Ndayano 2 - Libuka Lya Kuyela

Kuyambangila mu libelelengwa

¹ Pe twabokelemo, niho twayile mukati ka libelelengwa, mu nzila ya kuya ku Liwate lya Kufubila, ngonehe andayile Nyambi ya Ngula, pe twamanishile shikati shashitali na kuyambangila mu lipili lya Sheya.

² Niho Nyambi ya Ngula ambile kukwami ngayi,

³ “Mwamanishakale shikati shashitali na kuyambangila mu binkanda obyo, haya yenunga ku ncelele.”

⁴ Wantongwezele ngayi nifundizizize bantu ngayi, “Enu wuluno muye mu kupita mukati ka litunga lya Sheya, liya lyengile litunga lya bawushindawenu bamu mavumo, bazukulya Ishau. Nibo bakamitina, ngoboni hinga muka balwisha,

⁵ ndaba kukamipana shuma shimo ku litunga lyabo nifwako, hinge shiketu ku litunga lyabo. Napaniki shiketu sha litunga lya binkanda lya Sheya ku bazukulya Ishau.

⁶ Mwanga mukalande tuhu byakulya na mema kukwabo.”

⁷ “Anukenu ngayi Nyambi ya Ngula, Nyambi yenu, unamitandalishi mu byuma nimwabyo biya mwatendanga. Unamilamanga aha munayambangilinga mu libelelengwa elye lyalinene. Unekalanga nenu hamo, ha myaka eye makumi anaa, kami kowa ebye mwakalikizanga mu byuma nimwabyo.

⁸ “Nohobene twayile, niho twapitile mu litunga lya bawushinda wetu bana ba Ishau, aba bekala ku Sheya. Twafumine ku Alamba mu nzila iya ya kufuma ku minzi ya Elati na Eziyoni Ngemba, kukakuma naku Liwate lya Mushele, pe lyapenzeshele ku libelelengwa kulwa ncelele ya mushamuko kulumba ku Mowambi.

⁹ “Niho Nyambi ya Ngula ambile kukwami ngayi, ‘Hinga muyandisha bantu ba ku Mowambi, bazukulya Lote, hinge kubalika nzita ya kubalwisha. Nabapaniki litunga lya Ali, kami kukamipanika hinge shuma shimo ku litunga lyabo nifwako.’”

¹⁰ (Ou mukoka wa ngovu wa bantu babanene na wutali ukutumbiwa ngayi Baemima bazikilenga mwaka mu munzi wa Ali. Bengile babatali ngonehe Baanakimu, mukoka wamina wa malengwalengwa.

¹¹ Ngonehe Baanakimu, balimukiwile kami ngayi Balefwayima, ngoboni Bamowambi babatumbile ngayi Baemima.

¹² Baholite bazikilenga mwaka ku Sheya, ngoboni bazukulya Ishau babatandilemo na kulobesha mukoka wabo, pe bazikilemo nibo bene, ngonehe Baishalela hano batandakale bamalamo babo ku litunga liya abapanine Nyambi ya Ngula.)

¹³ “Niho twazabukile mushinzi wa Zelendi ngonehe atutongwezele Nyambi ya Ngula.

¹⁴ Yengile myaka makumi ahatu na mutanu na yihatu kufuma ha shikati shiyo twafumine ku Kandeshi Mbaneya kukuma ku shikati twa zabukile Zelendi. Bantu nimwabo bakakulwa ba mukoka uyo bafwile, ngonehe ambile Nyambi ya Ngula ngayi bakafwa.

¹⁵ Liboko lya Nyambi ya Ngula lya balwishile kutwala noho lya balobeshele nimwabo.

¹⁶ “Oho balume bakanzita bamanine kufwa nimwabo,

¹⁷ Nyambi ya Ngula wambile kukwami ngayi,

¹⁸ ‘Lelo muli na kupita mu litunga lya Mowambi na nzila ya Ali.

¹⁹ Oho mukaya mu litunga lya Baamoni, bazukulya Lote. Hinga mubayandisha hinge kutatika nzita ya kubalwisha, kami kumipanika shuma shimo ku litunga liyo nabapanine nifwako.’”

²⁰ (Litunga elye, lyalimukiwile kami ngayi litunga lya Balefwayima, lizina lya bantu aba bazikilengamo mwaka, Baamoni babatumbile ngayi Bazamuzumi.

²¹ Bengile babatali ngonehe Baanakimu, kami bengile babengi. Wengile mukoka wangovu, ngoboni Nyambi ya Ngula wabalobeshele, nohobene ngayi Baamoni mwanga batambule litunga lyabo na kuzikamo.

²² Nyambi ya Ngula watendele shuma shimo kami ha Baendoma bazukulya Ishau, baya bekalilenga mu litunga lya Sheya. Walobeshele Baholite, ngayi Baendoma mwanga batambule litunga lyabo na kuzikamo, omu bashili kuzika na lelo.

²³ Nehi Bavivimu bekalile ha Litunga lyaha shibumbo mwaka kwekalile bantu bakufuma ku shikuli sha Kileta. Balobeshele Bakafwitola aba bazikilemo ha kutatika, batambwile litunga lyabo nimwalyo kukakuma naku mabukubuku a munzi wa Ngaza.)

²⁴ “Katukenu muye mukala muzabuke mushinzi wa Anoni. Monenu nayaka Shihoni wa Kaamoli mu maboko wenu, mwene waku Heshimboni, hamo na litunga lyendi. Mukatukilenu mutakwe, pe mutatike kutambula litunga lyendi.

²⁵ Ku balika mutena walelo nikaletesha bantu kuti na kuti ngayi bamitine. Bantu nimwabo bakakanka na bowa ha kutoya lizina lyenu.”

Ishalela ukukoma mwene Shihoni

²⁶ “Niho natumine miluwe kuli mwene Shihoni waku Heshimboni, oho tushili mu libelelengwa lya Kendemoti na mazu akubengezeka mu ku mwena, ngayi,

²⁷ ‘Ndehe nipite mu litunga lyobe. Nikuya tuhu hinga nalulumana mu mukwakwa wawunene na kubula ku shanuka ku shilyo hinge ku shimoho.

²⁸ Mukandandisha byakulya na mali, biya nikalya na kumpana mema akunwa akulanda na mali. Shuma tuhu nikushinga kutenda shinengi kupita mu litunga lyobe,

²⁹ ngonehe bana ba Ishau bekala mu Sheya na Bamowambi, baya bekala mu Ali, batendele kukwami. Kutwala na ha kuzabuka mushinzi wa Yondana kuya ku litunga liya anatupaniki Nyambi ya Ngula, Nyambi yetu.’

³⁰ “Ngoboni mwene Shihoni mwene waku Heshimboni kaliha watwitabilile kupita mu litunga lyendi. Nyambi ya Ngula, Nyambi yenu, wamukaluhishile mutima kumwingisha nkani, ngayi tutweshe kumukoma na kutambula litunga lyendi, elye tushili kuzika nalelo.

³¹ “Niho Nyambi ya Ngula ambile kukwami ngayi, ‘Monenu, ninapaniki mwene Shihoni na litunga lyendi mu maboko wenu ngayi mutambule litunga lyendi na kuzikamo.’

³² Niho Shihoni ezile na bantu bendi nimwabo mu kutulwisha ku munzi wa Yahazi,

³³ ngoboni Nyambi ya Ngula, Nyambi yetu wamupanikile mu Maboko wetu, niho twamuzihile hamo na bana bendi babalume na bantu bendi nimwabo.

³⁴ Ha shikati shiyo twalobeshele minzi nimwayo na kuziha bantu nimwabo, balume na bakazi na batwanuke. Kaliha twashiyilemo hinge umo wamumi.

³⁵ Twashimbile zingombe na kupukula minzi.

³⁶ Nyambi ya Ngula, Nyambi yetu, watwitabilishile kupukula minzi nimwayo yaku Aloya kunkumo ya mukulo wa Anoni na munzi uli mukati ka uya mukulo, kukakuma naku Ngiliyande. Kowa munzi wekalile na kembi kakatali shikuma twakwangile.

³⁷ Ngoboni kaliha twayile kwakwipi na litunga lya Baamoni hinge ku bibumbo bya mushinzi wa Yamboki, hinge ku minzi ya litunga lya binkanda, hinge ku mbalila yamina oku Nyambi ya Ngula, Nyambi yetu atukanishile ngayi hinga tuyako.”