Ndayano 12 - Libuka Lya Kuyela

Mwanya umo tuhu wakulemeshela

¹ “Eze nizo ndayano na mazu aya mu ku fwanina kwombatala na kuyuvwilila shiwahe mu matena akuyoya kwenu hano hanci, mu litunga liya akumipanika Nyambi ya Ngula, Nyambi wa bankakazenu.

² Shandulenu myanya nimwayo iya ba kulemeshela tunankishi, mu litunga liya munakuya na kutambula na ha mapili amatali naha binkanda na mu nceto ya mitondo ya kubombola.

³ Nyemunenu tuula twabo na kuwisha zimpangwa za mamanya, hokeshenu mishubwa ya nyambi yabo wamukazi Ashela na kuketola tunankishi twabo, nongeshenu lizina lyabo mu myanya yiyo.

⁴ “Hinga mulemeesha Nyambi ya Ngula, Nyambi yenu, mu nzila iya bakulemesha aba bantu banyambi babo.

⁵ Ngoboni mukashinga mwanya uya Nyambi ya Ngula, Nyambi yenu akahata ku mishobo nimwayo, kuya bantu bakeza na kumulemeshela ku meho wendi.

⁶ Kuyo niko mukatupwila zinkombela zenu ziya za kuhokesha na zinkombela zenu kami zamina na byenu bya wulikumi na zintupu zenu na bishemo biya mwakulupisha Nyambi ya Ngula na zintupu zenu za kufunga na mitima na bakutatika kuhemuwa ku zingombe zenu na bambelele benu.

⁷ Kuyo ku meho a Nyambi ya Ngula, Nyambi yenu, enu na ba lupashi lwenu mukalya na kulikuwa byuma byabiwahe biya Nyambi ya Ngula akamitandalisha nabyo.

⁸ “Oho shikati shiyo shakakumina kukafwanina kutenda ngonehe tukutenda lelo mufwako. Muntu na muntu ukutenda kwezekesha na bihanganiko byendi,

⁹ ndaba shilolokale mwingine mu litunga liya akumipanika Nyambi ya Ngula, Nyambi yenu, omu mu kutwesha kwikala shiwahe mu ku mwena.

¹⁰ Oho mukazabuka mushinzi wa Yondana na kuzika mu litunga liya Nyambi ya Ngula, Nyambi yenu, akumipanika kwinga lyenu, ukamilama shiwahe ku bamalamo benu nimwabo, kami mukekala shiwahe.

¹¹ Nyambi ya Ngula ukahata mwanya umo tuhu oku akafwanina kulemeshiwila, kami kuyo niko mukafwanina kuleta kukwendi byuma nimwabyo biya nalayile, zinkombela zenu za kuhokesha na zinkombela zenu zamina na bya wulikumi byenu na zintupu zenu nabishemo byabinene biya munakulupishi kuli Nyambi ya Ngula.

¹² Mukawahilila ku meho a Nyambi ya Ngula, Nyambi yenu, hamo na bana benu babalume na ba bambuyama na bakamilimo benu babalume na ba bambuyama na Balevi aba bali mu minzi yenu, bakubula shitapilo shabo ku litunga.

¹³ Kaliha munafwanini kutupula zinkombela zenu ku mwanya nimwako oku mu kuhata,

¹⁴ Ngoboni kazitupwilenu ku mwanya umo tuhu uya akahata Nyambi ya Ngula ku mushobo umo wa hakati kenu, kuyo tuhu nikwo mukatupwila zinkombela za kuhokesha, kami niko mukatendela byuma byamina biya namilaya.

¹⁵ “Hinge noho, mukalizihila na kulya tuhu bimuna byenu nimwako oku mukwikala. Mukalye nimwabyo biya akumipanika Nyambi ya Ngula. Mukalye bakubula kuyela nanaba ba kuyela, ngonehe mwalyanga nyama ya shineke hinge ya likendende.

¹⁶ Ngoboni ku fwanina mufwako kufutula mukeza wabo kwinga byakulya. Mu ku fwanina kuwu yitila hanci ngonehe mema.

¹⁷ Hinga mukalya sha wulikumi shenu mu minzi yenu, shinge sha mpeka, hinge sha ku waine yenu ya shinyanca, hinge sha ku mazi wenu a olive, hinge bana bakutatika kuhemuwa ku zingombe na bambelele, hinge bishemo biya munakulupishi kuli Nyambi ya Ngula, hinge zintupu zenu za kufunga na mutima, hinge bya zintupu zamina.

¹⁸ Enu na bana benu, hamo na bakamilimo benu na Balevi aba bekala mu minzi yenu, mukalila zintupu eze ku meho a Nyambi ya Ngula, Nyambi yenu, mu mwanya umo tuhu wakulemeshela, ou ahata Nyambi ya Ngula, Nyambi yenu. Lilenu kuyo, pe kawahililenu ha byuma nimwabyo biya anamipaniki Nyambi ya Ngula.

¹⁹ Monenu kami ngayi, hinga mukavulama Balevi oho mukwikala mu litunga lyenu.

²⁰ “Oho Nyambi ya Ngula, Nyambi yenu, akanenehesha litunga lyenu ngonehe a kulupishile, ukamba ngayi, ‘Nikalya nyama,’ ndaba moyo wobe wahaka kulya nyama, pe ukalya nyama nimwamo omwo ukushingila.

²¹ Ndi mwanya uya wakulemeshela, anahata Nyambi ya Ngula uli kwakutali shikuma, ngonehe namitongwezele, mukatwesha kuziha nimwendi waku zingombe hinge bambelele baya anamipaniki Nyambi ya Ngula, kami mukalila nyama ku minkanda yenu.

²² Ngonehe mwalyanga nyama ya shineke na likendende, mukayilye, ya bakubula kuyela hinge ba kuyela mukalye.

²³ Hinga mukalya mukeza, ndaba wumi uli mu mukeza, ndaba ku fwanina kulya wumi hamo na nyama mufwako.

²⁴ Hinga mukafutula mukeza kwinga byakulya, ngoboni wuyitilenu hanci ngonehe mema.

²⁵ Hinga mukalya mukeza, ngayi mwanga byuma nimwabyo bikende shiwahe kukwenu naku bazukulyenu, oho mukwombatala ku meho a Nyambi ya Ngula.

²⁶ Twalenu zintupu zenu na bishemo biya munakulupishi Nyambi ya Ngula ku mwanya umo tuhu wakulemeshela.

²⁷ Mukatupule zinkombela za kuhokesha za nyama na mukeza ku kaala ka Nyambi ya Ngula, Nyambi yenu. Mukayitile mukeza wa nkombela ku kaala ka Nyambi ya Ngula, pe mukalyeko nyama.

²⁸ Lamenu na kwombatala mazu nimwawo aya namilayile, pe nimwabyo bikenda shiwahe kukwenu naku bazukulyenu mwaya myaka, ndaba mukatenda byabiwahe bya kuwahilisha Nyambi ya Ngula, Nyambi yenu.”

Kushuza bakakulemesha tunankishi

²⁹ “Nyambi ya Ngula, Nyambi yenu, ukalobesha mikoka iya munakuya na kukoma litunga lyabo, kami mukalitambula na kuzikamo.

³⁰ Oho Nyambi ya Ngula walobeshakale matunga owo, enu kaliha munafwanini ku konka biheka byabo bya wunyambi wabo na kwamba ngayi, ‘Kati bakamatunga awa, balemeshelenga nahiti banyambi babo, kati na nami nikatenda nahiyo ndi?’

³¹ Hinga mulemeesha Nyambi ya Ngula, Nyambi yenu, mu nzila eye balemeshanga banyambi babo, ndaba mu kulemesha kwa banyambi babo batendanga nimwabyo byuma bya wunyengwe biya azimba Nyambi ya Ngula. Bakombelelanga na kuhokesha bana babo babalume na ba bambuyama mu mundilo waha tuula twabo.

³² “Tendenu byuma nimwabyo biya namilayile. Hinga muwezelelako shinge shuma shimo, hinge ndi kufumishako.”