Ndayano 15 - Libuka Lya Kuyela

Myaka ya mutanu na yibili

¹ “Ku mamaninino a mwaka wa mutanu na yibili, mukalehele mikuli yabo baya bashimbile mali kukwenu.

² Eshe nisho shiku fwanina kutendiwa. Muntu nimwendi wapanika mukuli wa mali kuli Kaishalela amulehele uya mukuli, kaliha unafwanini kwezeka kutambula mali, ndaba Nyambi ya Ngula niyemwine unabiliki kuleha kwaneye mikuli.

³ Mukutwesha kutambula mukuli wa lipukwenda, ngoboni kaliha munafwanini kutambula mikuli ya bantu benu.

⁴ “Nyambi ya Ngula, Nyambi yenu, ukamitandalisha mu litunga liya anakumipanika, kami kowa umo waku bantu benu ukashepwa,

⁵ ndi mu kumwombatala na kulama shiwahewahe mazu nimwawo aya anamilaya lelo.

⁶ Nyambi ya Ngula ukamitandalisha, ngonehe amikulupishile. Mukapana mikuli ya mali ku matunga amengi, ngoboni enu kukatambula mukuli kukwabo mufwako. Mukalela matunga amengi, ngoboni kowa litunga likamilela.

⁷ “Ndi minenu Kaishalela enge wamu munzi uti hinge uti, nengi wakushepwa mu litunga liya akumipanika Nyambi ya Ngula, Nyambi yenu, hinga mwinga mpango na kukana kumuyavwa.

⁸ Ngoboni mwolwelenu liboko na kumupanika mukuli ngonehe eshe akushinga.

⁹ Hinga mukana kumupana mukuli na kuhanganika mu mutima wobe ngayi, ‘Kampe mwaka wa mutanu na yibili, uya unengi mwaka wakulehela mikuli uli hahepi. Ndi mu kukana kupana mukuli ku uya wakushepwa, kami ha kubilikiza kuli Nyambi ya Ngula hahenu, pe mukawana mulandu.

¹⁰ Panenu kukwendi nahiya tuhu na mutima umo, pe Nyambi ya Ngula ukamitandalisha mu byuma nimwabyo mukatenda na nimwamo mu kupita.

¹¹ Kukekala Baishalela ba bancepwe na kubulilila shikati nimwasho, nohobene nikumilaya ngayi mwolole liboko kukwabo.”

Mwakwikalishila bandungo

¹² “Ndi minenu Kahebelu, wa mulume hinge ndi mbuyama, unalandishiwi kukwenu kwinga ndungo, mumulubule ha kumanisha kutenda milimo kukwenu munyima ya myaka mutanu na umo. Oho mwaka wa mutanu na yibili wakumakale mu ku fwanina kumuleha aye.

¹³ Oho munamulubulu, hinga mumuleha kuya mabokoboko.

¹⁴ Ololenu maboko kukwendi kumupana shikuma kunebye anamitandalishi Nyambi ya Ngula bya kufweka ngonehe bambelele na mbuto ya kupula na mikabo ya shinyanca oku mwazongelanga.

¹⁵ Anukenu ngayi mwengile bandungo mu Engepita, kami Nyambi ya Ngula, Nyambi yenu, wamilubwile. Eshe nisho nikwambila awa mazu lelo.

¹⁶ “Ngoboni ndungo yenu ndi ukwamba ngayi, ‘Nifwako kushinga kufuma,’ ndaba ya kumihaka hamo naba lupashi lwenu, niye unalumikili kwikala,

¹⁷ pe mutwalenu ku shipana sha litala lyenu, mukamutubule ku litu na nconga, ukenga ndungo yenu kutwala ku kufwa. Tendenu noho kami ku ndungo yenu wa mbuyama.

¹⁸ Hinga mupilama shikuma oho mu kulubula ndungo, ndaba unamitendele milimo myaka mutanu na umo, ku shitika sha ndando atambulanga mukamulimo. Nyambi ya Ngula, Nyambi yenu, ukamitandalisha mu nimwabyo mukatenda.”

Bakutatika kuhemuwa ku zingombe na bambelele

¹⁹ “Panikenu bamyeli nimwabo ba bankunzi ba zingombe zenu na bikungwe ba bambelele kuli Nyambi ya Ngula, Nyambi yenu. Hinga mutendesha milimo zingombe eze za bamyeli, kami hinga mushehaho bambelele aba.

²⁰ Ha mwaka ha mwaka mukalilengabyo hamo na ba lupashi lwenu ku meho a Nyambi ya Ngula, ku mwanya wakulemeshela uya akahata.

²¹ Ngoboni ndi kuli shuma shimo shinabipi ha bimuna, ndi waku shunkuta, hinge wakashishitwa, hinge kwikala na muhendo, kaliha munafwanini kumukombelela kuli Nyambi ya Ngula, Nyambi yenu.

²² Mwanga mukalile uya shimuna ku minzi yenu, ba kuyela hinge bakubula kuyela, nimwabo mukalye ngonehe mwalyanga nyama ya Ntenga na Shineke.

²³ Ngoboni hinga mukalya mukeza wabo, mu ku fwanina kuwu yitila hanci ngonehe mema.”