Ndayano 21 - Libuka Lya Kuyela

Byambo bya mponde byabulu kuyatiwa

¹ “Hamina ndi muntu wamina ukuwaniwa unazihiwili mu litunga liya akumipanika Nyambi ya Ngula, Nyambi yenu, ngoboni kulimuka ou unamuzihi mufwako,

² pe bakakutwaminina benu na bakakuyata bakaya na kufwanikiza mukala waku minzi ya hahepi na noku kwawaniwi mutuntu.

³ Niho bakakutwaminina bamu munzi wa hahepi oku kwawaniwi mutuntu bakahata namani wa shitole uya wabula kutenda mulimo.

⁴ Bakakatwala ku mbalila ya kwakwipi na kashinzi kaya kabulanga kuyuma, kami oku kwabula kulimiwa limvu lyako hinge kukuniwa, pe niko bakakapokwela mukoshi wako.

⁵ Bakankombela ba balevi kami bakayako, ndaba Nyambi ya Ngula, Nyambi yenu, unabahata kumutendela milimo na kutontolola mfuywezi mu lizina lyendi na kuyata byambo nimwabyo bya nkani na bya kuleta mushunga.

⁶ Niho bakakutwaminina nimwabo ba ku munzi wa kwakwipi na mwanya kuya kwa waniwa uya muntu wa mponde, bakayowelela ha namani wa shitole ku maboko wabo,

⁷ pe bakapaka ngayi, ‘Kuziha ou muntu tufwako, kami kulimuka ou wunamuzihi tufwako.

⁸ Obe Nyambi ya Ngula, yatila bantu bobe Baishalela, aba walamwinine mu Engepita. Tuyatile kami hinga utukwata kukundama ku mponde ya muntu wakubula mulandu.

⁹ Nohobene, ha kutenda ebye akushinga Nyambi ya Ngula, ukafumisha mulandu wa lufu lwa mponde hakatiketu.’

Bya bambuyama ba bantapwa ba ku nzita

¹⁰ “Oho mukaya ku nzita mu kulwisha bakankole benu, Nyambi ya Ngula, Nyambi yenu, ukamipanikabo mu maboko wenu na kubatwala mu wuntapwa,

¹¹ ndi ukamona mbuyama wamuwahe mukati kabo uya unawahilili na kushinga kumuyeka ngayi enge mukazobe,

¹² mutwale ku litala lyobe, pe akashehe huki zendi na ku shenda manyala akuminwe yendi.

¹³ Kami avwale bivwalo byashenge. Ukekala ngonda mu litala lyobe, niye ukalila bahemi bendi ngonda ya nzimba, nihoboni ukatweshe kumuyeka kwinga mukazobe.

¹⁴ Haya, ndi wabulu kumu wahilila, umulehe aliyile oku akushinga. Ndaba wamukandamikile kwinga mukazobe, hinga umufutula kwinga ndungo, hinge kumulandisha.”

Bya likona lya mwana wamweli wa mulume

¹⁵ “Hamina muntu uli na bakazi babili, uku haka umo na kuzimba wamina, kami nimwabo banamubelekele bana babalume, ngoboni mweli wendi wa mulume wenga mwana uya mbuyama azimba,

¹⁶ ndi uya mulume una hanganiki mwakutapila wuheti wendi ku bana bendi, hinga amonesha katapulula, kupanika byuma bya mwanendi wa mweli kuli uya mwana mbuyama ahaka.

¹⁷ Apanike kabili shitapilo sha wuheti wendi kuli mweli wendi wa mulume, hinge ngayi kaliha wahemuwa ku mbuyama ahaka, niye nengi kututwisha kwa muntanzi kwa ngovu zendi, uku fwanina kutambula biya binafwanini mwana wa mweli.”

Bya mwana wa mulume wakuzikwa

¹⁸ “Ndi muntu uli na mwana wa mulume wa mutima wawukalu na nkani, mwana wakubula kwombatala bahemi bendi, hinge ndi ba kumushushula.

¹⁹ Bahemi bendi bakamutwala kumbili ya bakakutwaminina ba munzi kuya bekala, pe niko bakamuyatishila.

²⁰ Pe hibakwamba kubakakutwaminina ngayi, ‘Mwanetu wa mulume wamukalu na nkani kami ukukana kutwombatala. Nengi muka kukolwa na Kubipisha mali.’

²¹ Niho balume ba mu munzi bakamuziha na mamanya, nohobene mu ku fwanina kufumisha ou wubi mukati kenu. Bantu nimwabo mu Ishalela bakayuvwa eshe shinatendiwi pe bakekala na bowa.”

Ndayano za kulishiyashiya

²² “Ndi muntu unawana mulandu, pe bakamushukika ha mutondo ngayi afwe,

²³ mutuntu hinga wikalaho wushiku nimwawo. Uku fwanina kufundiwa wowo mutena, ndaba mutuntu wa mufu ukukolekiwa ha mutondo unengi shikuto kuli Nyambi. Fundenu mutuntu ngayi mubule Kubipisha litunga liya akumipanika Nyambi ya Ngula, Nyambi yenu kwinga likona lyenu.”