Ndayano 18 - Libuka Lya Kuyela

Shitapilo sha bakankombela

¹ “Mushobo wa bakankombela ba balevi kukatambula shitapilo sha litunga mu Ishalela wufwako, ngoboni bakayoya ha zintupu na zinkombela zamina zinapanikiwi kuli Nyambi ya Ngula.

² Kukakona litunga lyabo ngonehe eshe yikenga mishobo yamina bafwako, shitapilo shabo shinengi kwinga bakankombela ngonehe a kulupishile Nyambi ya Ngula.

³ “Nimwabyo zingombe hinge ndi bambelele bikakombeleliwa, bakankombela bakapanikiwe shiboko na nyama ya mimbanga na lifu.

⁴ Bakankombela bakatambula shitapilo sha kutatika sha mpeka na waine na mazi a olive na wushako wa bambelele.

⁵ Ku mishobo yenu nimwayo, Nyambi ya Ngula wahata mushobo wa Levi kwimana na kutenda milimo mu lizina lyendi mwaya myaka.

⁶ “Kalevi nimwendi, ou ukushinga kwiza kufuma ku munzi uti hinge uti wa mu Ishalela, ukutwesha kwiza ku mwanya wa Nyambi ya Ngula wakulemeshela,

⁷ na kutendela milimo mu lizina lya Nyambi ya Ngula, Nyambi yendi, ngonehe Balevi bamina aba bali kuyo na kutenda mulimo.

⁸ Ukatambulanga wingi wa byakulya bya kweshekela hamo ngonehe baminendi, kami mwanga alame nimwasho ba kumutuminanga ba lupashi lwendi.

Kubela kwa kukanisha kulemesha banyambi bowa

⁹ “Oho mukaya mu litunga liyo akumipanika Nyambi ya Ngula, Nyambi yenu, hinga mukonka biheka bya wunyengwe bya mikoka iya yilimo.

¹⁰ Hinga mukombelela bana benu mu mundilo waha kaala kenu, kami hinga mwitabila bantu benu kuya mu kubuka, hinge kuya ku bakakwawula, hinge bakamalele, hinge ku balozi,

¹¹ hinge ku bakamakuta, kami hinga mubetabila kuya ku bakakupehelela bapashi.

¹² Bantu ba kutenda biheka ebye banengi bawunyengwe kuli Nyambi ya Ngula, Nyambi yenu, kami shiyo nisho shuma ali na ku tandila yiyo mikoka mu litunga aha muli na kuya.

¹³ Yingenu bantu bakubula nyanco kuli Nyambi ya Ngula.”

¹⁴ Ndaba litunga elye mukushinga kutambula, bantu bamo ba kukonka bambuki na bakakwawula, ngoboni Nyambi ya Ngula, Nyambi yenu, kumitabila ngayi mutende ebye wufwako.

Shikulupisho sha kutuma muluwe

¹⁵ Niho Moshesha ambile ngayi, “Nyambi ya Ngula, Nyambi yenu ukamitumina muluwe ngonehe antumine, ukenga umo wa bawushindawenu, pe enu mukamwombatale.

¹⁶ Ha mutena uya mwakungulukilile ku lipili lya Shinayi, kaliha mwashingile kuyuvwa Nyambi ya Ngula ngayi ambe kami, hinge ku bokela ku mona kami lupala lwendi lwa mundilo, ndaba mwatinine ngayi pe mukafwa.

¹⁷ Nohobene Nyambi ya Ngula wambile kukwami ngayi, ‘Kulomba kwabo kwa ngana.

¹⁸ Nikabatumina muluwe wakufweka ngonehe obe wa mukati ka bantu babo. Nikayaka mazu mukanwa kendi, pe ukatongweza bantu byuma nimwabyo nikamulaya.

¹⁹ Muntu nimwendi ukabula kwombatala mazu aya akamba uya muluwe mu lizina lyami, pe ami nikamushushula.

²⁰ Ngoboni ndi muluwe ukwamba mazu mu lizina lyami aya nabulu kumulaya ngayi ambe noho, hinge ndi ukwamba mu lizina lya banyambi bashenge, muluwe wanoho unafwanini kufwa.’

²¹ Mukatwesha kwamba mu mitima yenu ngayi, ‘Tukalimuka nahiti ngayi mazu a muluwe owe kaliha akufuma kuli Nyambi ya Ngula?’

²² Ndi muluwe ukwamba mu lizina lya Nyambi ya Ngula pe ebye akwamba hibikubula ku moneka ngayi bya kupwisha, pe kaliha anengi mazu a Nyambi ya Ngula. Uya muluwe unambanga mu nyala zendi niyemwine, pe hinga mumutina.”