Ndanyele 11 - Libuka Lya Kuyela

¹ Mu mwaka wakutatika wakulela kwa Ndaliyashi wa Kamende, nemanine kumushumankanisha na kumuyavwa.

² Nikukutongweza kupwisha. “Mona, kushili bamyene bahatu aba bakalela mu Pesha, pe kukeza wawunaa, uya ukenga wakuheta shikuma kupitakana bamina nimwabo. Oho wengakale wa ngovu ndaba ya wuheti wendi, ukalwisha wene wa Ngilishi.

Wene wa Engepita na Shiliya

³ Niho kukaholoka mwene wakukanca, ou ukalela na ngovu zazinene pe ukatenda omu akushingila.

⁴ Oho ngovu zendi zaneneha kale, wene wendi ukashandoka na kutapiliwa mu zimbalila zinaa. Bamyene babulile kwinga bazukulyendi bakamushwana, ngoboni bafwako kukekala na ngovu nehi niye.

⁵ “Mwene waku Engepita ukenga wakushuma. Umo waha bakulwane bendi banzita, ukenga wakushuma shikuma kumupitakana, pe ukalela wene wendi na ngovu zazinene shikuma.

⁶ Kwakapita myaka bakatenda shikonzi, mwene wamu Engepita ukayekiwisha mwanendi kuli mwene wamu Shiliya. Ngoboni shikonzi shabo kukashuma shifwako, pe niye ngovu zendi kukehala zifwako, tatiyendi na uya wamuyavwile na mwanendi na bakamilimo aba bayile nendi bakazihiwa.

⁷ “Nihoboni umo waha lupashi lwa mwene waku Engepita ukenga mwene, ukalwisha bakanzita ba mwene wamu Shiliya ou wekalile ku ncelele na kwingina mu minzi yayinene na ku bakoma.

⁸ Ukashimba banyambi babo na tunankishi twabo twa byondo, hamo na byuma bya ndando yayinene bya ngolinde na bya shiliva na kubitwala ku Engepita. Kwakapita myaka ukashiya mwene waku ncelele ninkayendi

⁹ pe mwene wamu Shiliya ukalwisha Engepita, ngoboni ukaboka ku litunga lyendi.

¹⁰ “Bana ba mwene waku ncelele babalume bakaliwahishila bya nzita na kuloba nzita yayinene ngonehe libazi lya mema na kuya mu kulwisha kamalamo kendi kukakuma naku shipata shendi.

¹¹ Niho mwene waku mabukubuku ou mwene wamu Engepita ukakaliha shikuma na kulwisha mwene waku ncelele, ou ukaloba nzita yendi yayinene shikuma ngoboni yikakomiwa.

¹² Oho bakanzita babakwata kale, mwene ukaliyemeza ha kukoma kwendi naha bakanzita babengi azihile, ngoboni kukazamina kwinga mukakukoma wufwako.

¹³ Mwene wamu Shiliya ukaloba bakanzita babengi kupitakana baya ekalile nabo ha kutatika. Oho kwapita kale myaka yimo, ukaboka na nzita yayinene yili na bilwisho byabingi.

¹⁴ “Ha noyo myaka bantu babengi bakafutulukila mwene wamu Engepita. Balume bamina ba mushunga hakati ka bantu bobe Ndanyele bakabafutulukila kwinzalishilila shimono, ngoboni bakakomiwa.

¹⁵ Niho mwene wamu Shiliya ukeza ku shipata sha lukena na kulukoma. Bakanzita ba mu Engepita kukazamina kulwa bafwako, hingebene bakanzita babo ba kushuma bafwako kukekala na nyala.

¹⁶ Mukanzita wa Kaashiliya ukatenda nabo ngonehe omu akushingila, kowa muntu ukatwesha kwimana na kumulwisha. Ukemana mu Litunga lyaliwahe, pe ukekala na ngovu za kulinongesha peluu.

¹⁷ Mwene ukayongola kwiza na bakanzita bendi nimwabo. Niho akatenda shikonzi na mwene waku mabukubuku. Ukayekiwisha mwanendi kukwendi ngayi awane nzila ya kukoma wene ngoboni bifungo byendi kukatwesha bifwako.

¹⁸ Kunyima yanebye ukapenzesha lupala lwendi ku mikoka ya ku liwate pe ukakomako babengi, ngoboni mukulwane wa bakanzita ukamukoma na kumanisha kulitemba kwendi. Mwa shikuma ukabwesha kulitemba kwa mwene wa Shiliya hahendi.

¹⁹ Niho ukapenzesha lupala lwendi ku shipata sha ku litunga lyendi, ngoboni ukapukala na kuwa, pe kuyo kukenga kumana kwendi.

²⁰ “Ncwana yendi ukatuma mukakutelesha mu kuvulisha wuheti wamu wene wendi. Mu myaka yayishe ou mwene wamupya ukazihiwa, ngoboni kaliha mwana ncanana hinge mu nzita.”

Mwene wa Shiliya wamubi

²¹ Lingeloyi lya twalilileho kutontolola ngayi, “Mwene wamupya wa Shiliya ukenga wa lihandu, kaliha wafwanina kwinga mwene. Ukeza ku litunga mu kubazumuna na kuka koma wene mu likeyelela.

²² Bakanzita babengi ukabanongesha peluu na mukulwane wa bakankombela nimwabo wa Nyambi ukanongeshiwa.

²³ Matunga amengi akatenda nendi shikonzi akongeziwa, ukaneneha shikuma hinge ngayi ukulela tuhu litunga lyalishe.

²⁴ Ukabazumuna litunga lya kuheta oho bali mu wulube, pe ukatenda byuma biya babulilenga kutenda batatizendi hinge bankakazendi. Ukatapila ntutu hakati ka bantu bendi bya lipuku liya apukwile mu nzita. Ukafunga mwakulwishila bipata, ngoboni kashikati tuhu kakashe.

²⁵ “Mwene waku Shiliya ukaya mu kushonkomona nzita yayinene kuya mu kulwisha mwene wamu Engepita. Mwene waku Engepita ukaliwahisha kubweshela kulwa nzita yayinene na banzita babengi shikuma ngoboni bakamwongeza, pe afwako kukatwesha kuka koma.

²⁶ Bankongo bendi aba alyanga nabo bakamubipisha. Bakanzita bendi babengi bakazihiwa, kami banzita bendi babengi bakanongeshiwa peluu.

²⁷ Kunyima yanebye aba bamyene babili bakekala na kulya ku tebulu yimo, ngoboni bakalihanganikila byabibi, pe bakamba mahalo umo na wamina. Kukawana ebye bashinga bafwako, ndaba mamaninino ashili kwiza ku shikati shemikiwile.

²⁸ Mwene wamu Shiliya ukaboka ku litunga lyendi na wuheti wawingi, ngoboni niye ukashinga kulobesha kulimama kwa kuyela, pe ukatenda mwaya shifungo shendi.

²⁹ “Ku shikati sha kwimikiwa ukalwisha Engepita kami, ngoboni byuma kukenda mu nzila eye byekalilenga mwaka bifwako.

³⁰ Mato a nzita aku Kitimu akeza na kumuvulanganya, pe ukatina. Niho ukaboka mu wukali na kushinga kunongesha kulimama kwa kuyela, niye ukakonka kubela kwa baya banakana kulimama kwa kuzila.

³¹ Bakanzita bendi bamina bakakatuka na Kubipisha myanya ya kuyela mu Litala lya Nyambi. Bakakanisha zinkombela za ha mutena ha mutena na kuyaka bya wunyengwe biya biku bipisha Litala lya Nyambi.

³² Mwene ukaliyavwisha mahalo kuwana ngovu kuli bayo banakiluku kulimama kwabo, ngoboni bantu aba ba kulimuka Nyambi yabo bakashuma na kumukana.

³³ Obo ba kukeya hakati kabo bakafundiziza bantu babengi. Ha shikati shashishe bakazihiwa na mukwale hinga mundilo, kami bamina bakakwatiwa na kubenga bantapwa.

³⁴ Bakawana kuyavwiwa kwakushe oho bakalituntula, hinge ngayi babengi bakalifungila nabo bakubula kupwisha.

³⁵ Bamo ku baya ba kukeya bakazihiwa, ngayi mwanga bayeleshiwe na kubengisha bakubula libala hantu mamaninino anakumu, ndaba shika kumina shikati shiya Nyambi anemiki.

³⁶ “Mwene wa Shiliya ukatenda ngonehe eshe akushinga. Ukaliyemeza ngayi nengi wamunene kupitakana banyambi nimwabo hinge kupitakana Nyambi ya banyambi. Ukatwesha kutenda ebye hantu shikati sha wukali wa Nyambi shinamana. Nyambi ukatenda byuma nimwabyo ebye anemiki.

³⁷ Mwene ukabula kulemeeka banyambi baya balemeshelenga batatizendi na nyambi ou bashinga kulemeeka bambuyama. Mwa shikuma ukakana hinge banyambi nimwabo, ndaba ukahanganika ngayi niye nengi wamunene shikuma kupitakana.

³⁸ Hakati kabo ukulemeeka tuhu nyambi ou walamanga bipata. Ukapana ngolinde na shiliva na bya kuliyenga na mamanya a ndando na bishemo byamina byabiwahe kuli nyambi ou babulile kulemesha batatizendi.

³⁹ Niye ukalwisha bipata bya ku shuma shikuma, na kuyavwiwa kwa nou nyambi washenge. Ukanuka baya bana mu yavwa, ukabenga batulela ba bantu babengi pe ukatapila litunga kwinga ncuungu yabo.

⁴⁰ “Ha shikati sha mamaninino, mwene waku Engepita ukalwisha mwene waku shiliya. Ngoboni mwene waku Shiliya ukabwesha kumulwisha ngo nkuli na makoloyi na bakanzita banakandama ha bambishi na mato amengi amanene a nzita. Niho mwene waku Shiliya ukengina mu matunga amengi ngonehe libazi.

⁴¹ Ukakatukila mutakwe Litunga lyaliwahe na kuziha bantu makulukazi amengi. Ngoboni matunga a Endoma na Mowambi na bakakutwaminina litunga lya Amoni bakapanza ku liboko lyendi.

⁴² Niye ukanenehesha ngovu zendi na kulwisha matunga amengi, hinge noho Engepita kukapanza wufwako.

⁴³ Ukalishimbila wuheti nimwawo wa ngolinde na shiliva wamu litunga lya Engepita. Ukakoma litunga lya Limbiya na Etopya.

⁴⁴ “Ngoboni mbuzi yikufuma ku mushamuko naku ncelele bikamutinisha, pe ukapilama na kulwa shikuma, ukaziha bantu babengi.

⁴⁵ Ukemika zintanda zendi zazinene za wene mukati ka mawate ku lipili lyaliwahe lya kuyela, pe ukalobeshiwa, kami kowa muntu ukamuyavwa.”