Ndayano 25 - Libuka Lya Kuyela

¹ “Hamina Baishalela babili bakuya ku nkuta mu kuliyatisha, pe umo ha kuyatiwa ngayi mulandu wufwawo, pe wamina uli na mulandu,

² ndi muntu uli na mulandu unayatiwili kukamiwa, mukakuyata ukamutongweza ngayi afulumane hanci pe ha kuzipoliwa. Wingi wa zinyanzi zikezekela hamo na mulandu anatende.

³ Ngoboni kaliha na fwanini kukamiwa zinyanzi makumi anaa, ndaba za kupitakanisha ziku muyeneshesha ku bantu nimwabo.

⁴ “Hinga ufwika ku kanwa ka pulu oho uli na kuliyavwishaye ha kupula mpeka.

Sha kufwanina kutendela kawushinda wa wakufwa

⁵ “Ndi bantu babili mulwabo bekala hamo, pe umo kukwabo ha kufwa kwa kubula ku shiya mwana wa mulume, niho mfwile yendi hinga ayekiwa ku muntu wa livumo lyashenge, shinengi sha ku fwanina ngayi kawushinda wa mu ka kufwa amuyeke.

⁶ Mweli wa mulume uya bakabeleka ukehaniwa kwinga mwana uya mukakufwa, nohobene ngayi lizina lya uya mukakufwa hinga likaloba ngoboni likatwalilileho kwikala mu Ishalela.

⁷ Ngoboni ndi kawushinda wa uya mukakufwa kushinga kumuyeka wufwako, pe uya mbuyama aye ku lipangati kumbili ya bakakutwaminina ba munzi na kwamba kukwabo ngayi, ‘Kawushinda wa mukokwami kutenda sha kufwanina maluwo kukwami wufwako, unakana kupanika kawushinda wendi bazukulu mukati ka bantu ba Ishalela.’

⁸ Niho bakakutwaminina ba munzi ba kumwihana na kwamba nendi. Ndi niye ushili kukana na kwamba ngayi, ‘Nifwako kushinga kumuyeka,’

⁹ pe mfwile wa kawushinda wendi ukaya kukwendi, ku meho a bakakutwaminina munzi na kuvwula luncangwa lwa uya mulume na kufwizila ku lupala lwendi, pe hakwamba ngayi, ‘Eshe nisho shikuholoka kuli mulume ou ukukana kupanika bazukulu ku kawushinda wendi.’

¹⁰ Mu Ishalela lupashi lwendi lukatumbiwa ngayi ba lupashi lwa uya mulume wekalile na luncangwa lwa kokiwile ku liwulu lyendi.”

Ndayano zamina

¹¹ “Ndi balume babili bali na kulwa pe mukaza umo kukwabo ha kwezeka kulamwina mukokwendi ha kupapatila kukwata ku wulume wa mulume wamina,

¹² hinga amuyuvwila nceshe boha, aketule liboko lyendi.

¹³ “Hinga wikala na bifwanikizisho bibili bya kulishiya mu mpamba yobe, shimo shashilemu, shamina shashihehu.

¹⁴ Hinga wikala na bipimisho bibili bya kulishiya mu litala lyobe, shimo shashinene, shamina shashishe.

¹⁵ Liyavwishenu bifwanikizisho bya wulemu bya kupwisha na kulunga, ngayi mwanga mwikale shikati shashitali mu litunga liya akumipanika Nyambi ya Ngula, Nyambi yenu.

¹⁶ Nyambi ya Ngula, Nyambi yenu wazimba baka kukeyela na kubula kulunga.

¹⁷ “Anukenu ebye bamitendele Baamaleki aha mwafuminenga ku Engepita.

¹⁸ Kaliha bekalile na bowa wakutina Nyambi, niho bamilwishilile kufuminina kunyima oho mwakwangakale na kutampwa, pe bazihile nimwabo bakashala nyima aba balwilililenga kunyima.

¹⁹ Oho Nyambi ya Ngula, Nyambi yenu akamipanika litunga kwinga likona lyenu na kumi lamwina ku bamalamo benu nimwabo, aba bamizinguluka, monenu ngayi mukaziha Baamaleki nimwabo, ngayi mwanga kukabule muntu wakubanuka kami. Kami mufwako kukavulama.”