Ndayano 27 - Libuka Lya Kuyela

Ndayano za Nyambi zatikitiwile ha mamanya

¹ Niho Moshesha, hamo na bakakutwaminina ba Ishalela, bambile ku bantu ngayi, “Ombatalenu lelo ndayano nimwazo ziya nili na kumilayelela.

² Ha mutena uya mukazabuka mushinzi wa Yondana na kwingina mu litunga liya akumipanika Nyambi ya Ngula, Nyambi yenu, mukemika mamanya amanene na kuwalambulula.

³ Pe utikiteho ou mulao na mazu nimwao a Nyambi, oho munengini mu litunga likukunkula wushi na mahwe, liya amikulupishile Nyambi ya Ngula, Nyambi wa bankakazenu.

⁴ Nohobene oho mukazabukila mu nciza ya Yondana, ami nili na kumi layelela nehe lelo, ngayi mukemike mamanya awa ha lipili lya Embalu, pe mukawalambulule.

⁵ Kuya niko mukatendela Nyambi ya Ngula kaala ka mamanya kakubula kuliyavwisha byondo.

⁶ Mukutendela Nyambi ya Ngula, Nyambi yenu kaala, ka kufwanina kwinga kakutendiwa ha mamanya a kubula kulembulula. Kuyo niko mukatupwila zinkombela za kuhokesha,

⁷ kami kuyo niko mukakombelela hamo na kulya zintupu zenu za kulilumikila na kwinga ba ku wahilila ku meho a Nyambi ya Ngula, Nyambi yenu.

⁸ Ha mamanya akulambulula tikitaho shiwahewahe mazu nimwawo a mulao wa Nyambi.”

⁹ Niho Moshesha hamo na bakankombela ba balevi bambile ku bantu nimwabo ba Ishalela ngayi, “Enu bantu ba Ishalela, mwenenu, yuvwililenu taha, mutena walelo mwafutukakale kwinga bantu ba Nyambi ya Ngula, Nyambi yenu.

¹⁰ Nohobene ombatalenu mazu a Nyambi ya Ngula na kulama ndayano zendi nimwazo ziya na kumipanika lelo.”

Bikuto ha bakubula kwombatala

¹¹ Niho Moshesha ambile ku bantu ba Ishalela ngayi,

¹² “Oho mwazabukakale Yondana, mishobo eye ya Shimiyoni na Levi na Yunda na Ishaka na Yoshefwa na Mbenjamani, niyo yikemana ha lipili lya Ngelizima kufuywela bantu.

¹³ Kami mishobo eye ya Lubena na Ngandi na Asha na Zembuloni na Ndani na Nafwitali, niyo yikemana ha lipili lya Embalu na kukutwiza.”

¹⁴ Balevi bakabilika mazu awa ku bantu ba Ishalela ngayi,

¹⁵ “‘Shikuto shikekala ha muntu nimwendi uya ukutenda kanankishi ka limanya hinge shondo na kukalemeshela kuwi, shinengi wunyengwe kuli Nyambi ya Ngula.’ Kami bantu nimwabo bakamba ngayi, ‘Ameni.’

¹⁶ “‘Shikuto shikekala ha muntu nimwendi wakuhandula tatiyendi hinge mandiyendi.’ Kami bantu nimwabo bakamba ngayi, ‘Ameni.’

¹⁷ “‘Shikuto shikekala ha muntu nimwendi uya ukuhenyesha shifunda sha nginza ya ndambo yendi.’ Kami bantu nimwabo bakamba ngayi, ‘Ameni.’

¹⁸ “‘Shikuto shikekala ha muntu nimwendi uya wakutwaminina kashishitwa mu nzila ya kupenzesha kwashenge.’ Kami bantu nimwabo bakamba ngayi, ‘Ameni.’

¹⁹ “‘Shikuto shikekala ha muntu nimwendi uya wukulyatilila mapukwenda, hinge banginga na bamfwile ku byuma byabo binabafwanini.’ Kami bantu nimwabo bakamba ngayi, ‘Ameni.’

²⁰ “‘Shikuto shikekala ha muntu nimwendi uya wakuhandula tatiyendi, ha kulangana na mukaza tatiyendi.’ Kami bantu nimwabo bakamba ngayi, ‘Ameni.’

²¹ “‘Shikuto shikekala ha muntu nimwendi uya wukulangana na kayamana kenge kayamana ngani.’ Kami bantu nimwabo bakamba ngayi, ‘Ameni.’

²² “‘Shikuto shikekala ha muntu nimwendi uya ukulangana na mpanzendi wa tatiyabo umo, hinge mpanzendi wakuwanamo.’ Kami bantu nimwabo bakamba ngayi, ‘Ameni.’

²³ “‘Shikuto shikekala ha muntu nimwendi uya ukulangana na mukowendi.’ Kami bantu nimwabo bakamba ngayi, ‘Ameni.’

²⁴ “‘Shikuto shikekala ha muntu nimwendi uya wakuziha minendi.’ Kami bantu nimwabo bakamba ngayi, ‘Ameni.’

²⁵ “‘Shikuto shikekala ha muntu nimwendi uya wakutambula mali ngayi akazihe muntu wakubula mulandu.’ Kami bantu nimwabo bakamba ngayi, ‘Ameni.’

²⁶ “‘Shikuto sha Nyambi shikekala ha muntu nimwendi uya wakubula kwombatala ndayano na ku longesha kwendi.’ Kami bantu nimwabo bakamba ngayi, ‘Ameni.’ ”