo na mazu aya na kumipanika lelo, pe bikuto ebye nimwabyo bikeza hahenu.

¹⁶ “Shikuto shikekale ha minzi yenu hamo na mafuba wenu.

¹⁷ “Shikuto shikekale ha mbuto yenu ya mpeka, hamo na byakulya mwatendangaho.

¹⁸ “Shikuto shikekale ha kumipana tuhu bana babashe na byakulya byabishe na zingombe zazishe na bambelele.

¹⁹ “Shikuto shikekala ha byuma nimwabyo mu kutenda.

²⁰ “Ndi mu kukana Nyambi ya Ngula, pe ukaleta hahenu makalikiza na lumpa na makando mu byuma nimwabyo mu kutenda, hantu munalobeshiwi nimwenu.

²¹ Nyambi ya Ngula ukatuma malweli a kulishiyashiya hahenu kutwala na ha kumimanisha kwakubula ku shala hinge umo mu litunga liya muli na kushinga kutambula.

²² Nyambi ya Ngula ukamikama na malweli akuliyambukila hamo na mazimbwazimbwa na mashikashika mu lutu. Ukatuma linanga na lyeya na ntukumina ya kulebula mbuto yenu. Awa makalikiza akekala hahenu kutwala ha kulobeshiwa.

²³ Kowa mvula ukaloka, kami limvu lyenu likayuma nkwaa.

²⁴ Nyambi ya Ngula ukatuma tukundukundu na nkuli mu mwanya wa mvula, kutwala ha kulobeshiwa kwenu.

²⁵ “Nyambi ya Ngula uketabilisha bamalamo benu ngayi bamikome. Mukabalwisha ku mbalila yimo, ngoboni mukatinina ku zimbalila mutanu na zibili, pe bantu nimwabo ba hanci bakabazumuniwa oho bakamona ebye bikamizilila.

²⁶ Oho mukafwa, batuyoni na batuyamana ba lishaka bakalya nyama ya mituntu yenu, kami kowa muntu umo wakubabingaho.

²⁷ Nyambi ya Ngula ukatuma manzunge hahenu ngonehe atendele ku baka Engepita. Ukamomona zinyutu zenu na bitombo. Mukakakuka na makwanya pe mukaliyuwa, ngoboni kowa wakuwapanga.

²⁸ Nyambi ya Ngula ukamibulisha ngana, kami ukamikama na wushishitwa na kumi luwanganisha.

²⁹ Mukapuputila mwaana wantendwa ngonehe kashishitwa, kami kutwesha kuwana nzila yenu mufwako. Kutumpuka mu byuma nimwabyo mukatenda mufwako. Mukenga bakuyandishiwa shikuma na kupukuliwa, kami kukabula muntu wakumiyavwa.

³⁰ “Mukahuhwa kankanga, ngoboni muntu washenge ukalala nendi. Mukatenda litala, ngoboni kwikalamo mufwako. Mukashanga mfuba ya shinyanca ngoboni kukalya mikabo yayo mufwako.

³¹ Zingombe zenu zikazihiwa himumona na meho wenu bene, ngoboni kukalyako ku nyama yazo mufwako. Bambongolo benu bakatwaliwa kwakutali hinga mwabapenza, kami kuka kubabwesha kukwenu bafwako. Bambelele benu bakapanikiwa ku bamalamo benu, pe kowa muntu ukamiyavwa.

³² Bana benu babalume na ba bambuyama bakapanikiwa kwinga bandungo ku mapukwenda hinga mwabatilamina. Mutena nimwawo mukalungumuna meho wenu a kulipokwesha kupenzelela bana benu ngayi baboke.

³³ Matunga a mapukwenda ukashimba byakulya nimwabyo biya munatengelele shikuma ha kubilima, mukafumaho mabokoboko, ndele kuyandishiwa shikuma na kwikalishiwa na shilala sha kubula kukatala.

³⁴ Makando wenu akamibulisha ngana.

³⁵ Nyambi ya Ngula ukamishushula na bitombo na manzunge bya kukola shikuma bya kubula kutwesheka kupangiwa, mazimbwazimbwa akamifwika ku mutwe kukuma naku mawulu.

³⁶ “Nyambi ya Ngula ukamitwala hamo na mwene yenu mu litunga lya mapukwenda, muya enu hinge bankakazenu hinga mwatanga kwikalamo. Kuyo niko mukalemeshela tunankishi twa kutendiwa ha bitondo na ha mamanya.

³⁷ Mukati ka matunga muya akamipanzanishila Nyambi ya Ngula, bantu bakalikomokela kunebye bikatendiwa hahenu. Bakamihenda na kumi hengamina.

³⁸ “Mukakuna mbuto yayingi, ngoboni mukateza tuhu twatushe, ndaba bamikumbi bakayilya.

³⁹ Mukakuna mafuba a shinyanca na kuwalama, ngoboni kukabuyisha mikabo yawo hinge ku nwako waine wayo mufwako, ndaba bambungu bakalya mikabo yako.

⁴⁰ Mitondo ya olive yikakula mu litunga lyenu kuti na kuti, ngoboni kukekala na mazi a olive bifwako, ndaba mikabo ya olive yikapulumukako.

⁴¹ Mukekala na bana babalume na ba bambuyama, ngoboni muka bayawa, ndaba bakatwaliwa kwakutali kwinga bantapwa.

⁴² Mitondo yenu nimwayo na mbuto bikaliwa ku mikumbi.

⁴³ “Mapukwenda aba bekala mu litunga lyenu bakatakalala shikumakuma, enu mukalyatililiwa.

⁴⁴ Nibo bakekala na mali akumipanika mikuli, ngoboni enu kukekala na mali aku bapana mukuli mufwako. Bakenga batulela kukwenu, enu mukenga bakakubakonkezeka.

⁴⁵ “Shikuto eshe nimwasho shikeza hahenu. Mukekala nasho kutwala ha kuloba kwenu, ndaba munabulu kulama ndayano ziya amipanikile Nyambi ya Ngula, Nyambi yenu na kubula kwombatala mazu wendi.

⁴⁶ Nisho shikenga shilimukisho na shikomokesho ku bazukulyenu mwaya myaka.

⁴⁷ “Nyambi ya Ngula wamifuywelele mu nzila nimwayo ngoboni kaliha mwawahililile na kutangala mu mitima.

⁴⁸ Nohobene, mukatendela milimo bamalamo baya akamitumina Nyambi ya Ngula mu kumilwisha. Mukekala na nzala na linyotwa na kwenda muhelengwa na kubula shuma nimwasho. Kami Nyambi ya Ngula ukamikalika na shilala kutwala noho mukalobeshiwa.

⁴⁹ Nyambi ya Ngula ukaleta kukwenu litunga lya kumi lwisha lya kwakumina kaye, litunga elye mwabula kulimuka lulimi lwalwo. Bakamihukula nehe ngonga.

⁵⁰ Bakenga banguma na kubula kuyuvwila nceshe muntu nimwendi, kanuke hinge mukulwane.

⁵¹ Nibo bakalya bimuna benu na mbuto yenu, kami mukafwa kukapande. Kukamishiyila mbuto ngani hinge mbuto ngani bafwako, hinge waine, hinge mazi a olive, hinge zingombe, hinge bambelele, pe mukafwa.

⁵² Bakalwisha minzi nimwayo mu litunga liya akumipanika Nyambi ya Ngula, Nyambi yenu, hamo na twimbi twatutali otu mwakulupilile tukawa.

⁵³ “Oho bamalamo benu bali na kukwipika minzi yenu, mukafwa ku nzala na kulya bana benu baya anamipaniki Nyambi ya Ngula, Nyambi yenu.

⁵⁴ Hinge shilolo wa wakulilimbwilisha wa mulume, ukalya mwanendi, ukabula kuyuvwila nceshe kawushinda wendi, hinge mukazendi ahaka na bana bendi ndaba byakulya wufwabyo.

⁵⁵ Pe kukapanikako mukonzo wendi wufwako, hinge mukazendi ou ahaka, hinge kuwamina waku bana bendi aba banashalaho a kulya.

⁵⁶ Hingebene shilolo wakulilimbwilisha wamukazi wakuheta shikuma, niye hinga atanga kulyata mawulu hanci, ukalya mwanendi wamukata, ukekala na nyinkalo yimo ya kubula kupana yiya nyama mukokwendi ahaka, hinge ku bana bendi babalume na babambuyama,

⁵⁷ bana bendi babakata ba kulibelekela kufuma ha lutu lwendi mwine hamo na shilalo, ukahanganika kubalila ku kampenci, ndaba ya kubula byakulya, oho bamalamo bakakwipika munzi wendi.”

Mazu akushuza

⁵⁸ “Ndi mufwako kwombatala na kulunga, ndayano nimwazo za Nyambi ziya zinatikitiwi mu libuka elye na kulemeeka lizina lya kukomokesha na kutinisha lya Nyambi ya Ngula, Nyambi yenu,

⁵⁹ pe ukaleta hahenu na ha bazukulyenu malweli a kubula kutwesha kupangiwa, hinge kukingiwa.

⁶⁰ Nyambi ya Ngula ukaleta kami hahenu malweli nimwawo akutinisha awa mwakolelenga mu Engepita, kami kukapola mufwako.

⁶¹ Ukatuma kami malweli nimwawo a mishoboshobo na malweli akuliyambwisha aya a kubula kutoyiwa mu libuka elye lya ndayano za Nyambi ya Ngula, kami mukalobeshiwa.

⁶² Hinge ndi mwavulakale ngonehe nyenye za mu mbimbayilu, babashe tuhu kukwenu bakashalaho, ndaba mwabulile kwombatala Nyambi ya Ngula, Nyambi yenu.

⁶³ Ngonehe shiya Nyambi ya Ngula awahililile ha kumitumpula na kumi hanyisha, nohobene nisho kami akawahilila ha kumilobesha. Mukafumishiwa ku litunga liya muli na kushinga kutambula.

⁶⁴ “Nyambi ya Ngula ukamipanzanishila mukati ka mikoka nimwayo, kubalika kunkumo yimo ya kaye kutwala kunkumo yamina, kami kuyo mukalemeesha banyambi ba kubaza ha bitondo na mamanya, banyambi baya mwabula kulimuka hinge bankakazenu.

⁶⁵ Mu matunga ayo kukawanamo ku mwena mufwako, kowa mwanya ukehaniwa wenuwenu, Nyambi ya Ngula ukamikalika na shikeku, mu kushinga ku yavwiwa ngoboni mukabula ku yavwiwa.

⁶⁶ Wumi wenu ukekala mu malamo shikati nimwasho. Mwaana na wushiku mukekala na mutentu, kami mukatwalililaho kwikala mu bowa wa lufu.

⁶⁷ Lumenemene mukamba ngayi, ‘Shinga shinengi shikati sha mazolo,’ kami mazolo mukamba ngayi, ‘Shinga lumenemene.’ Mitima yenu yikambwatuka na bowa ku byuma nimwabyo mukamona.

⁶⁸ Nyambi ya Ngula ukamibwesha ku Engepita mu mato amanene, hinge ndi wakulupishile ngayi kukamibwesha ku Engepita wufwako. Niko mukashinga kulilandisha enu bamwine kubamalamo benu kwinga bandungo babalume na bambuyama, ngoboni kowa muntu ukashinga kumi landa.”