Ndayano 16 - Libuka Lya Kuyela

Shimbo sha Kupitilila

¹ “Mukalame Shimbo sha Kupitilila sha Nyambi ya Ngula, Nyambi yenu, mu ngonda wa Ambimbi, ndaba mu ngonda uyo wa Ambimbi nimo amilamwinine Nyambi ya Ngula wushiku mu Engepita.

² Yenunga ku mwanya wakulemeshela na kupunwinako umo wa bambelele benu hinge zingombe kwinga nkombela ya shimbo sha kupitilila kuli Nyambi ya Ngula, Nyambi yenu, ku mwanya uya Nyambi ya Ngula akahata mwakwikala lizina lyendi.

³ Oho mu kulya byakulya ebye hinga mulya mankende anavubiwi na mumena. Ha matena mutanu na abili mukalye mankende anavubiwi a kubula mumena, ngonehe shiya mwatendele na ku nyankupisha, haya mwafumine mu Engepita. Lyenu mankende awa, akatumbiwa ngayi mankende a makando, nohobene ngayi shikati nimwasho mukayoya shikenga shanukisho sha mutena uya mwafumine mu Engepita, litunga liya lya makando.

⁴ Ha matena mutanu na abili kowa muntu mu litunga lyenu ukekala na mumena mu litala lyendi, kami nyama ya shimuna wakuzihiwa ha mazolo mutena wakutatika uku fwanina kuliwa wowo wushiku.

⁵ “Hinga mutupula nkombela ya shimbo sha kupitilila iya anamipaniki Nyambi ya Ngula, Nyambi yenu, mu minzi yenu,

⁶ ngoboni ku mwanya umo tuhu Nyambi ya Ngula, Nyambi yenu akahata kuyaka lizina lyendi. Katendenu noho ha kulela kwa mutena, nisho shikati shiya mwafumine nasho mu Engepita.

⁷ Mukateleke nyama, kami mukayilile ku mwanya uya akahata Nyambi ya Ngula, Nyambi yenu, pe kwashako lumenemene mukaboke ku minzi yenu.

⁸ Ndaba mu matena mutanu na umo mukalye mankende a kubula kuvubiwa na mumena, ngoboni ha mutena wa mutanu na abili kungulukenu mu kulemesha Nyambi ya Ngula, Nyambi yenu, kami hinga mutenda mulimo ha mutena uyo.”

Shimbo sha kuteza

⁹ “Labenu zishunda mutanu na zibili kubalika ku shikati shiya mwatatikile kuteza mbuto.

¹⁰ Pe mupinge Shimbo sha Kuteza mu kulemeeka Nyambi ya Ngula, Nyambi yenu na kumuletela ntupu ya shifungo shenu kwezekesha na mfuywezi eze anamipaniki.

¹¹ Tangalenu ku meho a Nyambi ya Ngula, hamo na bana benu babalume na ba bambuyama na bakamilimo benu babalume na ba bambuyama na Balevi na mapukwenda na banginga na bamfwile, aba bekala mu minzi yenu. Pingilenu eshe mu mwanya umo akahata kuyaka lizina lyendi.

¹² Anukenu ngayi mwengile bandungo mu Engepita, monenu ngayi mukwombatala ndayano eze.”

Shimbo sha Minkungwa

¹³ “Oho mwapulakale mbuto yenu nimwayo, kami mwazongakale mikabo yenu nimwayo ya shinyanca, pe pingenu Shimbo sha Minkungwa sha matena mutanu na abili.

¹⁴ Tangalenu hamo na bana benu babalume na ba bambuyama na bakamilimo benu babalume na ba bambuyama na Balevi na mapukwenda na banginga na bamfwile, aba bekala mu minzi yenu.

¹⁵ Lemeshenu Nyambi ya Ngula, Nyambi yenu na kupinga eshe shimbo ha matena mutanu na abili ku mwanya uya akahata Nyambi ya Ngula. Tangalenu, ndaba Nyambi ya Ngula unatandalishi kuteza kwenu na milimo yenu.

¹⁶ “Balume nimwabo ba mukoka wenu bakezanga na kulemesha Nyambi ya Ngula bikati bihatu ha mwaka ha mwaka ku mwanya uya akahata Nyambi ya Ngula, ku Shimbo sha mankende a kubula mumena naku Shimbo sha Kuteza naku Shimbo sha Minkungwa. Muntu na muntu hinga akeza mabokoboko.

¹⁷ Muntu nimwendi ukapanika ngonehe akutwesha, kwezekesha na mfuywezi ziya anamipaniki Nyambi ya Ngula, Nyambi yenu.”

Kuyata kwakubula shihota

¹⁸ “Yimikenu bakakuyata na babilolo bamina mu minzi yenu nimwayo, iya akamipanika Nyambi ya Ngula, Nyambi yenu, kwezekesha mu mishobo yenu, bakayata bantu kwakubula shihota.

¹⁹ Hinga benga bashishweka, hinge ku monesha shihota mu nyatilo yabo. Kami hinga batambula mazika kanwa, ndaba bishemo byashipishanga meho a bantu bangana na kubatendesha ngayi baketule shibi shambo sha wakulunga.

²⁰ Yingenu bakulunga na bakubula shihota shikati nimwasho ngayi mukome litunga liya akumipanika Nyambi ya Ngula, Nyambi yenu, kami mukekalililamo.

²¹ “Oho mukatenda kaala ka Nyambi ya Ngula, Nyambi yenu, hinga mukazikako mpangwa ya nyambi wa mukazi Ashela kunkumo yako kwinga kakulemeshela.

²² Kami hinga mukazika mpangwa ya kulemesha tunankishi, yiya azimba Nyambi ya Ngula.”