Ndayano 1 - Libuka Lya Kuyela

Lwimbo lwa Moshesha

¹ Awa niwo mazu ambile Moshesha ku bana ba Ishalela mu libelelengwa lya ku mushamuko wa mushinzi wa Yondana mu Alamba waliyahikiza na Shufi, mukati ka Palani na Tofwelu, Lambani, Hazeloti na Ndizahambu.

² Unengi mukala wa matena likumi na umo wakufuma ku Holembu mu nzila ya kuya ku lipili lya Sheya ku Kandeshi Mbaneya.

³ Mu mwaka wa makumi anaa ha mutena wakutatika wa ngonda ya wulikumi na umo, Moshesha watongwezele bantu ba Ishalela ndayano nimwazo ziya amulayile Nyambi ya Ngula.

⁴ Munyima ya kukoma Shihoni mwene wa Baamoli, uya wekalilenga mu Heshimboni na Ongi mwene waku Mbashani uya wekalilenga mu Ashitaloti na mu Endileyi.

⁵ Moshesha watatikile kutontwelela bantu eze ndayano ku mushamuko wa mushinzi wa Yondana mu litunga lya Mowambi ngayi,

⁶ “Nyambi ya Ngula, Nyambi yetu wambile kukwetu oho tushili mu Holembu ngayi, ‘Munekala shikati shashitali ha lipili elye.

⁷ Tuntulenu ntanda mwende mukala wenu, muye ku litunga lya binkanda lya Baamoli na ku bandambo babo nimwabo ba mu Alamba na mu litunga lya binkanda na mu litunga lya kupatama na mu Nengembu na ku shibumbo sha liwate naku litunga lya Kenaani mu Lembanoni, ku mushinzi wawunene wa Yufuleti.

⁸ Monenu ninamipaniki liya litunga, yenunga mukekale mu litunga a kulupishile Nyambi ya Ngula ku bankakazenu, ba Abulahama na Ishaki na Yakobo, kubapanikalyo hamo na bazukulyabo.’”

Moshesha ukuhata bakakuyata

⁹ Moshesha wambile kubantu ngayi, “Ha shikati shiyo namitongwezele ngayi, ‘Ninkayami kutwesha kumi twaminina nifwako.

¹⁰ Nyambi ya Ngula, Nyambi yenu, unamivulishi ngonehe nyenye za muyilu.

¹¹ Mwanga, Nyambi ya Ngula, Nyambi ya bankakazenu amivulishe shikuma na kumitandalisha, kwezekesha ngonehe amikulupishile.

¹² Ngoboni ami ninkayami nikutwesha nahiti kushimba ou muziho wawulemu na kuketula byambo byenu?

¹³ Hatenu balume ba kukeya, bakakuyuvwishisha na kalimukisho, mu mishobo yenu, kami nikabenga bantwamina benu.’

¹⁴ Enu mwankumbwile ngayi, ‘Ebye una hanganiki byabiwahe kubitenda.’ ”

¹⁵ “Niho nashimbile bantwamina ba mu mishobo yenu, baya ba kukeya na kalimukisho ngayi benge bantwamina benu, bamo bekalile na ngovu ha bantu likulukazi, bamo ha bantu mwanda na bamo ha makumi mutanu bamo ha likumi, nemikile kami babilolo kwinga bantwamina mukati ka mishobo yenu.

¹⁶ “Ha shikati shiyo nafundizizile bakakuyata benu ngayi, ‘Yuvwishishenunga byambo bikwiza mukati ka bantu benu, yatenu shambo nimwasho shiwahewahe, hinge shinakundama ku bantu benu, hinge ku mapukwenda baya mwazika nabo.

¹⁷ Hinga mwikala na shihota ha kuyata byambo, yatenu kwezekesha naneshe shililimo, hinge ndi ku muntu wanahiti. Hinga mutina muntu, ndaba kuyata kwafuma kuli Nyambi. Ndi shambo shamina shashikalu kukwenu, shiletenu kukwami, pe nikashiketula.’

¹⁸ Ha shikati shiyo namilayile byuma nimwabyo munafwanini kutenda.

Bakakuhokela ba kutumiwa kufuma ku Kandeshi Mbaneya

¹⁹ “Twatendele ngonehe atulayelele Nyambi ya Ngula, Nyambi yetu. Twafumine ku lipili lya Shinayi niho twapitile muya mu libelelengwa lyalinene lya kutinisha liya mwamonene, ha nzila ya ku litunga lya binkanda lya Baamoli, oho twakumine ku Kandeshi Mbaneya,

²⁰ nambile kukwenu ngayi, ‘Haya mwakumakale ku litunga lya binkanda lya Baamoli, elye Nyambi ya Ngula, Nyambi yetu anatupana.

²¹ Monenu Nyambi ya Ngula, Nyambi yenu unamipaniki litunga, yenunga mukekalemo ngonehe amitongwezele Nyambi ya bankakazenu, hinga mutina hinge kulikekula.’

²² “Niho mwezile nimwenu kukwami pe mwambile ngayi, ‘Tuyenu tutume bantu kumbili yetu ngayi bakatuhokelele liya litunga, mwanga batutongweze eshe tunafwanini kwenda na zinkena oku twa kuya.’

²³ “Eshe shengile shashiwahe kukwami, niho nahatile balume likumi na babili mukati kenu, kufuminina ku mushobo na mushobo.

²⁴ Niho bayile mu litunga lya binkanda, bakakumine na ku mukulo wa Eshikolu na kuwu hokela.

²⁵ Bakashimbile mikabo ya litunga liyo, niho bayiletele kukwetu na kututongweza ngayi, ‘Litunga elye anakutupanika Nyambi ya Ngula, Nyambi yetu linengi lyaliwahe.”

²⁶ Ngoboni enu mwalwishile ndayano za Nyambi ya Ngula, Nyambi yenu oho mwakanine kuyamo.

²⁷ Mwatatokele ku umo na wamina mu zintanda zenu ngayi, “Nyambi ya Ngula watuzimba, Unatufumishi mu Engepita na kutuleta kuno ngayi aba Baamoli batuzihe.”

²⁸ Tuku fwanina kuya kuti? Bawushinda wetu banatupopeshe mitima hakwamba ngayi, “Bantu balimo bangovu shikuma na wutali kutupitakana, kami twimbi twa zinkena zalyo twatutali kukakuma na muyilu. Kami twamonamo na bana ba Anakimu.”

²⁹ Ami nambile kukwenu ngayi, “Hinga mubatina, hinge kulikekulabo.”

³⁰ Nyambi ya Ngula, Nyambi yenu ukamitwaminina na kumi lwila, ngonehe atendele ha meho wenu mu Engepita,

³¹ na mu libelelengwa. Mwamonene eshe Nyambi ya Ngula, Nyambi yenu amitwamininine kumi leta ku mwanya uno, ngonehe hemi wa mulume atwamininanga mwanendi.

³² Hinge ngayi nambile mazu awa, mwabulile kukulupila Nyambi ya Ngula, Nyambi yenu,

³³ uya watwamininine mu mundilo shikati sha wushiku na likumbi ha shikati sha mwana, kumbili yenu na ku mona ngayi hati munafwanini kutulila.

Nyambi ya Ngula ukushushula Ishalela

³⁴ “Nyambi ya Ngula wayuvwile kutatoka kwenu, pe wapilamine niho alibezele ngayi,

³⁵ ‘Kowa muntu hinge umo wa shihemwinino eshe sha shibi ukengina mu litunga lya wilo elye na kulupishile bankakazenu.

³⁶ Ndele Kalembu mwana Yefuna, niye ukamona liya litunga, hamo na bana bendi, kami nikabapanikalyo ndaba unombatala mazu a Nyambi ya Ngula na mutima wendi nimwawo.’

³⁷ Ndaba yanenu, Nyambi ya Ngula wampilaminine ngayi, ‘Nanobe kami Moshesha kukenginamo wufwako.

³⁸ Ngoboni mukakuyavwa wobe Yoshuwa mwana Nune, niye ukenginamo. Mushumankanishe, ndaba niye ukatwaminina Baishalela na ku ba kumishamo.’

³⁹ “Nyambi ya Ngula wambile ngayi, ‘Bana benu aba bashili babashe bakubula kulimuka wubi na wuwahe, nibo bakatwesha kwinginamo na kwikalamo, ndaba nikabapanikalyo kwinga lyabo.

⁴⁰ Ngoboni enu, bokenu mu libelelengwa mu nzila ya kuya ku Liwate lya kufubila.’

⁴¹ “Niho mwakumbwile ngayi, ‘Tunabipishili Nyambi, haya twa kuya na kulwa, ngonehe atutongwezele Nyambi ya Ngula, Nyambi yetu.’ Muntu na muntu wakukwenu walibalakanyinine kulwa na kuhanganika ngayi shawangu kwingina mu litunga lya mapili.

⁴² “Ngoboni Nyambi ya Ngula wambile kukwami ngayi, ‘Batongweze ngayi hinga baya mu kulwa, ndaba kuka balwila nifwako, pe bakankole babo bakabakoma.’”

⁴³ Niho namitongwezele, ngoboni mwabulile kuyuvwilila na kulwisha ndayano za Nyambi, niho mwayile mu litunga lya mapili.

⁴⁴ Baamoli baya bekalilenga mu litunga lya mapili mu kubalwisha ngonehe mpuka, bamikomene kufuma ku Sheya na kukuma ku Homa.

⁴⁵ Mwabokele himulilila kuli Nyambi ya Ngula, ngoboni Niye wabulile kuyuvwilila kukwenu na matu wendi.

⁴⁶ Niho mwekalile ku Kandeshi matena amengi, kami mwehalileko.