Mukakushimikila 12 - Libuka Lya Kuyela

¹ Anuka Shakalenga wobe mu matena awundumbana wobe, oho matena na myaka yayibi shilolo yikume, oho ukamba ngayi, “Ku wahilila na nyoyelo nifwako!”

² Oho wakulumpalakale mwaana wa mutena na ngonda na nyenye zikamoneka ncishilile kukwobe, ngonehe makumbi a mvula aletanga mincimpwe.

³ Niho mawulu wobe akulamanga akakanka, niho mafuzi owo niye wenga mulume wakushuma ukanyongama. Bambuyuama bakakutwa bakalehasho ndaba babashe, pe bambuyama bakwinangila mu mampananga bakamona ncishilile.

⁴ Kami bihala bya mumikwakwa bikashinkiwa na mishindo ya kutwa kukayuvwanika yifwako. Bantu bakapinduliwa na miyoyo ya tuyoni. Ngoboni obe kuyuvwa mungunina wufwako.

⁵ Obe ukatina myanya ya kukankalala, ukekala na mutentu hakwenda. Huki zobe zikafutuka ngonehe maluba a kutuba, ukakabakana hakwenda ngonehe akalabanga mbimba, oho nyumwa yobe nimwayo yikamana. Shikati sha muntu sha kuya ku munzi wendi wakukwangulukila mwaya myaka shakakuma, bakamulila mu mikwakwa na muzimbalila za kulandishila.

⁶ Anuka Shakalenga oho ushili ndumbana, oho shilolo lunyimbwa lwa shiliva luketuke, oho shilolo lulonga lwa ngolinde lupabuke, oho shilolo ntesho ya ku kaheloke ka mema yifwe na mubalo waku lishima oho shilolo upokoke.

⁷ Lutu lukabokela ku lukungu ndoba kuya lwafumine, moyo ukaboka kuli Nyambi uya watupaninewo.

⁸ Mukakushimikila ukwamba ngayi, “Nyoyelo yenga yayikalu kuyiyuvwishisha, byuma nimwabyo bya kuluwanganisha.”

Kumaninina nimwabyo

⁹ Mukakushimikila kaliha walitentekelele kalimukisho kaya ekalile nako, ngoboni walongeshelenga bantu. Walilongeshele zinguli na ku shingishisha kupwisha kwazo.

¹⁰ Mukakushimikila washingishishile mazu akuwahilisha, niho atikitile shiwahe mazu akupwisha.

¹¹ Mazu a muntu wangana anafweke ngo shitwa, shiya baliyavwishanga balishani ha kulisha bambelele, kami ngonehe zimbambo ziya banapampala ziya zalalukanga, ngonehe nyambilo ya ngana yikufuma kuli Nyambi mulishani wetu umo.

¹² Mwanami, unafwanini kukeya na byuma byamina biya bakuwezelela kunebye. Bya kutikita mabuka kaliha byekala na mamaninino. Kami kulilongesha shikuma kwa kwangishanga lutu.

¹³ Ebye nimwabyo binayuvwaniki, haya ha kumaninina nikwamba nehe, Yuvwila Nyambi bowa, kami lama ndayano zendi, ndaba ebye nibyo binafwanini ngayi muntu abitende.

¹⁴ Nyambi ukayata byuma nimwabyo biya bikutendiwa kuwi, hinge ndi byabibi hinge ndi byabiwahe.