Ndayano 19 - Libuka Lya Kuyela

Minzi ya kwitukila

¹ “Oho Nyambi ya Ngula, Nyambi yenu, walobeshakale bantu aba bamwine litunga elye akumipanika, oho mwatambulakale minzi yabo na matala na kwikalililamo,

² pe hatenuho minzi yihatu mu litunga liya anamipaniki Nyambi ya Ngula.

³ Mukawahishe mikwakwa na kutapila oyo minzi mu litunga mu zimbalila zihatu liya anamipaniki Nyambi ya Ngula, ngayi muntu wakuziha minendi, mwanga atweshe kwitukilamo mu kulamiwa.

⁴ Ndi muntu nazihi minendi na mapuza ou wabula kwinga kamalamo wendi, ukutwesha kwitukila ku umo wa minzi eye pe ukapuluka.

⁵ Ngonehe balume babili oho bakuya hamo mu lishaka na kutema bitondo, pe oho umo hahabo uli na kutema shitondo pe kazembe hikakushokoka mu mupini na kuziha minendi, niye ukutwesha kwitukila ku umo wa minzi eye yihatu pe ukapuluka.

⁶ Ndi kukwikala munzi umo tuhu, mukala ukwinga wawutali shikuma, pe muntu ukushinga kubweshela wubi ku wubi, ukutwesha kumukwata, ndaba ya wukali wendi ukuziha muntu wakubula mulandu ha kuwana ngayi, waziha minendi na mapuza ou wakubula kwinga mukankole wendi.

⁷ Eshe nisho shuma namilayili ngayi mubengule minzi yihatu.

⁸ “Oho Nyambi ya Ngula, Nyambi yenu, akanenehesha litunga lyenu ngonehe a kulupishile bankakazenu ngayi ukabapanalyo, pe ukamipanika litunga nimwalyo elye anakulupishi,

⁹ ndaba munalama awa mazu nimwawo shiwahe, awa namilaya lelo, aku haka Nyambi ya Ngula, Nyambi yenu na kwenda mu zinzila, pe hatenu kami minzi yimina yihatu.

¹⁰ Tendenu eshe pe bakakuziha baminabo na mapuza bakabule kuzihiwa, ngayi enu kami mukabule mulandu wakubazihila mu litunga liya akamipanika Nyambi ya Ngula kwinga likona lyenu.

¹¹ “Ngoboni ndi muntu ukuzimba ndambo yendi na kumubelamina, pe ha kumulwisha na kumuziha, pe ha kutinina ku umo wa minzi eye mu kuholama,

¹² mu shambo eshe, bakakutwaminina bamu munzi wendi bakamutumina na kumupana ku liboko lya muntu uli na ngovu za kubweshela wubi ku wubi ngayi mwanga azihiwe.

¹³ Hinga mumuyuvwila nceshe. Fumishenu ou mukakuziha minendi na mutima wakufunga mu Ishalela, ngayi nimwabyo byende shiwahe kukwenu.

Zinginza za kushikale

¹⁴ “Hinga ukahenyesha shifunda sha nginza ya ndambo yobe, shiya shatabuliwile kushikale, mu litunga liya akamipanika Nyambi ya Ngula, Nyambi yenu kwinga likona lyenu.

Bya wupaki

¹⁵ “Wupaki wa muntu umo wufwako ku twesha ku wanisha minendi mulandu, ndele bapaki babili hinge bahatu shambo nimwasho shishumishiwe.

¹⁶ Ndi muntu umo ukwezeka kutwika minendi shambo sha mahalo sha kumubangila,

¹⁷ nimwabo bakaya na kwimana ku meho a Nyambi ya Ngula na kuyatiwa ku bakankombela na bakakuyata aba banapanikiwi ngovu ha shikati shiya.

¹⁸ Bakakuyata bakayipwiziza shambo shiwahe, ndi muntu unamba mahalo akubangila kawushinda wendi,

¹⁹ pe ukatambula kashushwilo kaya afwanina kutambula uya minendi anabangili. Nohobene mu ku fwanina kufumisha ou wubi mukatikenu.

²⁰ Oho bantu nimwabo bakayuvwa ebye binatendiwi, bakekala na bowa, pe kowa muntu kami ukatenda wubi wa nahiyo.

²¹ Hinga mwikala na nceshe ha byambo bya nehe. Kashushwilo kenge ka wumi ku wumi na liho ku liho na liyewe ku liyewe na liboko ku liboko na liwulu ku liwulu.