Ndanyele 3 - Libuka Lya Kuyela

Nembukandineza ukutongweza bantu nimwabo kulemesha kanankishi ka ngolinde

¹ Mwene Nembukandineza watendele kanankishi ka ngolinde, mu mwimo wako wengile wa mamita 27 na mamita ahatu mu lupati, pe wamwimikile mu mbuwa ya Ndula, mu shiketu sha litunga lya Mbambiloni.

² Niho Mwene Nembukandineza atuminine bakakwimanina bendi nimwabo ngayi ba kunguluke hamo, bana ba bamyene na mwanashihemi na bamanduna na babilolo na bene minzi na batulela na batulela bakulundaminako na bankongo na bakakulama zimfuma za mali na bakakuyata na babilolo bamina nimwabo bamu matunga. Nibo bezile mu kuyuvwa kukufunguliwa kwa kanankishi aka emikile Mwene Nembukandineza.

³ Oho aba babilolo nimwabo ba mu matunga bakungulukilile ku mazu na kwimana kumbili ya kanankishi.

⁴ Shilolo wabilikile na lizu lyalinene ngayi, “Enu bantu ba matunga na mishobo na zindimi, tukumitongweza ngayi,

⁵ oho mukayuvwa kuvuma kwa zimpandula na bakakumbeta tumbuli na zingoma na bilimba na tunamutolilo na byamina bya kuleta mushumina. Pe mu ku fwanina kufunkama hanci na kulamba ha kulemesha kanankishi ka ngolinde uya anemiki Mwene Nembukandineza.

⁶ Kami ou wakukana kufunkama na kulamba na kulemesha bakamuyumbila mu mundilo wakulasheka.”

⁷ Pe haya, oho bayuvwile tuhu kuvuma kwa mpandula na kanamutolilo na kalumbu na kambuli na nimwabyo bya mushumina, bantu nimwabo na matunga na zindimi bafunkamine na kulamba ha kulemesha kanankishi ka ngolinde uya emikile Mwene Nembukandineza.

Bayunda bahatu ba kuyatishiwa ha kubula kwombatala

⁸ Ha shikati shiya bene Bakambambiloniya bayile kuli mwene na ku shimika Bayunda.

⁹ Bambile kuli Mwene Nembukandineza ngayi, “Obe Mwene ya Ngoma uyoyenga mwaya myaka.

¹⁰ Mwene ya Ngoma wemika ndayano ngayi oho yikutatika kuvuma mpandula na kalumbu na mashokomba na kambuli na kanamutolilo na mbetelo nimwayo ya kutenda mushumina muntu nimwendi ukufunkama na kulamba ha kulemesha kanankishi ka ngolinde.

¹¹ Kami ou nimwendi wakukana kufunkama na kulamba ha kulemesha, ukayumbiwila mu mundilo wakulasheka.

¹² Kuli Bayunda bamo aba wayakile mu wukulwane wa litunga lya Mbambiloni, ba Shandiliki na Misheki na Ambendinengo. Nibo banakana kwombatala mazu a Mwene ya Ngoma. Kami ba kukana kulemesha nyambi yobe, hinge kufunkama na kulamba kuli kanankishi ou unemiki.”

¹³ Mwene wakatukile na wukali na kutongweza aba balume bahatu ngayi baletiwe hambili yendi. Niho baletele aba balume kuli mwene.

¹⁴ Nembukandineza wambile kukwabo ngayi, “Obe Shandiliki nanenu Misheki na Ambendinengo, kati eshe sha shikuma ngayi mwakana kulemesha nyambi yami nakufunkama na kulamba ku kanankishi ka ngolinde ou nemika ndi?

¹⁵ Hayaboni, mwayuvwa tuhu kuvuma kwa zimpandula na kanamutolilo na kalumbu na kambuli na zingoma na nimwabyo bya kumbeta byamina funkamenu na kulamba ha kulemesha kanankishi. Ndi mu kukana, bakamiyumbile mu mundilo wakulasheka. Kati mu kuhanganika ngayi kuli nyambi ukutwesha kumi lamwina ku maboko wami?”

¹⁶ Shandiliki na Misheki na Ambendinengo bakumbwile ngayi, “Obe Mwene ya Ngoma, kutwesha kukukumbula mu shambo eshe tufwako.

¹⁷ Ndi shili noho Nyambi owe twalemeshanga ukutwesha kutulamwina ku mundilo wakulasheka na kutulamwina ku ngovu zobe obe mwene.

¹⁸ Ngoboni ndi kaliha noho, Obe mwene ya Ngoma, limuka nehe ngayi kukalemesha ba nyambi bobe tufwako hinge kulemesha na kufunkamina kanankishi ka ngolinde uya wemika tufwako.”

Bahoni ba Ndanyele bahatu ba kuyatiwila kufwa

¹⁹ Niho Nembukandineza apilamine shikuma, pe lupala lwendi lwafutukile kufubila na kukalihila Shandiliki na Misheki na Ambendinengo. Walayile bantu bendi ngayi bahambize mundilo wakulasheka bikati mutanu na bibili ngayi linge lya kuyekula shikuma kupitakana shikati nimwasho.

²⁰ Pe watongwezele bantu bendi ba kushuma shikuma banzita yendi ngayi bamange aba balume bahatu bakabayumbile mu mundilo wakulasheka.

²¹ Nohobene babamangile na bya kuvwala byabo na bikobelo byabinene na tuhoshi na nimwabyo, pe babayumbilile mu mundilo wakulasheka.

²² Haya ndaba ya kutumiza kwa mwene kwengile kwakukalu kami mundilo wakulasheka wayekwile shikuma milangi yahokeshele baya balume babayumbilile mu mundilo wakulasheka.

²³ Nohobene Shandiliki na Misheki na Ambendinengo bawililile mukati ka mundilo wakulasheka hinga bamangiwa.

²⁴ Niho Nembukandineza akomokele pe wakatukile wanguwangu. Wepwile bankongo bendi ngayi, “Kati kaliha twamanga balume bahatu na kubayumbila mu mundilo wakulasheka ndi?” Nibo bakumbwile ngayi, “Ingoi, obe mwene ya Ngoma nisho twatenda.”

²⁵ Niho akumbwile ngayi, “Ngoboni monenu, Niku mona balume banaa hibenda na kuzinguluka mu mundilo, bakubula kumanga na kubula kuhoka, pe wawunaa hakati kabo uku moneka ngo mwana banyambi.”

Ba Yunda ba kushoboloka na kukulishiwa

²⁶ Niho Nembukandineza ahenyenene kwakwipi na shipana sha mundilo wakulasheka pe wehanine ngayi, “Obe Shandiliki na Misheki na Ambendinengo enu bakamilimo ba Nyambi Wakukangana. Fumenu mu mundilo.” Pe bafuminemo wanguwangu.

²⁷ Bana ba bamyene nimwabo na mwanashihemi na bamanduna na bankongo bakungulukile mu ku mona balume aba, babulile kuhoka ku mundilo. Huki zabo zabulile ku babuka, bivwalo byabo byabulile kuhoka, babulile hinge kunuka mubabu wa mundilo.

²⁸ Mwene Nembukandineza wambile ngayi, “Kuyemeziwe Nyambi ya Shandiliki na Misheki na Ambendinengo, ou natumu lingeloyi wendi na kupulwisha balume aba bamulemeshanga na kumukulupila. Babulile kwombatala ndayano za mwene na kuleyekamo wumi wabo kupitakana kutendela na kulamba ku nyambi washenge ndele tuhu wabo.

²⁹ Nohobene haya nikupanika mazu awa ngayi, muntu nimwendi ku matunga nimwawo, hinge lulimi lwa kwamba bya kuhandula Nyambi wa Shandiliki na Misheki na Ambendinengo, ukapampoliwa na litala lyendi likashiwululiwa. Ndaba kowa Nyambi wamina watweshanga kulamwina mu nzila eye.”

³⁰ Niho Mwene akatwile Shandiliki na Misheki na Ambendinengo ku myanya yayinene mu litunga lya Mbambiloni.