Ndanyele 6 - Libuka Lya Kuyela

Ndanyele mu Liteke lya Babimbwi

¹ Shawahilishile mwene Ndaliyashi kwimika batulela 120 kulela mu wene wendi.

² Niho ahatile Ndanyele na baminendi babili ngayi batwaminine batulela na kulama ebye akuwana mwene.

³ Ndanyele wamoneshele kutenda shiwahe mulimo kupitakana baminendi bakakutwaminina na batulela. Mwene wahanganikile kuyaka Ndanyele ha wukulwane wa wene nimwawo, ndaba wengile wa kanangatima.

⁴ Bakakutwaminina bamina na batulela bezekele kuwanina Ndanyele mulandu. Ndanyele wengile wa maleema kami kaliha watendelenga shuma sha shibi hinge Kubipisha.

⁵ Bambile ku baminabo ngayi, “Hinga mwaka tukatanga kukawana shuma shamina sha kuyatishila Ndanyele ndele shinge shuma shinakundama ku ndayano za Nyambi yendi.”

⁶ Bakakutwaminina na batulela bayile hamo na ku mona mwene, pe bambile ngayi, “Obe Mwene ya Ngoma, mwanga uyoyenga mwaya myaka.

⁷ Bakakutenda mulimo mu wene wobe, bakakwendesha mulimo wa batulela, babanene na bankongo banaliyuvwashana. Mwene ya Ngoma uku fwanina kwimika ndayano na kukandamika ngayi ha matena makumi ahatu kowa muntu ukwitabilishiwa kunyepa shuma kuli Nyambi hinge ku muntu ndele tuhu kukwobe. Muntu nimwendi wakukiluka zino ndayano ukayumbiwila mu liteke lya babimbwi.

⁸ Haya shashiwahe obe Mwene ya Ngoma yimika zino Ndayano kuzitikita na kuyakaho limango, pe nizo zikenga za ku shuma, ngonehe ku ndayano za Bamende na Bapesha, eze zabulile kutwesheka kufutuliwa.”

⁹ Mwene Ndaliyashi wayakile limango ha ndayano zatikitiwile.

¹⁰ Oho Ndanyele alimukile ngayi ndayano zinayakiwi limango, wayile ku litala lyendi. Mu kampenci ka mu litala lya kuyilu mwekalile mampananga awa apenzele ku Yelushalema. Bikati bihatu ha mutena, washinkamininenga hanci na kulombela kukambilila kuli Nyambi wa Makunge ngonehe shiya atendele ha kutatika.

¹¹ Baya babilolo bayile hamo, bawanine Ndanyele ha lombela kuli Nyambi ngayi amuyavwe.

¹² Nimwabo bayile hamo kuli mwene na kwamba nendi ha ndayano zendi ngayi, “Obe mwene ya Ngoma, kati kaliha wayaka limango ha ndayano likwamba ngayi, ha matena makumi ahatu muntu enge yani wakunyepa shuma kuli nyambi washenge hinge ku muntu washenge ndele tuhu kukwobe, uku fwanina kuyumbiwila mu liteke lya babimbwi ndi?” Mwene wakumbwile ngayi, “Ee, ndayano za ngovu ngonehe ndayano za Bamende na Bapesha, eze za kubula kutwesha kufutuliwa.”

¹³ Batongwezele mwene ngayi, “Ndanyele, muntu umo ha bantapwa bafumine ku Yunda, kaliha wakulemeshanga obe mwene ya Ngoma hinge kwombatala ndayano eze wemikile. Walombelanga kahatu ha mutena.”

¹⁴ Oho mwene ayuvwile eshe, wayenene shikuma pe wezekele kuhanganika nzila ya kupulwisha Ndanyele. Wazaminine kwezeka kukuma na kukulela kwa mutena.

¹⁵ Niho babilolo babokele hamo kuli mwene pe bambile kukwendi ngayi, “Obe mwene ya Ngoma ukulimuka ngayi kwezekesha ngonehe ku ndayano za Bamende na Bapesha, kowa ndayano zinemikiwi na mwene za kutwesha kufutuliwa.”

¹⁶ Mwene Ndaliyashi wambile ngayi Ndanyele atwaliwe na kumuyumbila mu liteke lya babimbwi. Wambile kuli Ndanyele ngayi, “Mwanga Nyambi yobe ou ukutendela milimo mukwoloka akulamwine.”

¹⁷ Baletele limanya na kulyandumwina ku liteke. Mwene wayakile limango lya wene na limango lya bantu bendi babalemu ha limanya ngayi kowa muntu wakutwesha kulamwina Ndanyele.

¹⁸ Mwene wabokele ku musheke, wakalanganine na kubula kulya na kubula kumuletela bya kumubulisha wuli. Kami kaliha watweshele kulangana tulo.

¹⁹ Kushili tuhu kuya shwee mwene Ndaliyashi wapindukile naku nyankupila ku liteke.

²⁰ Oho akumine kwakwipi wabilikizile na bowa ngayi, “Obe Ndanyele, mukamulimo wa Nyambi wakuyoya. Kati Nyambi ou walemeshanga mu kupwisha unatweshe kukulamwina ku babimbwi ndi?”

²¹ Ndanyele wakumbwile ngayi, “Obe Mwene ya Ngoma, mwanga uyoye mwaya myaka.

²² Nyambi unatumu lingeloyi lyendi mu ku shinka ku tunwa twa babimbwi ngayi mwanga babule kundemeka. Obe Mwene ya Ngoma, Nyambi watende eshe ndaba nabulile mulandu ku meho wendi, kami kaliha nabipishile kukwobe.”

²³ Mwene Ndaliyashi wawahililile na kuyaka ndayano ngayi Ndanyele afumishiwe mu liteke. Niho bamufumishilemo na kuwana ngayi kaliha walemanine ndaba wakulupilile muli Nyambi.

²⁴ Mwene watongwezele bantu nimwabo aba bayatishilenga Ndanyele ngayi bakayumbiwile mu liteke lya babimbwi, hamo na bakazabo na bana babo. Babimbwi babakwatile naku bapokozola bifupa byabo nimwabyo, oho shilolo ba kume ku nceto ya liteke.

²⁵ Mwene Ndaliyashi watikitile ku bantu nimwabo bamu matunga na mishobo nimwayo na zindimi za hano hanci ngayi, “Ku mwena kuhanye mukati kenu!

²⁶ Nikutuma ndayano ngayi mu litunga lyami nimwamo, muntu nimwendi uku fwanina kutina na kulemeeka Nyambi wa Ndanyele, niye Nyambi wakuyoya, na kulela mwaya myaka. Wene wendi ukabula kulobeshiwa, kami ngovu zendi kukamana zifwako.

²⁷ Walamwinanga na kupulwisha, watendanga bilimukisho na bikomokesho muyilu na hano hanci. Unalamwini Ndanyele ku ngovu za babimbwi.”

²⁸ Ndanyele watangamine oho Ndaliyashi engile mwene, na Shilushi oho engilenga mwene wa Bapesha.