Ndanyele 2 - Libuka Lya Kuyela

Mulo wa Nembukandineza

¹ Mu mwaka wawubili wakulela kwendi, Nembukandineza walotele milo, pe mutima wendi wakabakanine shikuma wabulile kulala.

² Niho mwene ehanine bakakwawula na bakamalele na bambuki na bankongo ngayi beze mu kulubulula mulo wendi. Oho bezile na kwimana kumbili ya mwene,

³ Mwene wambile kukwabo ngayi, “Naloto mulo ou, kami uli na kunkabakanisha. Nikushinga kulimuka eshe ukutontoloka.”

⁴ Nibo bakumbwile mwene mu Shialamayika ngayi, “Obe Mwene ya ngoma, yoyanga mwaya myaka. Tutongweze mulo wobe, pe tuka utontolola kukwobe.”

⁵ Mwene wambile ku bankongo ngayi, “Eshe nisho shenga shifungo shami ngayi ndi kutwesha kuntongweza eshe naloto na neshe ukutontoloka mufwako, nikamishanyozola hanihani na ku nyemona matala wenu kwinga malala a limvu.

⁶ Ngoboni ndi mu kutwesha kuntongweza mulo na kutontoloka kwawo, nikamiyana na bishemo na kumi lemeeka shikuma. Hayaboni, ntongwezenu eshe naloto na kutontoloka kukwami.”

⁷ Bakumbwile kuli mwene kami ngayi, “Hekulyetu shinga natongweze bakamilimo bendi mulo tuka utontolola.”

⁸ Niho mwene akumbwile ngayi, “Mu kuyandisha shikati shenu. Enu muli na kwezeka kuwana shikati, ndaba munalimuku bihanganiko byami ngayi bya kupwisha kami nikashitenda.

⁹ Ndi kuntongweza mulo mufwako nimwenu mukapanikiwa mulandu umo. Munaliyuvwashana kuntongweza bya ku shanwisha na byuma bya kuluwa hantu shikati shinapiti. Haya ntongwezenu eshe naloto pe niho nikalimuke ngayi kati mu kutwesha kuntongweza kami eshe ukutontoloka.”

¹⁰ Bankongo bakumbwile mwene ngayi, “Kowa muntu wahano hanci wakutwesha kutongweza Mwene ya Ngoma ebye akushinga kulimuka. Kowa mwene, hingebene wamunene shikuma na wangovu shikuma, hinga atanga kwipula ku bakakwawula bendi, hinge bakamalele, hinge Bankongo.

¹¹ Ebye akwipula mwene ya Ngoma byabikalu shikuma, kowa muntu wakutwesha ku shiholola kuli mwene ndele tuhu banyambi, babula kuzika mukati ka bantu.”

¹² Eshe shapilamishile mwene shikuma pe walayile ngayi bankongo nimwabo ba ku wene wamu Mbambiloniya bazihiwe.

¹³ Nohobene ndayano zabilikiwile ku bantu nimwabo ngayi bakakukeya bazihiwe. Bantu bayile na kushinga Ndanyele na baminendi ngayi bazihiwe.

Nyambi Ukutongweza Ndanyele Eshe Ukutontoloka Mulo

¹⁴ Niho Ndanyele akumbwile na kukeya na ngana Aliyoki, Ou wengile mukulwane wa bakakulama ou kami watongweziwile, ou walayiwile ngayi aye mu kuziha bakakukeya mu Mbambiloniya.

¹⁵ Niho Ndanyele ayile kuli Aliyoki mukulwane wabakakulama wapanikiwile mulimo wakuziha ba kukeya mu Mbambiloniya na kwambola nendi kunkumo ngayi, “Kati shumangani eshe mwene anayakili ndayano zanehe?” Aliyoki watongwezele Ndanyele nimwabyo byatendiwile.

¹⁶ Ndanyele wayile wanguwangu kuli mwene pe wanyepele shikati ngayi niye mwanga atweshe kutongweza mwene eshe ukutontoloka mulo.

¹⁷ Niho Ndanyele ayile ku litala lyendi mu kutongweza baminendi Hananiya na Mishayela na Azaliya eshe shatendiwile.

¹⁸ Ndanyele wabatongwezele kulambilila kuli Nyambi wa muyilu kwinga wa nceshe shikuma na kutontolola bya kukomokesha kukwabo ngayi mwanga babule kuzihiwa hamo na bankongo bamu Mbambiloniya.

¹⁹ Niho uya wushiku bya kukomokesha byamonekele kuli Ndanyele mu shimonekesho, pe wayemezele Nyambi wa muyilu.

²⁰ Ndanyele wambile ngayi, “Liyemeziwe lizina lya Nyambi mwaya myaka, ngana na ngovu byenga byendi.

²¹ Niye wafutulanga bikati na myaka, wayakanga bamyene ha matanda na kufumisha bamyene. Wapanikanga ngana ku ba kukeya.

²² Wahololanga byuma bya ku nceto na bya kuholama, kami walimukanga bya mu mincimpwe, kami wazingulukiwa na liyeye.

²³ Nikukukambilila naku kuyemeza Obe Nyambi ya batate. Obe unampana ngana na ngovu, unahololo kukwami ebye twanyepa kukwobe, unatutongweze mulo wa mwene.”

Ndanyele ukunungwilila Mwene Mulo na Kuwutontolola

²⁴ Niho Ndanyele ayile kuli Aliyoki ou emikile mwene kuziha bakakukeya mu Mbambiloni, pe wambile kukwendi ngayi, “Hinga uziha bakakukeya mu Mbambiloni. Ntwalenu kuli mwene, pe nikamutongweza kutontoloka kwa mulo wendi.”

²⁵ Niho Aliyoki wanyankupishile Ndanyele ku mutwala ku meho a mwene pe watongwezele mwene ngayi, “Nawana ngayi umo ha bantapwa ba Bayunda ukutwesha hekulu kutontolola mulo wobe obe mwene ya Ngoma.”

²⁶ Mwene wambile kuli Ndanyele (ou watumbiwile ngayi Mbeleteshaza) ngayi, “Ukutwesha kuntongweza ebye na loto na kutontoloka kwawo?”

²⁷ Ndanyele wakumbwile ku meho a mwene ngayi, “Obe mwene ya Ngoma, kowa wakukeya, mukamalele hinge mukakwaula hinge mukakulaba nyenye ou ukutwesha kukutongweza eshe.

²⁸ Ngoboni kwali Nyambi wa muyilu niye ukuholola bya kukomokesha niye unatongweze hekulyetu Mwene Nembukandineza, ebye bikamoneka kumbili. Mulo na shimonekesho sha biya wamonene oho hinga walala ha wulili byenga ebye.

²⁹ Obe mwene ya Ngoma oho walanganine, walotele byuma bya kulimba, pe ebye nibyo Nyambi unahololo bikamoneka kumbili.

³⁰ Nehiboni ami shikomokesho eshe shinahololiwi kukwami kaliha ndaba nenga mukangana kupitakana muntu nimwendi, ngoboni ngayi obe mwene ya Ngoma mwanga ulimuke kutontoloka kwa mulo wobe na kuyuvwishisha bihanganiko biya byeza mu mutima wobe.

³¹ “Obe mwene ya Ngoma, mu mulo wobe wamonene kumbili yobe hinga kwemana mwimo wa kanankishi, wa kubyazima na kubesha na kutinisha ha kumupenza.

³² Mutwe wendi wafuliwile ha ngolinde yayiwahe. Kapumpo kendi na mikoko yendi byafuliwile ha shiliva, lukanda lwendi na zintungi zendi byafuliwile ha lubemba.

³³ Mawulu wendi afuliwile ha byondo, pe bikamba byendi byengile mbalila eye byondo na mbalila yamina lima.

³⁴ Oho wamupezelenga, limanya lyalinene lyapabukile lya kubula kukwata muntu pe lya kamine ku bikamba bya shondo na lima lya ku bikamba bya mwimo wa kanankishi, ku bicancola.

³⁵ Na wanguwangu kami shondo na lima na lubemba na shiliva na ngolinde byacancokele na kwinga muhungahunga waha likotwelo lya mayinza. Mpepo yabipepwile nimwabyo hashalile howa. Ngoboni limanya lya kulile kwinga lipili lyafwikile ha kaye nimwaho.

³⁶ “Owe niwo mulo. Haya obe mwene ya Ngoma nika kutontwelela eshe ukutontoloka.

³⁷ Obe mwene ya Ngoma wenga uli wamunene shikuma kupitakana bamyene nimwabo. Nyambi wa muyilu nakwingishi mwene wamunene naku kupana ngovu na nyala na maleema.

³⁸ Nakwingishi kalela wa nimwabyo byazika mu kaye na batuyamana nimwabo na tuyoni. Unengi mutwe wa ngolinde.

³⁹ Ku nyima yobe kukekala wene wamina, kaliha ukenga wawunene ngonehe wobe, ku nyima ya wene wawuhatu wa lubemba, owe ukalela kaye nimwako.

⁴⁰ Niho kami kukekala wene wawunaa, ukenga wakushuma ngonehe shondo. Ndaba shondo sha cancolanga byuma, niwo ukacancola wene nimwawo wamina.

⁴¹ Ngonehe shiya wamonene ngayi bikamba na manyenca byengile mbalila eye ya lima na mbalila yamina ya shondo. Eshe shikutontoloka ngayi kukekala kutapuluka kwa wene. Ngoboni kukekala shuma shimo sha kushuma mukati kasho ngonehe shondo, ndaba kwekalile shondo sha kulifungila na lima.

⁴² Manyenca awa anengi mbalila yamina ya shondo na mbalila ya lima, bikutontoloka ngayi mbalila yamina ya wene uyo ukenga wakushuma, mbalila yamina ya wene yikenga ya kupopa ngonehe lima.

⁴³ Ngonehe wamonene ngayi shondo shalifungilishile na lima. Eshi shikutotoloka ngayi bantu bakalifungila umo na wamina ha kuliyekela, ngoboni kukatwesha kulikwata hamo bafwako, ngonehe bene shiya shondo shikubula kulifungila na lima.

⁴⁴ Kami ha shikati sha bamyene bakalelenga, Nyambi wa muyilu ukemika wene uya ukenga hinga mwaka ukatanga kunonga hinga kukapanikiwa ku bantu bamina. Wene uyo ukancancola na kunongesha owo wene nimwawo wamina na kuwu manisha, pe niwo ukekala mwaya myaka.

⁴⁵ Ngonehe wamonene ngayi limanya lyapabuliwile ku lipili kwakubula liboko lya muntu wamina wakukwatako, kami lyacancwele shondo na lubemba na lima na shiliva na ngolinde. Nyambi wamunene unakutongweze obe mwene ya Ngoma ebye bikatendiwa kumbili. Nakutongweze ou mulo shiwahewahe, pe kami kutontoloka kwawo kunengi kwa kupwisha.”

Mwene ukuyana Ndanyele

⁴⁶ Niho Mwene Nembukandineza alambile na lupala hanci kumbili ya Ndanyele wambile ngayi nkombela na incence bitupuliwenga kukwendi.

⁴⁷ Mwene wambile kuli Ndanyele ngayi, “Mwa shikuma, Nyambi yobe nengi Nyambi wa banyambi nimwabo na Hekulu wa bamyene kami ou wahololanga bya kuwi, ndaba unatweshe kuholola ebye bya kuwi.”

⁴⁸ Niho mwene apanikile Ndanyele maleema amanene, wamupanikile zintupu zazingi, wamwimikile kwinga kalela wa mukulwane mu litunga lya zinguluka Mbambiloni. Pe wamuyakile kwinga mukulwane wa bankongo nimwabo ba kukeya ba Mbambiloni.

⁴⁹ Ha kunyepa kwa Ndanyele, mwene wayakile kami Shandiliki na Misheki na Ambendinengo mu wukulwane wakupenza byambo bya mu liziko lya Mbambiloni, ngoboni Ndanyele wekalile mu shipango sha wene.