Milimo 9 - Libuka Lya Kuyela

Kutenguluka kwa Shaulu

¹ Shaulu watimbililile na mafumbila akuziha bandongesha ba Mwene. Wayile kuli Mukulwane wa Bakankombela Nimwabo,

² pe wakamunyepele mañwati akuya nawo ku mashinangonge amu Ndamashika, ngayi ndi ukawana bamo ba kukonka Nzila ya Mwene, balume hinge bambuyama, abalete ku Yelushalema hinga bamangiwa.

³ Oho Shaulu akumine kwakwipi na Ndamashika, hohobene lumuni lwafumine muyilu lwamumunikile.

⁴ Pe wawililile hanci, wayuvwile lizu lyambile kukwendi ngayi, “Shaulu, Shaulu, kati bishini ukunyandishila?”

⁵ Shaulu wepwile ngayi, “Kati obe yani, Mwene?” Lizu lyambile ngayi, “Ami Yeshu, ou ukuyandisha.

⁶ Ngoboni katuka wingine mu munzi, pe ukatongweziwa ebye wafwanina kutenda.”

⁷ Bantu bendelenga na Shaulu, bemanine hinga bamwena, bayuvwile lizu, ngoboni kaliha bamonene muntu.

⁸ Niho Shaulu apindukile hanci, oho atonene, kaliha watweshele ku mona shuma. Pe bamukwatile ku liboko, niho bamutwalile ku Ndamashika.

⁹ Wekalile matena ahatu na kubula ku mona, kami kaliha walile hinge kunwa.

¹⁰ Mu Ndamashika mwekalile ndongesha watumbiwile ngayi Ananiyashi. Mwene wambile kukwendi mu mulo ngayi, “Obe Ananiyashi!” Pe wakumbwile ngayi, “Ingoi, Mwene.”

¹¹ Mwene wambile kukwendi ngayi, “Katuka uye ku litala lya Yundashi, mu nzila yikutumbiwa ngayi Nzila ya Kululama, ukashinge muntu ukutumbiwa ngayi Shaulu waku Talishashi. Uli na kulombela,

¹² pe mu mulo unamono muntu ukutumbiwa ngayi Ananiyashi hengina kami nakambiki maboko hahendi ngayi mwanga amone.”

¹³ Niho Ananiyashi akumbwile ngayi, “Mwene nayuvwu ku bantu babengi bya muntu ou, ngayi unatende byabibi shikuma ku bakakuyela bobe mu Yelushalema.

¹⁴ Unezi kuno ku Ndamashika na ngovu za bakankombela ba bakulwane za kumanga nimwabo bakulemesha ha lizina lyobe.”

¹⁵ Ngoboni Mwene wambile kukwendi ngayi, “Yanga, ndaba namuhata ngayi antendele milimo ya kutwala lizina lyami ku Bakamatunga na ku bamyene na ku bantu ba Ishalela.

¹⁶ Ndaba nikamumonesha byuma ebye aku fwanina kuyandila ndaba ya lizina lyami.”

¹⁷ Niho Ananiyashi ayile, pe wakenginine mu litala muyo ekalile Shaulu. Wamukambikile maboko, pe wambile ngayi, “Shaulu, kawushinda wami, Mwene Yeshu ou waliholwele kukwobe mu nzila iya wezanga, unantumu ngayi umone, kami winzale na Moyo wa Kuyela.”

¹⁸ Hohobene shuma sha kufweka ngo mayazi a nyinci byafumine mu meho a Shaulu, pe wamonene kami. Wakatukile, pe wazubilishiwile.

¹⁹ Munyima ya kulya wawanine nyala. Shaulu wekalile matena amashe na bandongesha baya bekalilenga mu Ndamashika.

Shaulu uku shimikila mu Ndamashika

²⁰ Wayile mu Shinangonge, pe watatikile ku shimikila ngayi Yeshu niye Mwana Nyambi.

²¹ Nimwabo baya bamuyuvwile bakomokele, niho bambile ngayi, “Kati kaliha niye uya wayandishilenga baya balemeshelenga lizina lya Yeshu mu Yelushalema ndi? Kati kaliha unezi kuno na ku bamanga ngayi abatwale ku bakankombela ba bakulwane ndi?”

²² Ngoboni ku shimikila kwa Shaulu kwekalile na ngovu, kami Bayunda baya bazikile mu Ndamashika bakwangile kumukumbula, oho apakilenga ngayi Yeshu niye Kilishitu.

²³ Oho kwapitile matena amengi, Bayunda bakungulukile hamo, pe baliyongwele ngayi bazihe Shaulu,

²⁴ ngoboni Shaulu walimukile bihanganiko byabo. Bamubelamininenga ku mapangati a munzi mwaana na wushiku ngayi mwanga bamuzihe.

²⁵ Niho bandongesha bendi bamushilishile wushiku, bamututwishilile mu litubwa lya ha kembi hibamunyenzumuna mu shibondo.

Shaulu mu Yelushalema

²⁶ Oho Shaulu ayile mu Yelushalema, wezekele kuliwanika na bandongesha, ngoboni nimwabo bamutinine, kaliha bakulupilile ngayi wengakale ndongesha.

²⁷ Ngoboni Mbanambashi wamushimbile, wamutwalile ku bantumwana wabashimikilile eshe amonene Mwene ha nzila na neshe Mwene ambile kukwendi. Kami wabatongwezele eshe Shaulu ashimikililenga na kukanca mu lizina lya Yeshu mu Ndamashika.

²⁸ Niho Shaulu ekalile nabo, wendanganinenga mu Yelushalema nimwamo, ha shimikila na kukanca mu lizina lya Mwene.

²⁹ Wambilenga na kulikananganisha na Bayunda baya bambilenga Shingiliki, ngoboni bashingile kumuziha.

³⁰ Oho bakakukulupila balimukile ebye, batwalile Shaulu ku Sheshaliya, pe bamutumine ku Talishashi.

³¹ Niho matengo amu Yundeya nimwamo na mu Ngalileya na mu Shamaliya, ekalile mu ku mwena. Ashumine, kami ekalile na bowa wakutina Mwene, pe na kuyavwiwa kwa Moyo wa Kuyela, kwahanyine.

Pita uli mu Linda na mu Yopa

³² Pita wendanganinenga mu litunga, pe ha shikati shamina, wayile na kuzingula bantu ba Nyambi bazikilenga mu Linda.

³³ Kuyo niko akawanine muntu watumbiwile ngayi Ayenashi, walambamine ha wulili myaka mutanu na yihatu, wekalile na wulweli wa kalepa.

³⁴ Pita wambile kukwendi ngayi, “Ayenashi, Yeshu Kilishitu ukukunyongomanisha. Pinduka, uyalule wulili wobe.” Hohobene, Ayenashi wapindukile.

³⁵ Baya bazikilenga mu Linda na mu Shaloni nimwabo bamumonene, pe batengulukilile kuli Mwene.

³⁶ Haya mu Yopa mwekalilenga ndongesha watumbiwile ngayi Tabita. (Lizina lyendi mu Shingiliki niye Ndokashi, kunungulula ngayi, “Honge.”) Ou mbuyama watendelenga byabiwahe, kami wayavwilenga bakakushepwa.

³⁷ Ha matena ayo wakolele, pe wafwile. Bayoweshele mutuntu wendi, niho bawulangikile mu kampenci ka litala lya kuyilu.

³⁸ Ndaba Linda na Yopa hengile hahepi, pe bandongesha bekalile ku Yopa oho bayuvwile ngayi Pita uli ku Linda, batumine bantu babili kuya na kumutongweza ngayi, “Tukukulambilila, yeka kukwetu na wangu.”

³⁹ Niho Pita akatukile wayile nabo. Oho akumine, bamutwalile ku kampenci kakuyilu. Bambuyama ba bamfwile nimwabo bemanine kukwendi hibalila, pe bamumoneshele bikobelo na bivwalo ebye atungilenga Ndokashi oho ushili kuyoya.

⁴⁰ Ngoboni Pita wabatutwishile ha munkanda nimwabo, wafunkamine ku manungo, pe walombelele. Niho atengulukilile ku mutuntu, wambile ngayi, “Tabita pinduka!” Mbuyama watonene, oho amonene Pita, wakonkomanine.

⁴¹ Pita wamukwatile ku liboko, wamwimikile, niho ehanine bakakukulupila na bamfwile, wabapanineye hayoya.

⁴² Ncango za nebye byatendiwile zapanzanine mu munzi wa Yopa nimwamo, kami bantu babengi bakulupilile muli Mwene.

⁴³ Pita wekalile matena amengi mu Yopa kuli Shimoni mukakunyuka bitembe.