Milimo 7 - Libuka Lya Kuyela

Mazu a Shetefwano

¹ Niho Mukulwane wa Bakankombela Nimwabo wepwile Shetefwano ngayi, “Kati ebye binengi bya kupwisha ndi?”

² Shetefwano wakumbwile ngayi, “Bawushinda na batatizami, nyuvwililenu! Nyambi wamuwahe walimonekeshele kuli tatiyetu Abulahama, oho ushili mu Meshopotamiya, shilolo aye mu Halani,

³ pe wambile kukwendi ngayi, ‘Fuma mu litunga lyobe, ushiye bawushinda wobe, uye mu litunga elye nika ku monesha.’

⁴ Niho afumine mu litunga lya bantu ba Kalandeya, wakazikile mu Halani. Tatiyendi Abulahama oho afwile, Nyambi wamufumishilemo, pe wamuletele mu litunga lino, omu munaziki wuluno.

⁵ Nyambi kaliha wapanine Abulahama likona, hinge mbalila yayishe kuno ngayi binge byendi. Ngoboni wamukulupishile ngayi ukamupanika liya litunga ngayi linge lyendi na lya bazukulyendi, hinge ndi Abulahama ha shikati shiyo kaliha wekalile na mwana.

⁶ Nyambi wambile kukwendi ngayi, ‘Bazukulyobe bakenga bayeni mu litunga lya bashenge, kami muya bakenga bandungo, kami bakayandishiwa mu myaka 400.

⁷ Ngoboni ni ka shushula litunga liya bakatendela milimo, ku nyima ya nebye, bakafuma mu litunga liyo, pe bakeza mu ka ndemeshela ku mwanya uno.’

⁸ Niho Nyambi apanine Abulahama, shiheka sha mukanda ngayi shinge shilimukisho sha kulimama. Nohobene Abulahama watwalile mwanendi Ishaki ku mukanda oho ekalile na matena mutanu na ahatu kufuma ha kuhemuwa. Ishaki watwalile Yakobo ku mukanda, kami Yakobo watwalile ku mukanda bana bendi balikumi na babili, bankakazetu ba mpupo ba mukoka wetu.”

⁹ “Aba bankakazetu bayuvwilile mwili kawushinda wabo Yoshefwa, pe bamulandishile ngayi enge ndungo mu Engepita. Ngoboni Nyambi wekalile nendi,

¹⁰ wamulamwinine ku makalikiza endi nimwawo. Wamupanikile ngana na kukeya ku meho a Fwalo wa Engepita, niho amwingile kalela wa Engepita na wa litala lyendi nimwalyo.

¹¹ Niho kwekalile nzala mu litunga lya Engepita nimwalyo na mu Kenaani na makalikiza amanene, pe bankakazetu bakwangile kuwana byakulya.

¹² Oho Yakobo ayuvwile ngayi kuli byakulya mu Engepita, watumineko bankakazetu. Ou wengile mukala wa kutatika.

¹³ Ha mukala wa wubili Yoshefwa waliholwele ku bawushinda wendi, pe Fwalo wa Engepita walimukile bawushinda wa Yoshefwa.

¹⁴ Niho Yoshefwa atumine mazu kuli tatiyendi Yakobo ngayi beze ku Engepita hamo na bawushinda wendi nimwabo. Bengile bantu makumi mutanu na abili na bantu mutanu.

¹⁵ Nohobene Yakobo wayile ku Engepita, niko akafwililile niye na bankakazetu.

¹⁶ Mituntu yabo bayibweshele ku Shekemu oku bayilangikile mu shinzimbi shiya Abulahama alandile na mali ku bana ba Hamole ku Shekemu.”

¹⁷ “Oho shikati sha kumine hahepi ngayi Nyambi atende ebye a kulupishile Abulahama, bawushinda wetu bavulile shikuma na kuhanya mu Engepita.

¹⁸ Niho kwa shwanine mwene wamina mu Engepita ou wabulile kulimuka Yoshefwa.

¹⁹ Ou Mwene wongezele bantu betu, kami wayandishile batatizetu, wabakandamikile ngayi batutwishe bambututu babo ha munkanda wa matala ngayi bafwe.

²⁰ Moshesha wahemuwile ha shikati shiyo, wengile mwana wamuwahe shikuma kuli Nyambi. Bamuholekele mu litala lya tatiyendi zingonda zihatu.

²¹ Ngoboni oho Moshesha bamututwishile ha munkanda wa litala lya tatiyendi, mwana Fwalo wa Engepita wa mushimbi wamutolele, niho amulelelenga ngo mwanendi wakulibelekela.

²² Niho Moshesha alilongeshele ngana nimwazo za Baengepita, pe wekalile na ngovu mu mazu na munebye atendelenga.”

²³ “Moshesha oho ekalile na myaka makumi anaa, wekalile na bihanganiko bya kuya na kuzingula bawushinda wendi Baishalela.

²⁴ Wawanine umo wa Baishalela bali na kumutenda shibi kuli Kaengepita, wamulamwinine, pe wamulwililile niho azihile Kaengepita.

²⁵ Moshesha wahanganikile ngayi bawushinda wendi bakayuvwishisha ngayi Nyambi ukabalamwina na liboko lyendi, ngoboni kaliha bayuvwishishile.

²⁶ Ha mutena wakulundaminako, Moshesha wawanine Baishalela babili balwilenga, pe washingile ku balamwina, niho ambile ngayi, ‘Enu balume, nimwenu muli Baishalela, ndabangani muli na kulilwisha?’

²⁷ Ngoboni uya watendelenga minendi shibi wanyakwile Moshesha ku nkumo, pe wambile ngayi, ‘Yani unakwingi kalela na mukakuyata hakatiketu?

²⁸ Kampe ukushinga kunziha ngonehe waziha uya Kaengepita nzona ndi?’

²⁹ Oho Moshesha ayuvwile ebye, watinine wafumine mu Engepita, wakekalile mu litunga lya Mindiyani kuyo akabelekele bana babili babalume.”

³⁰ “Oho kwapitile myaka makumi anaa, lingeloyi lyaliholwele kukwendi mu libelelengwa hahepi na Lipili lya Shinayi mu mulangi wa mundilo wabangilenga mu lipukumuna.

³¹ Oho Moshesha amonene ebye wakomokele, pe wahenyenene hahepi na lipukumuna ngayi amonesheshe. Niho ayuvwile lizu lya Mwene ngayi,

³² ‘Ami Nyambi wa bankakazobe, Nyambi wa Abulahama na Ishaki na Yakobo.’ Moshesha wakankile na bowa, kami kaliha watilaminineko.

³³ Mwene wambile kukwendi ngayi, ‘Vwula ncangwa zobe, ndaba mwanya unemana wa kuyela.

³⁴ Namono kuyanda kwa bantu bami mu Engepita. Nayuvwu ku shunga kwabo, pe ninezi na kubapulwisha. Haya yeka nikakutume ku Engepita.’ ”

³⁵ “Moshesha bamukanine bantu ba Ishalela. Bambile ngayi, ‘Yani unakwingi kalela na mukakuyata hakatiketu?’ Niye Nyambi atumine kwinga kalela na mukakulamwina na liboko lya lingeloyi olyo lyalimonekeshele kukwendi mu lipukumuna lya bangilenga.

³⁶ Moshesha watwaminine Baishalela kubafumisha mu Engepita. Watendele bimonekesho na bikomokesho mu Engepita na ku Liwate lya Kufubila na mu libelelengwa mu myaka ya makumi anaa.”

³⁷ Moshesha niye wambile ku bana ba Ishalela ngayi, “‘Nyambi ya Ngula, Nyambi yenu ukamitumina muluwe ngonehe antumine, ukenga umo wa bawushindawenu.’

³⁸ Moshesha niye wekalile na Baishalela oho bakungulukile mu libelelengwa. Wekalile kuyo na bankakazetu hamo na lingeloyi lyambile kukwendi ha Lipili lya Shinayi. Watambwile mazu akuyoya a Nyambi mu kutupanikawo.

³⁹ “Ngoboni bankakazetu bakanine kumwombatala, bamunyancile, pe bashingile kuboka ku Engepita.

⁴⁰ Pe batongwezele Aloni ngayi, ‘Tutendele banyambi ba kututwaminina, ndaba kulimuka tufwako eshe shinezilili Moshesha, ou watufumishile mu litunga lya Engepita.’

⁴¹ Niho batendele kanankishi ka namani, pe bapehelele nkombela, kami bawahililile na milimo ya maboko abo.

⁴² Niho Nyambi abapenzeshele mongo, wabapanikile ku kulemesha nyenye, ngonehe kwatikitiwile mu libuka lya bamiluwe ngayi, ‘Enu baka litala lya Ishalela! Kati mwapanine kukwami tuyamana mwazihilenga, kwinga zinkombela mu myaka ya makumi anaa mu libelelengwa ndi?

⁴³ Mwashimbile kaala ka Moleki na lunyenye lwa nyambi yenu Lemfani, tunankishi mwatendele twa kulemesha. Pe nikamifumisha na kumi yumbila kwakutali mu nciza ya Mbambiloni.’

⁴⁴ “Bankakazetu bekalile na ntanda yamoneshele ngayi Nyambi bali nendi mulibelelengwa. Bayitendele ngonehe Nyambi atongwezele Moshesha, kami Moshesha watendele nehi sha kufwanikiza eshe amonene.

⁴⁵ Eye Ntanda ya ku Meho a Nyambi batambwile bankakazetu, bayiletele hamo na Yoshuwa oho batambwile litunga lya Bakamatunga aba Nyambi atandile. Yekalile kukwabo kukuma na ku matena a Ndavita.

⁴⁶ Ndavita wayamiziwile kuli Nyambi, pe wanyepele ngayi amutendele mwanya wakwikala Nyambi wa Yakobo.

⁴⁷ Ngoboni Sholomoni niye wamutendelele litala.

⁴⁸ “Hinge shekalile noho, Wakukangana kwikala mu matala akutendiwa na maboko wufwako, nehi muluwe ambile ngayi,

⁴⁹ Mwene wambile ngayi, ‘Liyilu lyenga litanda lyami, kami hanci hanengi malyatilo a mawulu wami. Kati litala elye mukantendela lya nahiti? Hinga mwanya wakukatalila kwami wanahiti?

⁵⁰ Kati liboko lyami kaliha linatende byuma nimwabyo ebye ndi?’

⁵¹ Shetefwano watwalilileho kwamba ngayi, “Enu bantu babakalu, ba mitima ya kubula kuya ku mukanda, enu bizikamatu ku lizu lya Nyambi! Munafweke nehe batendelenga batatizenu nanenu kami mwakananga Moyo wa Kuyela.

⁵² Kati kuli muluwe ou babulile kuyandisha batatizenu? Kami bazihile aba bashimikile bya kwiza kwa uya mukakwoloka. Pe enu munamubebe na kumuziha.

⁵³ Enu mwatambwile ndayano za Nyambi kupitila ku mangeloyi, ngoboni kwombatala mufwako!”

Shetefwano ba kumupuha mamanya

⁵⁴ Oho bakankuta bayuvwile mazu a Shetefwano, bapilamine shikuma na kulikekenya ku mayewe.

⁵⁵ Ngoboni Shetefwano, hinga enzala na Moyo wa Kuyela, watilaminine kuyilu, wamonene wuwahe wa Nyambi na Yeshu kami hinga emana ku liboko lya shilyo lya Nyambi.

⁵⁶ Niho ambile ngayi, “Monenu! Niku mona liyilu linashinkuluku na Mwana Muntu unemana ku liboko lya shilyo lya Nyambi!”

⁵⁷ Ngoboni babilikizile na lizu lyalinene, balizikile mu matu, bamushindumukilile nimwabo hamo,

⁵⁸ bamukokelele ha munkanda wa munzi, pe bamupuhile mamanya. Bapaki bayakile bivwalo byabo ku mawulu a ndumbana, lizina lyendi Shaulu.

⁵⁹ Oho bamupuhilenga mamanya, Shetefwano walombelele ngayi, “Mwene Yeshu, tambula moyo wami!”

⁶⁰ Niho ashinkamine, pe wabilikizile shikuma ngayi, “Mwene, hinga ubalabila ou wubi!” Oho amanine kwamba noho, wafwile.