Ndayano 17 - Libuka Lya Kuyela

¹ “Hinga mukombelela kuli Nyambi ya Ngula, Nyambi yenu, nkunzi hinge mbelele uya uli na muhendo, ndaba shinengi sha wunyengwe kuli Nyambi ya Ngula.

² “Hamina mukayuvwa ngayi muntu umo wamu minzi yenu, mulume hinge ndi mbuyama, unabipishi ku meho a Nyambi ya Ngula na kukiluka kulimama kwendi,

³ ha kulemesha na kutendela milimo banyambi bashenge, hinge kulemesha mutena, hinge ngonda, hinge byuma byamina bya muyilu, biya binakanishiwi,

⁴ ndi mukayuvwa mbuzi ya noho, pe yipwizizenu shiwahe, ku mona ndi shinengi sha kupwisha ngayi mwa shikuma shuma eshe sha shibi shinatendiwi mu Ishalela,

⁵ pe shimbenu uya muntu mumututwishe ha munkanda wa munzi, mumuzihe na mamanya.

⁶ Hinge noho, ukazihiwa tuhu ha wupaki wa bantu babili hinge bahatu, ngoboni kutwesha kuzihiwila ha wupaki wa muntu umo tuhu wufwako.

⁷ Bapaki nibo bakatatika kumupuha mamanya pe niho boni wingi wa bantu bakapuhe mamanya uya muntu. Nohobene mu ku fwanina kufumisha ou wubi mukati kenu.

⁸ “Ndi kukwiza shambo shashikalu shikuma kukwenu ha kushiyata, sha kufweka ngo sha kuyita mukeza, bya likona lya wuheti, hinge kuhalulula mukati ka byambo bya nou wunazihi muntu wa mponde na muntu wunazihi wa mapuza. Oho eshe shikamoneka yenunga ku mwanya wakulemeshela, uya akahata Nyambi ya Ngula, Nyambi yenu,

⁹ kami twalenu shambo shenu ku bakankombela ba balevi naku mukakuyata ou uli ha shipona sha kuyatisha ku shikati shiyo, pe balehenu baketule shambo.

¹⁰ Mukatende kwezekesha na nyatilo yabo, kami mukatende shiwahewahe ngonehe ba kumitongweza, mu mwanya wakulemeshela uya akahata Nyambi ya Ngula.

¹¹ Tambulenu bihanganiko byabo, pe konkenu kufundiziza kwabo ha shuma na shuma, hinga mu shanuka mu mazu awa ba kumitongweza.

¹² Muntu ukushampula na kubula kwombatala mukakuyata hinge mukankombela uya unakwendesha milimo ya Nyambi ya Ngula, ukazihiwa. Nohobene mu ku fwanina kufumisha ou wubi mu Ishalela.

¹³ Haya bantu nimwabo bakayuvwa noho, pe bakatina, kami kowa muntu wamina ukazamuka kutenda mu nzila eye.”

Kufundiziza ha bya kuhata mwene

¹⁴ “Oho mwatambulakale litunga liya akumipanika Nyambi ya Ngula, Nyambi yenu, kami mwekalishakale, mukamba ngayi, ‘Tuyenu tuhate mwene ngonehe mikoka yamina nimwayo yinatuzinguluku.

¹⁵ Monenu ngayi muntu ou mu kuhata kwinga mwene, enge bene uya akahata Nyambi ya Ngula. Uku fwanina kwinga umo waha bantu benu bene, hinga muyaka lipukwenda kwinga mwene wenu.

¹⁶ Ou mwene hinga ekala na bambishi babengi kwinga ba bakanzita yendi, kami hinga atumanga bantu ku Engepita mu kulanda bambishi, ndaba Nyambi ya Ngula unamba ngayi bantu bendi hinga kami bakabokela kuyo.’

¹⁷ Mwene hinga akekala na bakazi babengi, ndaba eshe shikamushingishila kufutamina Nyambi ya Ngula, kami hinga aheta shiliva na ngolinde yayingi.

¹⁸ “Oho akekala ha litanda, uku fwanina atikite ndayano mu libuka lyendi kufuminina ku ndayano za Nyambi zekala mu libuka lya bakankombela ba balevi.

¹⁹ Akekalenga na libuka elye pe alilabenga mu kuyoya kwendi nimwako, ngayi alilongeshe kuyuvwila Nyambi ya Ngula bowa na ku mwombatala mu byuma nimwabyo biya bili mu mulao na lukuwa.

²⁰ Eshe shikumulama kutina ahanganika mu mutima wendi ngayi nengi wamuwahe kupitakana baminendi Baishalela, kutina kami akiluka mazu a Nyambi ya Ngula. Pe ukekala ha litanda myaka yayingi, kami bazukulyendi bakalela Ishalela ku mikoka yayingi.”