Mukakushimikila 4 - Libuka Lya Kuyela

¹ Kami namonene bakakuyandisha baminabo hano hanci. Namonene mihozi ya bakakuyanda baya babulile waku babengezeka. Kowa watweshele ku bayavwa kubafumisha ku maboko a bakakubayandisha baya bekalile na ngovu.

² Nahanganikile ngayi baya banafu balishiwahe shikuma kupitakana baya bashili kuyoya.

³ Ngoboni muntu uya nabulu kuhemuwa uli shiwahe kupitakana wubili wabo, ndaba uya nabulu kuhemuwa shilolo amone byabibi biya bikutendiwa hano hanci.

⁴ Ninamono ngayi muntu watendanga mulimo nimwawo wamanono, nimwabyo byafumanga ku kulishoza biya alinabyo minendi uya ekala nendi hahepi. Ebye kami binengi byowa, binengi ngo kutanda mpepo.

⁵ Wakuyeba ukuvunga maboko wendi na kubula kutenda milimo, pe ukafwa kunzala.

⁶ Nohobene shinengi shashiwahe kwikala na liboko limo linenzala na twatushe mu ku mwena kupitakana ku hundangana shikati nimwasho na maboko abili ngo kutanda mpepo.

⁷ Kami namonene shuma shamina mu nyoyelo yowa.

⁸ Muntu wakwikala ninkayendi kwa kubula mwana hinge kawushinda, hinge noho kaliha walehele kutenda milimo yendi nimwayo, kami kunyikwa wuheti wendi alinawo wufwako. Kulipula niyemwine ngayi, “Kati yani ou nikuyandila kutenda eye milimo na kulibulisha amimwine kuwana shikati sha myelembo?” Ebye kami binengi byabikalu kubiyuvwishisha, yinengi milimo ya kubula kuwahililisha.

⁹ Bantu babili banapitakana muntu umo, ndaba ba kutwesha kuliyavwa mu nimwabyo ba kutenda.

¹⁰ Ndi wamina nawu minendi ukutwesha kumukatulamo, ngoboni makando wendi muntu uya uli ninkayendi, ndi ukuwa kowa ou ukutwesha kumukatulamo.

¹¹ Kami ndi bantu babili banalangana hamo ba kulitukumisha. Haya ndi muntu uli ninkayendi, ukutwesha nahiti kuyuvwa kutukuma?

¹² Hinge ndi umo ba kumukoneneka, ngoboni bantu babili ba kutwesha kulilamwina, ngonehe lunyimbwa lwa kupohela hahatu lwenga lwalukalu ha kuluvutula.

¹³ Ndumbana wakushepwa wangana uli shiwahe kupitakana mwene wa kakulukazi ou nengi shileya, uya wakubula kuyuvwa kutengululiwa.

¹⁴ Uya wakufuma mu tolongo na kwikala ha litanda, hinge ndi wahemuwile kwinga wakushepwa ngoboni wengile mwene.

¹⁵ Namono bantu ba kuyoya nimwabo hano hanci, hamo na uya ndumbana, hamo nanou ukushinga ku shwana wene.

¹⁶ Mikoka nimwayo kaliha yamananga, baya bekalileko, hinge baya bakekalako kukawahilila nendi bafwako. Mwa shikuma ebye kami binengi byabikalu ku yuvwishisha, binafweke ngo kutanda mpepo.