Mukakushimikila 9 - Libuka Lya Kuyela

¹ Ngoboni nimwabyo ebye, byekalile mu mutima wami na kubiyongola nimwabyo, tuku mona bantu bakulunga na bangana, biheka byabo byekala mu liboko lya Nyambi. Muntu kaliha walimukanga hinge ndi kuli kulihaka hinge nzimbo. Byuma nimwabyo ku muntu byenga byabikalu kubiyuvwishisha.

² Kowa kutapulula, wukalu ukwiza ha bantu bakulunga niwo kami ukwiza ha bantu bakuluwa, ku bantu babawahe nanaba bababi, kunobo ba kulimuka bya wunyambi nanobo bakubula kubilimuka. Ku nobo bakakutupula nanobo bakakubula kutupula. Shikutendiwa ku wamuwahe, nisho kami shikatendiwa ku wamubi, mukakukulupisha kupitakana mukakubula kukulupisha wufwako.

³ Eshe shinengi sha shibi ku nimwabyo bikutendiwa hano hanci, pe mamaninino akulifweka ezanga ku muntu nimwendi, nimwabo kami mitima yabo yenzala na wubi na wupempeli oho bashili kuyoya, pe banakuya mu kufwa.

⁴ Ngoboni muntu oho ashili kuyoya na babomi wenga mukakulumbeza, ndaba kawa wamumi uli shiwahe kupitakana shimbwi wakufwa.

⁵ Ndaba bantu babomi balimukanga ngayi bakafwa, ngoboni ba kufwa kowa eshe ba kulimuka, kami kowa ncuungu yabo, ndaba kowa ushili ku banuka.

⁶ Shishemo shabo, nzimbo yabo na mwili wabo nimwabyo bafwa nabyo. Kami bafwako kuka kundama ku byuma bikutendiwa mu kaye.

⁷ Nohobene likuwe kulya byakulya byobe na kunwa waine yobe na mutima waku wahilila, ndaba Nyambi unetabilishi nimwabyo ukutenda.

⁸ Shikati nimwasho vwala bivwalo byobe, shakula huki zobe ngayi umoneke shiwahe.

⁹ Likuwe wumi na mukazobe ou wahaka, mu matena nimwawo akuyoya kwobe hano hanci, ndaba nisho shitapilo shobe mu kuyoya na mulitengela lyobe eli wonzela kutengela hano hanci.

¹⁰ Shuma nimwasho ukutenda na liboko lyobe shitende na ngovu nimwazo, ndaba kowa mulimo, hinge kuhanganika, hinge kalimukisho, hinge ngana mu kalunga ka bafu omu ukuya.

¹¹ Kami namonene shuma shamina hano hanci, bakakwituka shikuma kakengi kaliha bapitakananga mu lubilo lwabo, bakakukanca kakengi kaliha bakamanga mu kulwa. Bantu bangana kakengi kaliha bayoyanga shiwahe, bamina kakengi kaliha bawananga wuheti. Kami bantu bafwanina ha mulimo kakengi kaliha baba kulishanga ha mulimo wabo na bantu bawutungu kakengi kaliha bayemeziwanga. Kutamwa kukwiza ku bantu nimwabo.

¹² Ndaba muntu kaliha walimukanga shikati shendi, ngonehe zinci zafwanga ha kanyanzi na tuyoni twafwanga mu tunyimbwa, nisho kami bafwanga bantu ha shikati sha ku bazumuna.

Bihanganiko bya ha ngana na kuyeba

¹³ Hano ha hanci namonene shuma shashinene sha kukundama ku ngana, pe kukwami shengile shashinene.

¹⁴ Kwekalile munzi wawushe mwabulile bantu babengi. Mwene wangovu shikuma wezile na kuwu lwisha. Wawuzingulukile na kuliwahishila ku shiwula kembi.

¹⁵ Ngoboni mu munzi muya mwawaniwile muntu waku shepwa wangana, walamwinine uya munzi ndaba ya ngana zendi, ngoboni hinge noho kowa wamwanukile uya ncepwe.

¹⁶ Haya nikwamba nehi ngayi kwikala na ngana shili shiwahe kupitakana ngovu. Ndi uli ncepwe kowa muntu ukuyuvwilila, hinge ndi uli muntu walimuka byuma.

¹⁷ Shili shiwahe kuyuvwilila ku mazu amawahe a muntu wangana akwambiwa mu ku mwena, kupitakana mazu akukangoka a mwene akwambila ku likunge lya bakuyeba.

¹⁸ Ngana zili shiwahe kupitakana bilwisho bya nzita, ngoboni mukawubi umo wabipishanga byabingi byabiwahe.