Mukakushimikila 3 - Libuka Lya Kuyela

Shuma na shuma na shikati shasho

¹ Byuma nimwabyo byekala na shikati na shikati sha byuma bikutendiwa hano hanci.

² Kwekala shikati sha kuhemuwa na shikati sha kufwa, shikati sha kukuna na shikati sha kubuya biya bya kuniwa,

³ shikati sha kuziha na shikati sha kunyongomanisha, shikati sha kunyemuna na shikati sha kuzika.

⁴ Kwekala shikati sha kulila na shikati sha kuhepa, shikati sha malila na shikati sha ku shinda,

⁵ shikati sha kwikala hamo na shikati sha kubula kwikala hamo shikati sha kulibumbatila na shikati sha kubula kulibumbatila.

⁶ Kwekala shikati sha kushinga na shikati sha kuyongala, shikati sha kukoweza na shikati sha ku shandola,

⁷ shikati sha kutabola na shikati sha kutunga, shikati sha ku mwena na shikati sha kwamba.

⁸ Kwekala shikati sha ku haka na shikati sha kuzimba, shikati sha nzita na shikati sha ku mwena.

⁹ Kati muka mulimo ukawana bishini ku mulimo wendi?

¹⁰ Namono miziho yiya Nyambi anapana ku bana ba bantu ngayi bayakakane nayo.

¹¹ Nyambi unatende byuma nimwabyo kwinga byabiwahe ha shikati shabyo, kami unayaka bifungo kukwetu bya kulimuka bya kumbili ngoboni shilolo atupanike ku yuvwishisha kunebye atendele ha kutatika naku mamaninino.

¹² Nalimuku ngayi kowa shuma shashiwahe eshe bantu ba kutwesha kutenda ndele tuhu ku wahilila na kulikuwa nibo bamwine shikati bashili kuyoya,

¹³ kami shenga shishemo sha Nyambi ngayi bantu nimwabo ba ku fwanina kulya na kunwa na ku wahilila mu mitima ku milimo yendi nimwayo.

¹⁴ Nikulimuka ngayi byuma nimwabyo atendele Nyambi bikekala mwaya myaka, kowa shuma shikayakiwilako hinge kufumishiwako. Nyambi niye washingile ngayi shitendiwe noho, mwanga bantu bakamuyuvwile bowa.

¹⁵ Shuma shiku moneka lelo naku mwaka shamonekele kami eshe shiliko lelo naku mwaka shekalileko, kami Nyambi ukashinga ebye byatendiwile mwaka ngayi biboke.

Shihota mu Kaye

¹⁶ Natoshele shuma shamina hano hanci ku mwanya wakuyatila, nimo mwekalile bya kuluwa na mumwanya wa bakulunga mwekalile bakuluwa.

¹⁷ Nalyambashanine mu mutima wami ngayi, “Nyambi ukayata bakulunga na bakuluwa, ndaba wayakile shikati sha byuma nimwabyo na shikati sha kuyata milimo nimwayo.”

¹⁸ Nalyambashanine mu mutima wami kami ngayi, “Haya Nyambi unakwezeka bana ba bantu na kubamonesha ngayi nibo banengi ngonehe batuyamana.”

¹⁹ Ebye bikwizilila bantu nibyo kami bikwizilila batuyamana, eshe akufwa muntu nakayamana kami nisho akufwa. Nimwabo bali na kwoya mpepo yimo. Kami muntu kupitakana batuyamana wufwako, ndaba ebye nimwabyo bifwako kukayikalilila.

²⁰ Nimwabo bakaya ku mwanya umo, nimwabo bafuma ku lukungu, kami bakaboka ku lukungu.

²¹ Kati yani ukutwesha kulimuka ngayi moyo wa muntu wayanga kuyilu na moyo wa kayamana wayanga hanci mu nceto ya limvu?

²² Niho namonene ngayi shinafwanini ku muntu kulikuwa bya mulimo wendi, ndaba niyo yinengi ncuungu yendi, kati yani ukamubwesha ngayi akatweshe ku mona ebye bikekalako munyima ya lufu lwendi?