Milimo 6 - Libuka Lya Kuyela

Baka kuyavwa mutanu na babili

¹ Ha matena ayo, oho bandongesha bavulilenga, kwekalile nkani mukati ka Bayunda baya bambilenga Shingiliki na Bayunda baya bambilenga Shihebelu. Ndaba bamfwile ba Bayunda baya bambilenga Shingiliki babakendele kaliha babafulankanine ha kutapila bya kuyavwiwa kwa ha mutena ha mutena.

² Niho bantumwana balikumi na babili behanine kazunga ka bandongesha, pe bambile kukwabo ngayi, “Kufwanina shifwako etu tushiye ku shimikila lizu lya Nyambi ngayi tubalike kutapishila bantu byakulya.

³ Nohobene bawushinda, hatenu balume mutanu na babili hakati kenu baya ba mpupo yayiwahe, banenzala na Moyo wa Kuyela bali na ngana, tubapanike ou mulimo.

⁴ Haya etu tukalipana ku malombelo na ku shimikila lizu lya Nyambi.”

⁵ Shambo eshe shawahilishile likunge lya bantu, pe bahatile Shetefwano, mulume wenzalile na kukulupila na Moyo wa Kuyela na Fwilipu na Polokolashi na Nikanola na Timoni na Pamenashi na Nikolashi ou wengile mukamatunga waku Antiyoke wakulupilile mu biheka bya Shiyunda.

⁶ Babemikile kumbili ya bantumwana, babalombelele na ku bakambika maboko.

⁷ Pe lizu lya Nyambi lyahanyine. Bandongesha bavulile shikuma mu Yelushalema. Kami wingi wa bakankombela babengi bombatalile na kukulupila.

Kukwatiwa kwa Shetefwano

⁸ Shetefwano wengile muntu ou Nyambi atandalishile shikuma kami wamwinzalishile na ngovu, pe watendele bimonekesho na bikomokesho byabinene ku bantu.

⁹ Ngoboni kwezile bantu bamulwishile bafumine ku Shinangonge shatumbiwile ngayi, “Bantu Bakushoboloka.” Muyo mwekalile Bayunda ba ku Shilene na ku Alekizandiliya na baya ba ku litunga lya Shilisha na Esha, pe batatikile kulikanangana na Shetefwano.

¹⁰ Ngoboni kaliha bamutweshele ndaba Shetefwano wambile na ngana za kufuma ku Moyo wa Kuyela.

¹¹ Niho bahongele bantu bamo kwamba ngayi, “Tunamuyuvwu hamba mazu akuhandula Moshesha na Nyambi!”

¹² Nohobene bashonkomwene mitima ya bantu na bakulwane ba Bayunda na bakakulongesha ndayano. Bakwatile Shetefwano, pe bamutwalile ku nkuta.

¹³ Niho baletele bapaki ba mahalo, bambile ngayi, “Ou muntu uli na kulwisha Litala lya Nyambi lya kuyela na mulao wa Moshesha.

¹⁴ Ndaba tunamuyuvwu hamba ngayi Yeshu waku Nazaleta ukashiwula Litala lya Nyambi ukafutula biheka nimwabyo biya atupanine Moshesha!”

¹⁵ Nimwabo bekalile mu nkuta bamunconcomekele, bamonene lupala lwendi ngo lupala lwa lingeloyi.