Mukakushimikila 6 - Libuka Lya Kuyela

¹ Kuli sha kukolesha ku mutima namono hano hanci, shihota ha baminendi bantu.

² Muntu uya Nyambi anapana wuheti, ntutu na maleema, ngayi abule kulishoza byuma nimwabyo ashinga, Nyambi hinga abula kumupana ngovu za kulikuwabyo. Muyeni niye ukamulilabyo, ebye binengi byabikalu kubiyuvwishisha, shinengi sha kukolesha ku mutima.

³ Ndi muntu ukubeleka bana mwanda, ndi ha kuyoya myaka yayingi, ndi ukabula kulikuwa byuma byendi, haya nikwamba ngayi, shili shiwahe ku mbututu uya nahemuwu wakufwa kupitakana wanoho.

⁴ Ndaba niye wezanga tuhu mu kuhemuwa, wayanga mu kaye ka mincimpwe kami lizina lyendi likuvulamiwa.

⁵ Mbututu ku mona liyeye lya mwaana hinge kulimuka wumi ngayi wenga wa nahiti wufwako, ngoboni niye unawana kukatala,

⁶ kupitakana muntu ukubula kulikuwa wumi, hinge ndi ukuyoya myaka makulukazi abili. Ndaba nimwabo bakaya ku mwanya umo.

⁷ Mulimo akutenda muntu nimwawo ukutenda ngayi awane byakulya, ngoboni kuwana bya kumukonkana wufwako.

⁸ Kati muntu wangana ukupitakana wakuyeba ndi? Kati ncepwe ou ukulimuka kulikoweza niyemwine na kuyoya na bamina unawanaho bishini?

⁹ Shashiwahe ku huputuka nanobyo uku mona, kupitakana kulishoza byuma ebye ukubula ku mona, ebye nimwabyo bya kulishoza byabikalu kubiyuvwishisha, binengi ngo kutanda mpepo.

¹⁰ Byuma nimwabyo byatendiwile, byalimukiwile mwaka na Nyambi. Haya yani muntu ukutwesha kututuka na Nyambi ou uli na ngovu za kumupitakana.

¹¹ Nimwamo akututukila nimo kami bikwinga byowa, haya wuwahe ngani ukuwanaho?

¹² Yani ukulimuka eshe shinengi shashiwahe ku muntu oho ashili kuyoya mu matena amashe a wumi akupita, awa apitanga ngo mumvulu? Kami yani ukutwesha kulimuka bikatendiwa mu kaye kunyima ya lufu lwendi?