Mukakushimikila 10 - Libuka Lya Kuyela

¹ Ngonehe banzinzi ba kufwila mu mazi bengishanga mazi ngayi anuke shibi, nohobene bihanganiko bya wakuyeba bikutwesha kuluwanganisha ngana.

² Mutima wa muntu wangana wamutwamininanga munzila yayiwahe, ngoboni mutima wa muntu wakuyeba wamutwamininanga munzila ya kuluwa.

³ Wakuyeba oho akwenda munzila, wahololanga biheka byendi bya kuyeba ku nimwabo baya akuliwana nabo.

⁴ Ndi mukakulela unakupilamini, hinga ushiya mulimo wobe, ndi uku mwena ukutwesha ku kuyatila mulandu wawunene.

⁵ Kubili byabibi ebye ninamono hano hanci, biya batendanga batulela,

⁶ bayakanga bantu bakuyeba mubipona bya maleema ngayi batwaminine, ngoboni ba kuheta bakwikala mu nceto.

⁷ Ninamono bandungo hibenda ha bambishi, ngoboni bantu bana ba bamyene hibenda na mawulu ngo bandungo.

⁸ Ou ukukaba liteke ukutwesha kukawilamo niyemwine, ou ukutubula limota ukutwesha kukahumiwa ku liyoka.

⁹ Ou ukupabola mamanya ukutwesha kukalemana ku mamanya. Kami ou ukutabola bilenga ukutwesha kulikolesha ku bilenga.

¹⁰ Ndi kazembe kanashimi, muntu ha kubula kuka kumba, ha kukatemesha ndele ayakeko shikuma nyala, ngoboni ngana zikuyavwa muntu ngayi atweshe ebye akutenda.

¹¹ Ndi liyoka ukuhuma mukakukulela mayoka, oho shilolo amushompololekale, pe mukakulela mayoka ukwikala mu wukalu.

¹² Mazu a muntu wangana amuletelanga maleema, ngoboni wakuyeba walilobeshanga niyemwine na mazu wendi.

¹³ Mabalikilo a mazu wendi akuyeba, kami ku mamaninino wambanga mazu amabi awupempeli.

¹⁴ Wakuyeba wambanga mazu amengi, hinge ndi kowa kami ukulimuka bya kumbili, kowa muntu ukutwesha kumutongweza ebye bikamoneka oho wafwakale.

¹⁵ Milimo ya muntu wakuyeba yamukwangishanga, wakwanganga hinge kulimuka nzila yikulumba ku munzi.

¹⁶ Makando wobe, obe litunga wukuleliwa ku mwene wangana za wanuke, babilolo balyo ba kutenda mayambwayambwa ha kutabula kwa mutena.

¹⁷ Unatandala obe litunga ukuleliwa na mwene uya wangana na babilolo bobe ba kutenda mayambwayambwa ha shikati shashiwahe. Bakutenda mayambwayambwa ngayi bekale na ngovu, kaliha ngayi mwanga bakolwe.

¹⁸ Shiluli sha litala shashiwukanga ndi mwinewalyo wenga muvwa, litala lyalokiwanga ndi mwine walyo wakupopa.

¹⁹ Mayambwayambwa aletanga ku wahilila ku muntu na waine yatangalishanga muntu, ngoboni mali ayavwanga mu byuma nimwabyo hano hanci.

²⁰ Hinga ukuta mwene hinge mu bihanganiko byobe, hinga ukutwiza wakuheta oho uli mukampenci kobe muya walangananga, ndaba limota lilina matu pe mazu obe akutwesha kumena mbando.