Ndayano 20 - Libuka Lya Kuyela

Bya ha nzita

¹ “Oho mu kuya mu kulwisha bamalamo benu, ndi mukamona bambishi na makoloyi na bakanzita ba kupitakana bakanzita benu, hinga mubatina, ndaba Nyambi ya Ngula, Nyambi yenu, uya wamilamwinine mu Engepita, ukekala hamo nanenu.

² Oho shilolo mutatike kulwa, mukankombela ukeza hambili na kwamba ku bakanzita ngayi,

³ ‘Yuvwililenu, enu balume ba Ishalela, lelo muli na kuya mu kulwisha bamalamo benu, hinga mukatina hinge kupopa, hinge kwikala mu kampwe, hinge na shikeku.

⁴ Nyambi ya Ngula, Nyambi yenu, uli na kuya hamo nanenu na kumi lwila ku bamalamo benu, kami ukamitweshesha.’

⁵ “Niho babilolo bakamba ku bantu ngayi, ‘Kati kuli muntu unatende litala kwakubula kufungulalyo ndi? Ndi kwali, pe aboke ku litala lyendi, ndelewa, hamina ukazihiwa kunzita, pe muntu wamina ukakundikalyo.

⁶ Kati kuli muntu unakunu mfuba ya shinyanca, kami nabulu kuwana shikati sha kuteza mikabo yayo ndi? Ndi kwali, pe aboke ku litala lyendi, ndelewa, hamina ukazihiwa kunzita, pe muntu wamina ukalikuwa iya mikabo.

⁷ Kati kuli muntu unahuhwu mukazi ngayi mwanga ayeke ndi? Ndi kwali, pe aboke ku litala lyendi, ndelewa, hamina ukazihiwa kunzita, pe muntu wamina ukayeka uya mukazi.’

⁸ “Babilolo bakamba kami ku balume ngayi, ‘Kati kuli muntu unahopoko mu mutima, kami uli na bowa ndi? Ndi kwali, pe aboke ku litala lyendi, ndelewa, hamina ukapopesha baminendi mu mitima.’

⁹ Oho babilolo bamanishile kwamba ku bakanzita, bakakutwaminina bakahatiwa ku litanga na litanga.

¹⁰ “Oho mu kuya mu kulwisha munzi, ha kutatika panenu shimonekesho sha ku mwena kukwabo.

¹¹ Ndi banetabili kulishisha, pe nimwabo bakafutuka kwinga bandungo benu, kami bakatendanga milimo ya kukandikiziwa kukwenu.

¹² Ngoboni ndi bantu ba uya munzi bakubula kulishisha na kulihatila kulwa, pe zingulukenuwo na bakanzita benu.

¹³ Oho Nyambi ya Ngula, Nyambi yenu, akamitabila kutambula uya munzi, pe mukazihe balume nimwabo balimo.

¹⁴ Hinge noho mukatwesha kulipukwila bakazi na bana na bimuna na byuma nimwabyo kami bili mu munzi. Mukutwesha kuliyavwa na byuma nimwabyo biya binengi bya bamalamo benu ndaba Nyambi ya Ngula unamipanikibyo.

¹⁵ Shiyo nisho mukatenda na minzi yiya yili kwakutali na litunga liya mukazika.

¹⁶ “Ngoboni oho mukatambula minzi mu litunga liya akumipana Nyambi ya Ngula, Nyambi yenu, kwinga likona lyenu, mukazihe bantu nimwabo.

¹⁷ Lobeshenu bantu nimwabo, Bahita na Baamoli na Bakenaani na Bapelizi na Bahivi na Bayembushi, ngonehe amilayile Nyambi ya Ngula.

¹⁸ Bazihenu ngayi babule kumitendesha wubi ku meho a Nyambi ya Ngula na kumi longesha kutenda byuma nimwabyo bya wunyengwe biya ba kutenda mu kulemesha banyambi babo.

¹⁹ “Oho muli na kuya na kutambula munzi, hinga mutema mitondo yawo ya mikabo, hinge noho lwanda lukekala shikati sha shitali. Lyenuko mikabo, ngoboni hinga mutema mitondo, ndaba kaliha yinengi bamalamo benu.

²⁰ Mukutwesha kutema mitondo yamina na kuliyavwa nabyo kutenda zindalo za kukandama ha kembi kutwala ha kukoma uya munzi.”