Ndayano 22 - Libuka Lya Kuyela

¹ “Ndi mu ku mona ngombe wa minobe Kaishalela hinge mbelele wendi unayongo, hinga umuleha ngayi aye, mubweshe kukwendi.

² Ngoboni ndi mwinewayo wekala kwakutali, hinge ndi kulimuka mwine wayo mufwako, mutwalenu ku munzi wenu. Oho mwine wayo akeza na kumushinga, mukamupanikeye.

³ Tendenu shuma shimo kami ndi mu kuwana mbongolo, hinge shintabwila sha likwiza, shinge shumangani hinge shumangani shiya anayongeshe minobe Kaishalela.

⁴ “Ndi mbongolo hinge ngombe wa minobe Kaishalela unawu hanci mu nzila, hinga mumuleha muyavwenu kumwimika kami.

⁵ “Bambuyama hinga bavwalanga bivwalo bya balume kami balume hinga bavwalanga bivwalo bya bambuyama. Bantu bakakutenda biheka ebye banengi bawunyengwe kuli Nyambi ya Ngula. Nyambi yenu.

⁶ “Ndi mu kuwana kayoni ha lihwa, ku mutondo hinge hanci, kanabutumanini ha mangi, hinge ndi ha bana bendi, hinga mushimba mandiyabo hamo na bana.

⁷ Mukutwesha kushimba bana bendi, ngoboni mandiyabo mulehenu aye, ngayi mwanga mwikale shiwahe na kuyoya shikati shashitali.

⁸ “Oho ukutenda litala lyalipya, zingwilisha mboma hayilu, kutina ukekala na mulandu ndi umo ukawaho na kufwa.

⁹ “Hinga mu kuna mfuba ya shinyanca na zimbuto zimina za mishobo yibili, ndi mukatenda noho, mukakanishiwa kuliyavwishabyo.

¹⁰ “Hinga mumanga nkunzi hamo na mbongolo ha kulima.

¹¹ “Hinga muvwala likwiza lya kulelema linatungiwi hamo na wutonge wa kushinta.

¹² “Tungenu minyumbwe ha zinkomi zinaa za bivwalo byenu.”

Kufundiziza kwa ha lwiholwiho

¹³ “Hamina mulume ukayeka kankanga na kulangana nendi ha wulili, pe ha kukumininako ha kumukana ngayi kumushinga wufwako.

¹⁴ Nohobene ha kumubangila bya mahalo na kumuyenesha ngayi, kaliha kankanga oho baliyekele,

¹⁵ ndi eshe shiku moneka, bahemi bakankanga bakashimba libalakata lya mukeza lyekalile ha likwiza lya shifupawenga liya liku monesha ngayi wenga kankanga na kulimonesha kubakakutwaminina munzi.

¹⁶ Tatiyendi kankanga ukamba ku kwabo ngayi napanikile mwanami kuli ou mulume ku maluwo, haya hano kumushinga wufwako.

¹⁷ Monenu, unamubangili bya mahalo na kwamba ngayi, ‘Kaliha wengile kankanga oho namuyekelenga.’ Ngoboni eshe nisho shimonekesho ngayi mwanami wenga kankanga. Niho bakavungulula liya likwiza kumbili ya bakulwane, na kwamba nayi penzenu ha libalakata lya mukeza lyekalile ha likwiza lya shifupawenga.

¹⁸ Niho bakakutwaminina munzi ba kushimba mukokwendi na kumushuza.

¹⁹ Bakamuyumbisha kami mwanda wa mali wa shiliva a muwayawaya na kupanika mali kuli tatiyendi kankanga, ndaba unalete lisheni hali kankanga wa Kaishalela, ukenga mukazendi, kami kutwesha kumukana shikati sha kuyoya kwendi wufwako.

²⁰ “Ngoboni ndi shambo shenga sha kupwisha, kami kowa sha kumonekesha ngayi ou kankanga wenga mushimbi,

²¹ niho bakamutwala ku menginino a litala lya tatiyendi, kuyo niko balume ba mu munzi bakamuzihila na mamanya, ndaba kankanga unatende shuma shalisheni mukati ka Baishalela ha kutenda wunjenge na mulume oho shilolo ayekiwe, kuwana ushili kwikala mu litala lya batatiyendi. Nohobene mu ku fwanina kufumisha ou wubi mukati kenu.

²² “Ndi mulume unakwatiwi hatenda wumambe na mukazi wakuyekiwa, wubili wabo ba ku fwanina kuzihiwa. Mu nzila yanehe mukafumisha wubi owe mu Ishalela.

²³ “Hamina mulume unakwatiwi mu munzi hatenda wunjenge na kankanga ou unahuhwiwi ku mulume wamina,

²⁴ muka batwala ha munkanda wa munzi pe muka bazihe na mamanya. Kankanga ukufwila ndaba ya kubula kubilikiza ngayi bamulamwine, oho ekalile mu munzi muya akutwesha kuyuvwanika. Kami mulume ukufwila ndaba natende wunjenge na kankanga ou ahuhwile minendi Kaishalela. Nohobene mu ku fwanina kufumisha ou wubi mukati kenu.

²⁵ “Hamina mulume nahangana kankanga wakuhuhwiwa ku mulume washenge kwakutali na munzi, pe ha kumukilukila na kutenda nendi wunjenge, kukazihiwe tuhu uya mulume.

²⁶ Kowa shuma shikutendiwa kuli kankanga, ndaba kaliha natende wubi waku fwanina kufwa. Shambo eshe shinengi shimo ngonehe muntu umo nalwishi muntu wamina pe ha kumuziha.

²⁷ Mulume wakilukilile kankanga kwakutali na munzi, hinge ndi wabilikizile ngayi bamulamwine, kwabulile muntu wakumulamwina.

²⁸ “Hamina mulume ukukilukila na kutenda wunjenge na kankanga ou wakubula kuhuhwiwa ku mulume.

²⁹ Uya mulume nakwatiwi ukuyumbila tata kankanga ndando ya mali makumi mutanu a muwayawaya wa shiliva, pe ukenga mukazendi, ndaba wamukandamikile kulala nendi. Niye kukamulubula wufwako mu shikati sha kuyoya kwendi.

³⁰ “Muntu hinga ahandula tatiyendi, ha kulangana na umo wabakaza tatiyendi.”