Nahumi 1 - Libuka Lya Kuyela

¹ Shino nisho shimono amonene muluwe wa Nyambi Nahumi waku Elekoshi ha lukena lwa Neniva.

Wukali wa Nyambi ya Ngula ha Neniva

² Nyambi ya Ngula wenga Nyambi walihungu na mukakubweshela, Nyambi ya Ngula wabweshelanga wubi wa baya ba kumulwisha. Nyambi ya Ngula washushulanga baya ba kumulwisha, kami wenga wamukali ku bamalamo bendi.

³ Nyambi ya Ngula mukakwihala kupilama, kami wenga wamunene ku ngovu, kami Nyambi ya Ngula kuleha nahiya bakamilandu na kubula kubayata ufwako. Nzila yendi yekala mu kakundukundu namu nkuli, pe makumbi enga lukungu lwaku mawulu wendi.

⁴ Ukwambila liwate pe likuyuma, wayumishanga mishinzi nimwayo. Litunga lya Mbashani na lipili lya Kamela likuyuma, na maluba a Lembanoni akulebuka.

⁵ Mapili akankanga ku meho wendi, kami binkanda byamyongotokanga hanci, kaye kendanga ku meho wendi, na nimwabo bekalamo bakakanka.

⁶ Kati yani ukatwesha kwimana ku meho wendi ndi napilama? Yani ukutwesha kukemana ku ntukumina ya wukali wendi? Wukali wendi walashekanga ngonehe mundilo, kami mamanya apabozokanga ku meho wendi.

⁷ Nyambi ya Ngula wamuwahe, shipata sha kushuma ha mutena wa malwa. Walimuka baya batininanga mumwendi kushinga kuyavwiwa.

⁸ Ngoboni ukakupula baya ba kumulwisha na libazi lyalinene na ku bamanisha, pe ukatandila bamalamo bendi mu mincimpwe.

⁹ Kati bishini mu kuhanganika kutenda bya kulwisha Nyambi ya Ngula? Ukamimanisha nimwenu. Makando kukamiyandisha kawubili afwako.

¹⁰ Bakalitamba ngo mukona, baya bakakukolwa bakahokeshiwa ngo ntende za kuyuma.

¹¹ Kati kukwobe Neniva kaliha kwafumine, ou wekalile na biyongola bya kulwisha Nyambi ya Ngula ndi? Pe watongwezelenga baminendi kutenda bya kuluwa.

¹² Ebye nibyo akwamba Nyambi ya Ngula ngayi, “Hinge ndi Baashiliya banengi bangovu na kwinga babengi, bakazihiwa na kulobeshiwa. Hinge ndi namimoneshele malwa, obe Yunda, kukamimonesha malwa kami nifwako.

¹³ Haya nikamungula mpongoho yendi iya yili ha ncingo yobe, kami nikaketozola nketwana ziya banakumanga.”

¹⁴ Nyambi ya Ngula unayaka mazu hahobe Ashiliya ngayi, “Kukekala na bazukulu ba kushwana lizina lyobe ufwako, nikalobesha tunankishi twa kubaza na tunankishi twa kubumba, tuya tuli mu litala lya banyambi bobe. Nikakukabila shinzimbi Ashiliya, ndaba unengi wowa.”

¹⁵ Pezenu mawulu a nou uli na kwiza ha lipili ukuleta ncango zaziwahe, ukubilika lukuwa lwa ku mwena! Obe Yunda pinga bimbo byobe, kami pana Nyambi ebye walibezele, ndaba hinga mwaka kukatanga kami bakuluwa kwiza na kumi lwisha, ndaba balobeshiwakale.