Ndanyele 9 - Libuka Lya Kuyela

Ndanyele ukulombelela bantu bendi

¹ Ndaliyashi mwana Ahashawelashi, wengile mwene wa Mbambiloni, wengile ka Mende.

² Mu mwaka wakutatika wakulela kwendi, ami Ndanyele nayuvwishishile ebye byatikitiwa ngayi, kuya ngo ku lizu lya Nyambi ya Ngula atongwezele muluwe wendi Yelemiya ngayi, kubipa kwa Yelushalema kukashimba myaka 70.

³ Nalombelele shikuma kuli mwene Nyambi na kumulambilila na kuzila kulya na kuvwala bicancolo na kulifukwila mu mutoko.

⁴ Nalombelele kuli Nyambi ya Ngula, Nyambi yami na kwitabila wubi wa bantu bami ngayi, “Obe Mwene Nyambi, obe uli wamunene kami uli wamuwahe. Obe walamanga kulimama naku monesha shishemo sha mwaya myaka ku baya ba ku kuhaka na kwombatala ndayano zobe.

⁵ Tunabipishi na kutenda shibi, twenganga bakuluwa naku kufutulukila, tunakana kutenda ebye watutongwezele na kufutamina ndayano na kuyata kwobe.

⁶ Kaliha twayuvwile bakamilimo bobe bamiluwe, aba bambilenga mu lizina lyobe ku bamyene zetu naku batulela betu naku bankakazetu naku bantu nimwabo ba mu litunga.

⁷ “Obe Mwene Nyambi, uli wakulunga shikati nimwasho, ngoboni twayuvwa kale lisheni, bantu bekala mu Yunda na mu Yelushalema na bantu ba Ishalela nimwabo, aba wapanzanishilile mu matunga a hahepi na kwakutali ndaba bakubula kwinga bakwoloka kukwobe.

⁸ Bamyene zetu na batulela betu na bankakazetu banayuvwu lisheni ndaba tunakubipishili,

⁹ ngoboni obe Nyambi ya Ngula Nyambi yetu wekala na nceshe na kuyatila, hinga ndi tunakufutulukili.

¹⁰ Twabulile ku kwombatala obe Nyambi ya Ngula, Nyambi yetu hinge kulama mazu obe aya wapanikile ku bamiluwe bakamilimo bobe.

¹¹ Baishalela nimwabo banakiluku ndayano zobe na kukana ku kwombatala, tunakubipishili pe watukutile na bikuto biya byatikitiwa mu ndayano za Moshesha, mukamulimo wobe.

¹² Watendele ebye wambile ngayi ukabitenda kukwetu na batulela betu ha kuleta malwa hahetu. Washushwile Yelushalema shikuma kupitakana, hinga shatanga ku moneka hano hanci.

¹³ Twatambwile malwa nimwawo ngonehe shatikitiwa mu ndayano za Moshesha. Hinge ndi kaliha twezeka kulambilila kuyamiziza kwa Nyambi ya Ngula, Nyambi yetu, ha kutenguluka kufuma ku wubi wetu hinge kukonka kupwisha kwobe.

¹⁴ Nohobene Nyambi ya Ngula, obe Nyambi yetu, waliwahishile kutushushula, ndaba byuma nimwabyo ebye watendanga bya kupwisha hinge noho twabulile kwombatala kukwobe.

¹⁵ “Pe haya Obe Nyambi ya Ngula, obe Nyambi yetu, obe shiya wakatula lizina lyobe elye lishili kwanukiwa na lelo, ha kufumisha bantu bobe mu litunga lya Engepita na liboko lyobe lya ngovu. Tunabipishi na kutenda wubi.

¹⁶ Obe Mwene, kuya na milimo yobe ya kulunga, pe haya libelulule ku kupilama kwobe naku wukali wobe, hinga upilamina Yelushalema. Olu lwenga lukena lwobe na shinkanda shobe sha kuyela. Bantu nimwabo bamu matunga a hahepi batilamina kale Yelushalema na ha bantu bobe kwinga likendu ndaba ya wubi wetu na milandu batendele bankakazetu.

¹⁷ Haya obe Nyambi yetu, yuvwa malombelo na kulambilila kwami ami mukamulimo wobe. Tendulula Litala lyobe linalobeshiwi mwanga muntu nimwendi alimuke ngayi obe uli Nyambi.

¹⁸ Obe Nyambi, yuvwilila kukwetu, penza kukwetu na ku mona kuloba kwa lukena lwobe luli na lizina lyobe. Tufwako kulombela kukwobe ndaba ngayi twatendanga bya kupwisha ngoboni ndaba ya nceshe zobe zazinene shikuma.

¹⁹ Obe Mwene, tuyuvwe. Obe Mwene, tuyatile. Obe Mwene, yuvwilila kukwetu na kutenda shuma shimo. Obe Nyambi, hinga wihala ndaba ya lukena lwobe na bantu bobe bakwihaniwa na lizina lyobe.”

Lingeloyi Ngambiliyele ukutontolola bya kulubulula

²⁰ Shikati shiya nambilenga na kulombela na kulitabila wubi wami na wubi wa bantu bami Baishalela na kunyepa kuli Nyambi ya Ngula, Nyambi yami, bya shinkanda shendi sha kuyela,

²¹ aha nekalile na kulombela, Ngambiliyele, ou namonene ha kutatika mu shimono, wezile na kutukila wanguwangu oku nekalile. Nisho shengile shikati sha zinkombela za mazolo.

²² Wantontwelele ngayi, “Ndanyele nezi kuno naku kupana ngana na kanangatima ka ku yuvwishisha.

²³ Oho watatikile kulomba kuli Nyambi, niye wakukumbwile, nezi na kukutongweza ebye akumbwile, ndaba waku haka shikuma. Nohobene tulumana na ku yuvwishisha shimono.

²⁴ “Nyambi unayaka myaka 70 na kuvulishayo mutanu na kabili, ha bantu bobe na lukena lwobe lwa kuyela, kumanisha milandu yenu na kumanisha wubi na kufumisha kuluwa na kuleta kulunga kwa mwaya myaka, mwanga bitweshe kwinzalishilila bimono na kulubulula na kuwabisha mwanya wa kuyela shikuma.

²⁵ Limuka eshe na ku yuvwishisha shiwahe, kufuma shikati shiya babilikile bya kuhongozola na kutendulula Yelushalema, kutwala naku shikati sha kwiza kwa kalela ou Wakuwabishiwa, kukekala myaka 49. Yelushalema ukatendululiwa na zimbanza na twimbi twendi twa ku shuma ha myaka 434 ngoboni nisho shikenga shikati sha makando.

²⁶ Ku mamaninino a yiya myaka, ou wakuwabishiwa ukazihiwa kwakubula mulandu. Kalela ukeza ou bakanzita bendi bakalobesha lukena na Litala lya Nyambi. Mamaninino akeza ngonehe libazi, pe kukekala nzita na kuloba oku kwabilikiwile.

²⁷ Uya kalela ukulimama na bantu babengi ha myaka mutanu na yibili, pe hakati ka iya myaka ukamanisha zinkombela na zintupu. Ku nkomi ya Litala lya Nyambi ukayaka byuma bya wunyengwe biya bikaleta kuloba, hantu mamaninino aya abilikiwile akayitiwila hahendi.”