Ndanyele 1 - Libuka Lya Kuyela

Bandumbana mu Shinzanza sha Nembukandineza

¹ Mu mwaka wa wuhatu wa kulela kwa Yehoyakimu wa Yunda, Mwene Nembukandineza wamu Mbambiloni wezile ku Yelushalema na kuzinguluka lukena.

² Nyambi ya Ngula walehele Nembukandineza kukwata Yehoyakimu mwene waku Yunda na kushimba byuma mu Litala lya Nyambi. Wabitwalile ku litala lya banyambi bendi mu Mbambiloni, pe wayakile byuma mu shikongelo sha ku litala lya nyambi yendi.

³ Niho Mwene atongwezele Ashipanazi shilolo wendi wa mukulwane, kuleta hakati ka bantapwa ba Baishalela bandumbana bamo baku ba lupashi lwa wene na ku ba lupashi lwa babalemu.

⁴ Bandumbana bakubula muhendo babawahe, bawutungu ku ngana, ba kufunda shiwahe na kanyangunyangu kakulilongesha, banakokoko kutenda mulimo ku musheke wa Mwene. Ashepanazi wabalongeshelenga kulaba na kutikita mu lulimi lwa ba Mbambiloniya.

⁵ Mwene wabatongwezele kulyanga byakulya bya ha mutena ha mutena byakulya bimo alilenga Mwene na waine anwinenga niyemwine mwene. Ha kumanisha myaka yihatu ya kufunda okwe bakamoneke kumbili ya mwene.

⁶ Hakati ka baya bahatiwile bengile Ndanyele na Hananiya na Mishayela na Azaliya, nimwabo aba bengile ba Yunda.

⁷ Shilolo wa mukulwane wabatumbile mazina, Ndanyele ngayi Mbeleteshaza na Hananiya ngayi Shandiliki na Mishayela ngayi Mesheki na Azaliya ngayi Ambendinengo.

⁸ Ndanyele waliyatile niye mwine mu mutima wendi ngayi kulizilulula na byakulya alyanga mwene hinge na waine anwanga mwene wufwako. Ndanyele wepwile Ashepanazi shilolo wa mukulwane kumwitabilisha ngayi hinga alibipisha mu nzila eye.

⁹ Nyambi wapanine Ashepanazi kuyamiziza Ndanyele na kumuyuvwila nceshe.

¹⁰ Ngoboni Ashepanazi watongwezele Ndanyele ngayi, “Nili na bowa wakutina hekulyami mwene, ou wamipana byakulya byenu na bya kunwa byenu, ndi ukamona ngayi ku moneka shiwahe ngonehe bandumbana munezeke nabo ku myaka mufwako, pe mukanzihisha kuli mwene.”

¹¹ Niho Ndanyele ambile kuli shamanga ou emikile Ashepanazi hali Ndanyele na Hananiya na Mishayela na Azaliya ngayi,

¹² “Ezeka bakamilimo bobe ha matena likumi. Tupanikenga tuhu mashiha akulya na mema akunwa.

¹³ Niho utufwanikize na bandumbana aba ba kulyanga byakulya bya wene, nihoboni uwane mwa kutendela bakamilimo bobe kunebye uku mona.”

¹⁴ Niho etabilile kuneshe ambile ngayi bezekiwe ha matena likumi.

¹⁵ Oho matena likumi amanine bamonekele kukanguka ku lutu na kuleliwa shiwahe kupitakana nimwabo baya balilenga byakulya bya wene.

¹⁶ Niho shamanga afumishile byakulya bya hatiwile na waine bafwaninine kunwa pe wabapanikile mashiha.

¹⁷ Neheboni kunaba bandumbana banaa, Nyambi wabapanikile kalimukisho kakulilongesha na wutungu mu kutikita mabuka nimwawo na kuwana bya ngana. Kami wapanikile Ndanyele wutungu wakutontolola bimonekesho na milo.

¹⁸ Ku mamaninino a myaka yihatu eye atoyele mwene, Ashepanazi watwalile bandumbana nimwabo kuli Nembukandineza.

¹⁹ Mwene wambilenga nabo nimwabo, pe wawanine ngayi Ndanyele na Hananiya na Mishayela na Azaliya bengile babawahe kupitakana bamina nimwabo. Nohobene bengile babilolo ba ku shinzanza sha mwene.

²⁰ Mu byambo nimwabyo hinge ndi mwene wepwile liyipu lya nahiti, hinge ndi wukalu ngani aletele, wawanine ngayi aba bandumbana banaa balimukile shikuma bikati likumi kupitakana mukakwawula hinge muka malele mu wene wendi nimwamo.

²¹ Ndanyele wekalile shikuma hantu oho Mwene Shilushi akomene Mbambiloniya.