Ndayano 13 - Libuka Lya Kuyela

¹ “Ndi muluwe hinge mukakutontolola milo uya ukatenda malele hinge shikomokesho,

² ngayi mwanga amishanwishe mu kulemesha na kutendela milimo banyambi baya mwabula kulimuka. Hinge ndi ebye akwamba binengi bya kupwisha,

³ hinga muyuvwilila ku mazu a uya muluwe, hinge uya mukakutontolola milo. Nyambi ya Ngula, Nyambi yenu, uli na kumyezeka ngayi amone ndi mu kumuhaka na mitima yenu nimwayo.

⁴ Konkezekenu Nyambi ya Ngula, Nyambi yenu na kumuyuvwila bowa na kwombatala ndayano na mazu wendi, mulemeshenu kwinga bakulunga kukwendi.

⁵ Ngoboni uya muluwe na mukakutontolola milo banafwanini kuzihiwa, ndaba ba kumiletesha nkani za kukanangana Nyambi ya Ngula, ou wamifumishile ku Engepita kuya mwengilenga bandungo. Muntu wanehe wamubi kami uli na kwezeka kumishanwisha kwakutali na wumi uya anamilaya Nyambi ya Ngula kuyoya nawo. Nohobene mu ku fwanina kufumisha ou wubi mukati kenu.

⁶ “Hinge muntu wahemuwa nendi, hinge mwanobe wa mulume hinge wamukazi, hinge mukazobe wahaka, hinge muhoni wobe waha mutima, ukukukandikiza kuwi, ngayi, ‘Tuye tulemeshe banyambi bashenge,’ banyambi baya mwabula kulimuka, hinge bankakazenu ku balimuka bafwako,

⁷ bamo ba kukwabo bakatwesha kumi kandamika kulemesha banyambi ba bantu aba bekala kwakwipi nanenu, hinge banyambi babo baya bekala kwakutali.

⁸ Muntu wanoho hinga mu mwitabila kumi kandikiza, hinge kumuyuvwilila. Hinga mumuyuvwila nceshe na shikeketima, kami hinga mumulama.

⁹ Muzihenu, liboko lyobe likenge lya kutatika kumupuha mamanya, munyima haya leha bantu nimwabo kami bamupuhe mamanya.

¹⁰ Mupuhenu mamanya afwe, ndaba wezekele kumishanwisha kuli Nyambi ya Ngula, Nyambi yenu, ou wamilamwinine kumifumisha ku Engepita kuya mwengilenga bandungo.

¹¹ Oho bantu nimwabo ba Ishalela bakayuvwa ebye, bakekala na bowa, pe kowa muntu ukatenda kami shuma sha shibi ngonehe eshe.

¹² “Ndi mukayuvwa hibyambiwa mu minzi iya akumipanika Nyambi ya Ngula, Nyambi yenu,

¹³ ngayi balume babihulahuli ba mukoka wenu, banashanwishi bantu ba mu munzi wabo mu kulemesha banyambi bashenge baya mwabulile kulimuka.

¹⁴ Ndi mu kuyuvwa mpupo ya nahiyo, shingishishenuyo shiwahewahe. Ndi nisho shiku moneka kwinga sha kupwisha ngayi eshe shuma sha shibi shinamoneke,

¹⁵ niho zihenu bantu nimwabo muya mu munzi na bimuna babo nimwabo kami. Lobeshenu uya munzi kulungu.

¹⁶ Letenu wuheti nimwawo wa bantu ba uya munzi, kami ubungikenu mukati ka munzi. Niho hokeshenu munzi na byuma nimwabyo bilimo kwinga ngo ntupu kuli Nyambi ya Ngula, Nyambi yenu. Niwo ukafutuka lipembe mwaya myaka, kukazikiwa kami wufwako.

¹⁷ Hinga ulitentekela obemwine shinge shumangani hinge shumangani shiya shinayatiwili kukunonga, haya Nyambi ya Ngula ukatenguluka ku wukali wendi wakutinisha na kumi holwela nceshe. Ukenga wa nceshe shikumakuma kukwenu na kumingisha bantu ba kuhanya, ngonehe a kulupishile bankakazenu,

¹⁸ ndi mukwombatala ndayano za Nyambi ya Ngula nimwazo ezi namipaniki lelo kami na kutenda ebye akushinga.”