Ndayano 10 - Libuka Lya Kuyela

Moshesha ukutambula ndayano kami

¹ “Ha shikati osho Nyambi ya Ngula ambile kukwami ngayi, ‘Baza matapa abili a mamanya ngonehe a kutatika, kami tenda Likwati lya Kulimama lya shitondo sha mumbambangoma mwakuwayaka. Niho ukandame wize kuno kukwami hano ha lipili na matapa abili.

² Kami nikatikitaho mazu ha nowo matapa, aya natikitile ha matapa aya wapabwile, pe ukawayake mu likwati.’

³ “Niho natendele likwati lya shitondo sha mumbambangoma na kubaza matapa abili a mamanya ngonehe aya a kutatika, niho nakandamine ku lipili hinga na shimba mamanya abili.

⁴ Niho Nyambi ya Ngula atikitile hanawa matapa mazu amo ngonehe aya atikitile ha shikati sha kutatika. Mazu awa engile mazu likumi aya ampanine oho ambilenga mu mundilo ha mutena uyo mwakungulukilile ku lipili. Nyambi ya Ngula wampaninewo.

⁵ Niho natengulukile naku kunkuluka ku nceto ya lipili, ngonehe alayile Nyambi ya Ngula, pe nayakile mu likwati liya natendele, muyo nimo ashili nihano.”

⁶ Baishalela bafumine ku Mbeloti Mbenenjaakani bayile ku Moshelote. Niko akafwilile Aloni, kami niko akafundiwile, mwanendi wa mulume Eliza wamu shwanine kwinga mukankombela.

⁷ Kufuma kuyo, bayile ku Ngandingonda, bafumine kami Ngandingonda kuya ku Yotimbata, ku mbalila ya mishinzi ya mema.

⁸ Nyambi ya Ngula wahatile balume ba mushobo wa Levi kwinga bakakulama Likwati lya Kulimama na kumutendela milimo kwinga bakankombela na kutontolola mfuywezi mu lizina lyendi. Kami milimo eye, yishili kwinga yabo na shikati shino.

⁹ Shiyo nisho shuma shaletesha ngayi mushobo wa Levi ubule kutambula ku likona lya litunga ngonehe shiya batambwile ba mishobo yamina, shitapilo batambwileko tuhu shenga shakwinga bakankombela ba Nyambi ya Ngula ngonehe ambile.

¹⁰ “Nekalile ha lipili matena makumi anaa na zinciku makumi anaa, ngonehe natendele ha shikati sha kutatika. Nyambi ya Ngula wanyuvwililile kami, pe wetabilile ngayi kukamilobesha wufwako.

¹¹ Niho Nyambi ya Ngula ambile kukwami ngayi, ‘Katuka, utwaminine bantu kubatwala ngayi batweshe kuya na kutambula litunga liya nalibezele na bankakazabo kubapanikalyo.”

Ebye akushinga Nyambi

¹² “Haya enu Baishalela, Nyambi ya Ngula, Nyambi yenu ukushinga Byumangani kukwenu. Ukushinga ngayi mwanga mwikale na maleema kuli Nyambi ya Ngula na kutenda nimwabyo biya akumilaya. Mu hakenu na kumutendela milimo na mitima yenu nimwayo na myoyo yenu nimwayo.

¹³ Ombatalenu ndayano na kufundiziza kwendi nimwako, eze nili na kumipana lelo ngayi zimiyavwe.

¹⁴ Mona, liyilu lya mayilu enga a Nyambi ya Ngula, Nyambi yenu na hanci kami na byuma nimwabyo biliho binengi byendi.

¹⁵ Ngoboni shishemo sha Nyambi ya Ngula ku bankakazenu shengile shashinene shikuma, pe wamihatile kupitakana bantu bamina nimwabo. Kami nihano mushili kwinga bantu bendi ba kuhatiwa.

¹⁶ Nohobene haya, ku balika hano na kumbili, yingenu bakwombatala Nyambi ya Ngula, kami lehenu kukaluhisha mitima yenu.

¹⁷ Nyambi ya Ngula, Nyambi yenu, wenga wamunene hayilu ya banyambi nimwabo na ngovu nimwazo. Unengi wamunene na ngovu zazinene kami uku fwanina kutiniwa, shihota wufwasho, kami kutambula lizika kanwa wufwako.

¹⁸ Ukupenzeshesha na ku mona ndi banginga na bamfwile ba kulamiwa shiwahewahe na ku haka mapukwenda, aba bekala hamo na bantu betu na kubapanika byakulya na bya kuvwala.

¹⁹ Nohobene haya, hololenu shishemo ku baya mapukwenda, ndaba nenu kami mwengile mapukwenda mwaka mu Engepita.

²⁰ Enu Baishalela ombatalenu tuhu Nyambi ya Ngula, Nyambi yenu na kumulemesha. Yingenu bakulunga kukwendi ninkayendi na kulibeza mu lizina lyendi.

²¹ Muyemezenu, niye Nyambi ya Ngula, Nyambi yenu, kami munamono na meho wenu enu bamwine byuma bya kubazumwisha biya anamitendele.

²² Oho bankakazenu bayile ku Engepita, bengile tuhu makumi mutanu na abili, ngoboni haya Nyambi ya Ngula, Nyambi yenu, unamihanyishi ngonehe nyenye zamu mbimbayilu.”