Milimo 25 - Libuka Lya Kuyela

Paulu ukunyepa kuyatishiwa kuli Mwene Nkeshali

¹ Oho Fweshitashi akumine mu litunga liyo, kunyima ya matena ahatu wafumine mu Sheshaliya kuya ku Yelushalema.

² Nikwo bakankombela ba bakulwane na bakulwane ba Bayunda bamutongwezele mulandu wa Paulu. Banyepele Fweshitashi

³ ngayi abayamizize ha kutumina Paulu ku Yelushalema. Bambile noho ndaba bekalile na bihanganiko bya kumubelamina mu nzila ngayi bamuzihe.

⁴ Fweshitashi wakumbwile ngayi, “Paulu ukulamiwa mu tolongo mu Sheshaliya, pe amimwine nikabokelako wuluno.

⁵ Nohobene bakakutwaminina benu baye hamo nami, bakamuyatishe ou muntu ndi kuli shuma anabipishi.”

⁶ Fweshitashi wekalile nabo ku Yelushalema matena a kubula kupitakana mutanu na ahatu hinge likumi, wayile ku Sheshaliya. Ha mutena wakulundamina hinga ekala ha shipona sha kuyatila milandu, wabatongwezele ngayi balete Paulu.

⁷ Paulu oho akumine, Bayunda aba bafumine ku Yelushalema, bemanine na kumuzinguluka, babangilile Paulu milandu yayingi, eye niyo babulile kutwesha ku monesha ngayi ya kupwisha.

⁸ Paulu mu kuliyawila kwendi wambile ngayi, “Kowa shuma ninabipishi ku ndayano za Bayunda, hinga ku Litala lya Nyambi, hinga kuli Nkeshali.”

⁹ Ngoboni Fweshitashi washingile ku wahilisha Bayunda, wepwile Paulu ngayi, “Kati ukwitabila kuya ku Yelushalema mu kuyatiwa ku meho ami ndi?”

¹⁰ Ngoboni Paulu wambile ngayi, “Nemana ku nkuta ya Nkeshali, oku niku fwanina kuyatiwa. Kaliha ninabipishili Bayunda nehi obe ukulimuka shiwahe.

¹¹ Ndi ami nina bipishi, kami natende shuma sha ku fwanina kufwa, nifwako ku kana kufwa. Ngoboni ndi ebye bakwamba kaliha bya kupwisha, kowa muntu ukampanika kukwabo. Ami nikunyepa kuya kuli Nkeshali.”

¹² Niho Fweshitashi, ha kumanisha kuliyuvwashana na bakankuta yendi, wambile ngayi, “Obe unanyepe kuya kuli Nkeshali. Ukaya kuli Nkeshali.”

Paulu ku meho a Angilipa na Mbenishi

¹³ Munyima ya matena amina, Mwene Angilipa hamo na mukazendi Mbenishi bayile ku Sheshaliya mu kushangwisha Fweshitashi.

¹⁴ Oho bekalile matena amengi, Fweshitashi watontwelele uya mwene byambo bya Paulu. Wambile ngayi, “Kuli muntu umo kuno ou Fwelekishi ashiyile mu tolongo.

¹⁵ Oho nekalile ku Yelushalema, bakankombela ba bakulwane na bakulwane ba Bayunda bantontwelele byendi, banyepele ngayi nimuyate.

¹⁶ Ngoboni naba kumbwile ngayi kaliha shiheka sha Baloma kupanika muntu ku kufwa. Mukakuyatishiwa watatikanga kuliwana na bakakumuyatisha na kuwana mwanya wa kuliyawila ku mulandu banamuyatishi.

¹⁷ Oho bezile kuno, kaliha nehalile, nekalile ha shipona sha kuyatila nabatongwezele ngayi ou muntu bamulete kukwami.

¹⁸ Bakakumulwisha bemanine, kaliha bamuyatishile na mulandu wa noho nehi nahanganikile.

¹⁹ Balikananganishile nendi ha bya kukulupila kwabo na ha muntu lizina lyendi Yeshu, uya wafwile, ou Paulu ambile ngayi wamumi.

²⁰ Nakwangile mwakuwanina ebye byambo. Niho namwipwile Paulu ndi ukwitabila kuya ku Yelushalema ngayi bakamuyate.

²¹ Ngoboni Paulu wanyepele ngayi alamiwe mu tolongo kutatilila Nkeshali kuyata eshe shambo. Hohobene nabatongwezele ngayi bamulame mu tolongo kukuma na ku mutena nikamutuma kuli Nkeshali.”

²² Niho Angilipa atongwezele Fweshitashi ngayi, “Ami kami nikushinga kuyuvwa ou muntu hamba.” Fweshitashi wambile ngayi, “Ukamuyuvwa nzona.”

²³ Oho kwashile, Angilipa na Mbenishi bezile na wulolo wa wene. Benginine mu nkuta na bakulwane banzita na bakulwane ba mu munzi. Fweshitashi wabatongwezele ngayi balete Paulu, niho bamuletele.

²⁴ Fweshitashi wambile ngayi, “Mwene Angilipa, nenu nimwenu muli netu muno, munamono ou muntu. Bayunda nimwabo banyepele ku Yelushalema na kuno kami na kubilikiza ngayi wufwako ku fwanina kuyoya.

²⁵ Ngoboni ami nifwako kuwana mulandu waku fwanina ngayi afwe. Ndaba ngayi niye mwine wanyepele ngayi mulandu wendi akauyate Mwene Nkeshali nafungile kumutuma.

²⁶ Ngoboni nifwasho shuma sha kutikita kuli Mwene bya nou muntu. Nohobene namulete kukwenu, shinene kuli Mwene Angilipa, ngayi oho ukamuyipwiziza niwane shuma sha kutikita.

²⁷ Ndaba kukwami sha kubula ku fwanina kutuma kayili kwakubula ku shimika mulandu unapanikiwi kukwendi.”