Ndayano 26 - Libuka Lya Kuyela

Ntupu yaha kuteza mbuto

¹ “Oho mwatambulakale litunga liya akumipanika Nyambi ya Ngula, Nyambi yenu kwinga likona lyenu na kuzikamo,

² muntu na muntu hakati kenu uku fwanina kushimba mu ntumba shitapilo sha kutatika sha mbuto nimwayo iya mu kuteza, pe mutwaleyo ku mwanya uya Nyambi ya Ngula akahata kuyaka lizina lyendi.

³ Yenunga kuli mukankombela uya unakwendesha ha shikati shiyo pe mwambe kukwendi ngayi, ‘Ami haya nikwitabila kuli Nyambi ya Ngula, Nyambi yobe, ngayi nengina kale mu litunga liya alibezele ku bankakazetu kutupanalyo.’

⁴ “Mukankombela ukashimba ntumba kukwenu kami ukayiyaka hambili ya kaala ka Nyambi ya Ngula, Nyambi yenu.

⁵ Niho mukamba ku meho a Nyambi ya Ngula, Nyambi yenu ngayi, ‘Nkaka wengile Kaalemiya wakuyambangila, nyambangizi wakubula munzi, ou watwalile ba lupashi lwendi ku Engepita mu kuzika. Bengile babashe oho bayileko, ngoboni bafutukile babengi, babanene na kwinga litunga lya ngovu shikuma.

⁶ Baengepita batwikalishile na shilala na kuyandisha na kutukandamika kwinga bandungo.

⁷ Niho twabilikizile Nyambi ya Ngula, Nyambi ya bankakazetu mu kutuyavwa. Watuyuvwile, kami wamonene makando na makalikiza wetu na kuyandishiwa kwetu.

⁸ Nyambi ya Ngula watulamwinine na ngovu zendi na nyala zazinene, mu maboko a baka Engepita. Watendele bilimukisho na bikomokesho, kami waholwele byuma bya kutinishiwa.

⁹ Watuletele kuno na kutupanika litunga likukunkula mahwe na wushi.

¹⁰ Monenu haya, ami nalete kuli Nyambi ya Ngula shitapilo sha kutatika sha lukahu lwa kuteza ampanine.’ “Niho tula ntumba hanci ku meho a Nyambi ya Ngula na kumulemesha.

¹¹ Wahilila ndaba ya byuma byabiwahe biya anakupaniki Nyambi ya Ngula, Nyambi yobe, obe na ba lupashi lwobe. Kami lifungilenu na Balevi na mapukwenda aba bekala mukati kenu.

¹² “Oho mwamanishakale kupanika sha wulikumi ku bya wulikumi bya mbuto yenu, mu mwaka wa wuhatu, kuli Balevi na mapukwenda na banginga na bamfwile, ngayi ku bantu na bantu bakekale na nimwabyo ebye bakushinga kulya. Oho mwatendakale eshe,

¹³ amba kuli Nyambi ya Ngula ngayi, ‘Kowa sha kuyela sha wulikumi shinashala mu litala lyami. Nashipaniki kuli Balevi na mapukwenda, ba banginga na bamfwile, ngonehe mwatulayile ngayi tutende. Kaliha nalimbwilile hinge kuvulama hinge mazu ngani hinge mazu ngani ku mazu wobe ha bya wulikumi.

¹⁴ Oho nalililenga, kaliha nalileho hinge shuma shimo hahasho. Oho nazilile kaliha natutwishile hinge shuma shimo hahasho mu litala lyami. Kami kaliha nashimbile shuma shamina kwinga nkombela yakubapashi. Nakwombatalile, Obe Nyambi ya Ngula, natendele byuma nimwabyo wandayile ha bya wulikumi.

¹⁵ Penza hanci kufuminina ku mwanya wobe wa kuyela muyilu na kufuywela bantu bobe ba Ishalela, pe fuywela kami litunga elye unatupaniki ngonehe walibezele kupana bankakazetu, litunga likukunkula mahwe na wushi.’

Bantu ba Nyambi ya Ngula

¹⁶ “Ukumilaya lelo Nyambi ya Ngula, Nyambi yenu ngayi mwombatale ndayano zendi nimwazo, nohobene ombatalenu mu kupwisha hamo na mitima yenu nimwayo.

¹⁷ Lelo munetabili Nyambi ya Ngula kwinga Nyambi yenu. Munakulupishi kumwombatala mazu wendi na kulama ndayano zendi nimwazo na kutenda nimwabyo biya akulaya.

¹⁸ Nyambi ya Ngula lelo unamitambulu kwinga bantu bendi anahete, ngonehe amikulupishile, kami ukumilaya kwombatala mazu wendi nimwawo.

¹⁹ Wakukangana ukamitenda babanene shikuma kupitakana mikoka yamina yiya alengele. Mukamuyemeza na kulemeeka lizina lyendi, kami mukenga bantu bendi ba kuyela kuli Nyambi ya Ngula Nyambi yenu, ngonehe ambile.”