Mukakushimikila 1 - Libuka Lya Kuyela

Nyoyelo yayikalu kuyiyuvwishisha

¹ Mazu a Mukakushimikila, mwana Ndavita ou wengile mwene wa mu Yelushalema.

² Nyoyelo yayikalu kuyiyuvwishisha, Mukakushimikila wambile ngayi, “Nyoyelo yenga yayikalu kuyiyuvwishisha, byuma nimwabyo bya kuluwanganisha.”

³ Muntu ukawanaho bishini ha milimo nimwayo yayikalu eye akukabakana hano hanci?

⁴ Bihemunwino bikwiza na bihemunwino bimina bikupita, ngoboni kaye kakekalilila.

⁵ Mutena watutikanga hiwukuya mu kulela, pe hiwukunyankupila ku mwanya oku watutikilanga kami.

⁶ Mpepo yikupepokela ku mabukubuku, pe yikuzinguluka na kuya ku ncelele, hiyiya na kuzinguluka na kuzinguluka, noho yiboke oku yatatikila.

⁷ Mishinzi nimwayo yikutwala mema mu liwate, ngoboni liwate kwinzala lifwako, ku mwanya kuya yatatikilanga kukunkula niko akuboka kami, pe hiyikubalika kutwala mema mu liwate kami.

⁸ Byuma nimwabyo byapopanga, kupopa oku kwakubula kutwesha kwambiwa ku muntu, meho kutwesha kunyikwa bya ku mona afwako, hinge matu kunyikwa bya kuyuvwa afwako.

⁹ Ebye byekalileko ku mwaka nibyo kami bikekalako kumbili, kami ebye byatendiwile nibyo kami bikatendiwa, kowa byuma byabipya hano hanci nimwaho.

¹⁰ Kati kuli shuma ba kutoya bantu ngayi, “Monenu, eshe shinengi shashipya,” ndi? Ngoboni shekalileko mwaka oho etu shilolo twikaleko.

¹¹ Kowa ukanuka byuma byamonekele kumanyima, kowa kami ukanuka byuma bya wuluno ebye binabulu ku moneka mukati kanobo bakahemuwa kumbili.

Kukokoka kwa Mukakushimikila

¹² Ami Mukakushimikila nengile mwene wa Ishalela mu Yelushalema.

¹³ Nafungile mu mutima wami, ku shingishisha na kufwatula bya ngana ebye bikutendiwa hano hanci, wunengi mulimo wakubula kuwahililisha owe Nyambi anapana ku bantu ngayi bakabakane nawo.

¹⁴ Namono byuma nimwabyo ebye bikutendiwa hano hanci na kumitongweza ngayi nimwabyo byabikalu kubiyuvwishisha, binengi tuhu ngo muntu ukutanda mpepo.

¹⁵ Kutwesha kwolola shuma sha kukontama mufwako, kami kutwesha kulaba byuma binabulukuko mufwako.

¹⁶ Nalyambashanine mu mutima wami ngayi, “Ami nengakale muntu wangana napitakanakale batulela bekalileko ha kutatika mu Yelushalema oho shilolo nishwane ha wene. Mutima wami unawana bya ngana zazinene na kalimukisho kaneshe byekala.”

¹⁷ Shifungo shami shengile sha kulimuka ebye nikawanaho ha ngana na kuyeba. Ngoboni nawanine ngayi ebye kami kunengi ngo kutanda mpepo.

¹⁸ Ndaba mu ngana zazinene mwekala kami manyengo amanene, ou ukunenehesha kalimukisho kendi, ukunenehesha kami manyengo wendi.