Mukakushimikila 11 - Libuka Lya Kuyela

Ebye atendanga muntu wangana

¹ Tuma byakulya byobe mu nciza ya liziba, ndaba ukabiwana kwapita matena amengi.

² Tapila ebye ulinabyo mu bikongelo mutanu na bibili hinge mutanu na bihatu, ndaba kulimuka byabibi bikeza hano hanci wufwako.

³ Ndi makumbi anenzala na mvula, pe akalokeshela mvula hanci, kami ndi mutondo ukuwila mu mabukubuku hinge mu ncelele, mu mwanya omo unawili nimo ukekala.

⁴ Ou ukukomoka mpepo kukashanga wufwako, kami ou ukukomoka makumbi kukateza wufwako.

⁵ Ngonehe mu kubula kulimuka moyo eshe wezanga, hinge eshe bya kulanga bifupa bya mbututu oho ushili mu livumo lya bamandiyendi, nisho kami ukubula kulimuka mulimo wa Nyambi Shakalenga wa byuma nimwabyo.

⁶ Shanga mbuto yobe lumenemene na mazolo, ndaba kulimuka mbuto yiti eze yikayime shiwahe kupitakana yiminayo wufwako, hinge ndi nimwayo yikayima shiwahe.

Kubela bandumbana

⁷ Mwa shikuma mwaana wenga wawuwahe, shilishiwahe ku muntu kulikuwa wuwahe wa mwaana.

⁸ Ndi muntu ukuyoya myaka yayingi, awahilile ha myaka nimwayo ya kuyoya kwendi. Howa ndaba ndi ukuyoya myaka yinga, hanganika ngayi ukafwa shikati shashitali. Kowa bya ku fwanina kulumbeza.

⁹ Obe ndumbana tangala ha wundumbana wobe, mutima wobe uwahilile ha matena a wundumbana wobe, oho ushili ndumbana enda munzila ukushinga mutima wobe naneshe uku mona. Ngoboni hanganika ngayi Nyambi ukakuyata ha nimwabyo ukutenda.

¹⁰ Hinga ulinyenga mu nimwabyo, fumisha wubi mumwobe, ndaba wanuke na wundumbana wobe wakashikati kakashe.