Ndanyele 8 - Libuka Lya Kuyela

Shimono sha Ndanyele sha shikungwe wa mbelele na mpongo

¹ Mu mwaka wawuhatu wakulela kwa mwene Mbeleshaza, ami Ndanyele namonene shimono sha wubili.

² Mu shiya shimono naliwanine nili mukembi ka lukena lwa Shusha, olu lwekala mu litunga lya Elamu. Nemanine ku lukandwa lwa mushinzi wa Ulayi.

³ Oho nayimbwile meho wami pe namonene shikungwe wa mbelele wa mashengo abili amatali, hinga emana kunkumo ya mushinzi. Lishengo lya kukotokela kumena nilyo lyengile lyalitali kupitakana lyamina.

⁴ Ami namonene shikungwe wa mbelele hafumba hinga apenza ku mponci naku ncelele naku mabukubuku. Kowa kayamana watweshele kumulamwina ku ngovu zendi. Watendele ngonehe omu ashingilile pe wanenehele shikuma.

⁵ Oho nahanganikilenga bya kutontoloka kwanebye namonene, kubazumuka tuhu shikungwe wa mpongo wa lishengo limo lyalinene mukati ka meho wendi waholomokelele ku mponci na kwenda kuketula kaye nimwako wendelenga hakati, wendelenga wanguwangu mawulu wendi abulile kulyata hanci.

⁶ Mpongo wezile kuli shikungwe wa mbelele ou wekalile na mashengo abili, uya namonene hinga emana kunkumo ya mushinzi, wakulumukilile kukwendi na wukali wawunene.

⁷ Namumonene ha lwisha shikungwe wa mbelele. Wakalihile shikuma wamupobele na kupokozola mashengo abili. Shikungwe wa mbelele wabulile ngovu za kulilamwina, pe wamuwishilile hanci na kumulyatangila. Kowa watweshele kumulamwina.

⁸ Niho shikungwe wa mpongo wekalile na ngovu shikuma, ngoboni oho ngovu zendi zanenehele lishengo lyendi lyapokokele. Mu mwanya walyo mwamenene mashengo anaa amanene, lishengo na lishengo lyenikile ku zimbalila zinaa.

⁹ Lishengo lyalishe lyamenene ha lumo lwa mashengo anaa. Elye lyengile lyalishe ngoboni lya kulile kwinga lya ngovu kulwa mabukubuku ku mushamuko na Litunga Lyaliwahe.

¹⁰ Lyekalile na ngovu shikuma pe lyalwishile bakanzita ba muyilu, pe lyapulumwinine nyenye zimo hanci na kuzilyatangila.

¹¹ Mpongo walwishile mukulwane wa bakanzita ba muyilu, wakanishile zinkombela zatupuliwilenga ha mutena ha mutena na Kubipisha Litala lya Nyambi.

¹² Bantu babipishile kuyo kupitakana kutupula zinkombela za ha mutena ha mutena, bayumbilile kupwisha kwa bya wunyambi hanci. Lishengo lyatangamine mu nimwabyo lyatendele.

¹³ Niho nayuvwile lingeloyi hamba, pe minendi wepwile ngayi, “Kati shikatwalililaho shikati sha kukuma hati ebye byuma byamonekele mu shimono? Kati shikashimba shikati sha kukuma hati ou wubi wakutinisha ukahinga mu zinkombela za ha mutena ha mutena? Kati shikashimba shikati sha kukuma hati makunge a muyilu na Litala lya Nyambi bakabilyatangila?”

¹⁴ Lingeloyi lyamina lya kumbwile ngayi, “Kunalabiwi bikati bya mazolo na lumenemene bya kukuma ku 2,300 ha shikati eshe kaliha kukekala zinkombela. Niho Litala lya Nyambi likazilululiwa kami.”

Lingeloyi Ngambiliyele ukutontolola shimono

¹⁵ Ami Ndanyele oho namonene shimono nashingile kulimuka kutontoloka kwasho. Kubazumuka tuhu shuma sha kulifweka na muntu shemanine kumbili yami.

¹⁶ Nayuvwile lizu lya muntu hi lihana ha mushinzi wa Ulayi ngayi, “Obe Ngambiliyele, tontwelela owe mulume shimono shendi.”

¹⁷ Lingeloyi Ngambiliyele wezile na kwimana kwakwipi na noku nemanine, pe natinine shikuma naku wakufulumana na kukinka lupala hanci. Wambile kukwami ngayi, “Obe mwana muntu, yuvwishisha ngayi, kutontoloka kwa shimono shikwimanina shikati sha kukotoka.”

¹⁸ Aha ambilenga nawile hinga nafulumana kukinka lupala hanci, pe nalungukile ngoboni wankwatile na kunyimika,

¹⁹ niho ambile ngayi, “Nikuku monesha byuma bikaholoka bya wukali wa Nyambi, eshe bikekala kukotoka. Shimono shikwinika shikati sha kukotoka eshe Nyambi emikile mwaka.

²⁰ “Shikungwe wa mbelele uya wamona wa mashengo abili ukwimanina wene wa Mendiya na Pesha.

²¹ Shikungwe wa mpongo unengi wene wa Ngilishi, lishengo liya lyamenene mukati ka meho wendi linengi mwene wakutatika.

²² Mashengo anaa aya amenene ha kutatika, oho liya lishengo limo lyapokokakale, unengi wene wunaa uya ukafuminina ku matunga wendi, ngoboni wufwako kukashuma ngonehe wene wakutatika.

²³ “Pe ku kumana kwakulela kwa nowo wene wakakuma, oho bakuluwa bakabenkanya shikuma, kuka katuka mwene wa mutima wawukalu nawa mahalo.

²⁴ Ngovu zendi zikenga zazinene ngoboni kaliha mu ngovu zendi niyemwine. Ukaleta kunonga kwa kukomokesha na kwinga wakutwesha mu byuma nimwabyo akatenda. Ukalobesha bantu bangovu shikuma na ba kuyela mitima.

²⁵ Kushoshoka kwendi kuketabilisha ngayi kwongeza kutangame, pe ukalilundumika ngayi nengi wamunene. Ukalobesha bantu babengi kwa kubula ku batoshesha, ukalwisha Mwana mwene wa bana ba bamyene ngoboni ukalobeshiwa kwa kubula ngovu za muntu.

²⁶ Eshe shimono sha mazolo na lumenemene shinatontololiwi kukwobe sha kupwisha, ngoboni hinga ushamba ndaba shikashimba shikati shashitali hinga shabula ku moneka.”

²⁷ Kunyima yanebye ami Ndanyele nalungukile pe nakolele matena amengi. Niho napindukile na kuboka ku milimo eye ampanine mwene. Nakomokele ku shimono, nabulile ku yuvwishisha eshe shikutontoloka.