Ndayano 11 - Libuka Lya Kuyela

Wunene wa Nyambi ya Ngula

¹ “Hakenu Nyambi ya Ngula, Nyambi yenu, ombatalenu mulao wendi na mazu wendi na kufundiziza na ndayano bikati nimwabyo.

² Anukenu haya, ebye munalilongeshe ha bya Nyambi ya Ngula ha kwihala na kumulimukisha. Kaliha nikwamba kuli bana benu, baya behalile ha kumulimuka, ngoboni enu mwamonene wunene wa Nyambi ya Ngula na ngovu zendi na nyala zendi zazinene,

³ na bikomokesho byendi. Mwamonene ebye atendele kuli Fwalo mwene wa Engepita naku litunga lyendi nimwalyo.

⁴ Mwamonene eshe Nyambi ya Ngula alobeshele bakanzita ba Baengepita, hamo na bambishi babo na makoloyi, ha kuba kupwila mu Liwate lya Kufubila, oho bamitandilenga.

⁵ Mukulimuka ebye Nyambi ya Ngula atendele kukwenu mu libelelengwa oho shilolo mukume kuno.

⁶ Mukwanuka ebye atendele kuli Ndatani na Ambilamu, bana ba Eliyambi babalume ba mushobo wa Lubena. Limvu lyayahamine na ku bamina, hamo na ba lupashi lwabo na zintanda zabo na bakamilimo babo na bimuna byabo.

⁷ Mwamonene milimo yayinene nimwayo iya atendele Nyambi ya Ngula.”

Mfuywezi za litunga lya shikulupisho

⁸ “Ombatalenu ndayano nimwazo ziya namilaya lelo. Niho mukatwesha kukazabuka mushinzi na kutambula litunga liya mukushinga kwingina.

⁹ Kami mukekala shikati shashitali mu litunga likukunkula mahwe na wushi, liya alibezele Nyambi ya Ngula kulipanika ku bankakazenu na bazukulyabo.

¹⁰ Litunga liya mukushinga kutambula kaliha linalifweke na litunga lya Engepita, muya mwekalilenga mwaka. Muyo mwakunine mbuto yenu naku kabakana kuyitilila ngonehe mfuba ya mashiha.

¹¹ Ngoboni litunga liya muli na kuya na kutambula, linengi litunga lya binkanda na mikulo, litunga lya mvula.

¹² Nyambi ya Ngula, Nyambi yenu, ukulama litunga elye na kulitilamina kukuma ku kutatika kwa mwaka kuya kumamanino a mwaka.

¹³ “Nohobene, ndi mukwombatala mazu awa namipaniki lelo na ku haka Nyambi ya Ngula, Nyambi yenu na kumutendela milimo na mitima yenu nimwayo na myoyo yenu nimwayo,

¹⁴ pe nikatuma mvula ha litunga lyenu oho akushingiwa ha shituwizi na likuhulahoke, mwanga mukekale na mbuto na waine na mazi a olive.

¹⁵ Kami nikamenesha mwila wa zingombe zenu. Mukekala na byakulya ebye mwashinga nimwabyo.

¹⁶ Hinga mwitabila kumishanwisha kuli Nyambi ya Ngula na kubalika kulemesha na kutendela milimo banyambi bashenge.

¹⁷ Ndi mukutenda noho Nyambi ya Ngula ukamipilamina. Ukakanisha mvula kuloka, ngoboni limvu lyenu likayuma shikuma ha kulimaho byakulya. Mukafwilamo shawangu, hinge ndi nilyo linengi litunga lyaliwahe liya akumipana.

¹⁸ “Anukenu mazu awa na kuwalama. Amangilenu ha maboko wenu na kuwavwala ha zimpala zenu kwinga shanukisho.

¹⁹ Alongeshenu ku bana benu. Mukatonteo oho muli mu litala lyenu, hinge mukwenda, hinge ha kulangana, hinge ha kupinduka.

²⁰ Mukawatikite ha bikwiliti byabihala bya matala wenu naha mapangati wenu.

²¹ Niho enu na bana benu mukayoya shikati shashitali mu litunga liya alibezele Nyambi ya Ngula ku bankakazenu ngayi ukabapanalyo. Mukekalilila bene muyo ngonehe mayilu ekala hayilu ya hano hanci.

²² “Ndi mukwombatala shiwahe mazu nimwawo aya namilayile na ku haka Nyambi ya Ngula, Nyambi yenu na kwenda mu zinzila zendi na kukakatila kukwendi,

²³ Pe Nyambi ya Ngula ukatanda mishobo nimwayo oho muli na kuya na kulikaka, kami mukatambula litunga lya mikoka yayinene na ngovu shikuma kumipitakana.

²⁴ Limvu nimwalyo liya mukalyata likenga lyenu. Litunga lyenu likahenya kubalika ku mabukubuku ku libelelengwa, kukakuma naku ncelele ku lipili lya Lembanoni, kami kubalika ku mushamuko ku mushinzi wa Yufuleti, kami kuleta naku mponci ku Liwate lya Menditaleniya.

²⁵ Kowa muntu wakutwesha kumi kanisha oku nimwako mukaye mu litunga liya Nyambi ya Ngula, Nyambi yenu, kami ukengisha bowa bantu kumitina, ngonehe ambile.

²⁶ “Mona nili na kumipana lelo kulihatila ha mfuywezi hinge ndi ha shikuto,

²⁷ mu kuwana mfuywezi, ndi mukwombatala ndayano za Nyambi ya Ngula, ziya namipaniki lelo,

²⁸ mu kukawula shikuto, ndi mu kulimbulula ndayano za Nyambi ya Ngula na kushanuka munzila na kulemesha banyambi bashenge baya mwabula kulimuka.

²⁹ Oho Nyambi ya Ngula akamitwala mu litunga liya muli na kuya na kutambula, mukatoya mfuywezi eze ha lipili lya Ngelizima na kutoya shikuto ha lipili lya Embalu.

³⁰ Nehe mu kulimuka, mapili awa abili ekala ku mponci ya mushinzi wa Yondana, kwakwipi na mitondo yayinene ya Oka yaku Mole, mu litunga lya Bakenaani aba bekala mu Mukulo wa Yondana, mu munzi wa Ngilingale.

³¹ Muli na kuya na kuzabuka mushinzi wa Yondana ngayi mukakone litunga liya akumipana Nyambi ya Ngula, Nyambi yenu. Oho mu kulitambula na kwikalamo,

³² monenu ngayi mukwombatala ndayano nimwazo na mazu awa na kumipanika lelo.”