Milimo 21 - Libuka Lya Kuyela

Paulu ukuya ku Yelushalema

¹ Munyima ya kulitapa nabo twayile, niho twezile na kululumana ku Koshi, mutena wakulundamina twezile ku Londi, kufuma oku twayile ku Patala.

² Twawanineko wato wayilenga ku Fonisha, twengininemo, niho twayile.

³ Oho twakumine ku mbalila iya twatweshele ku mona litunga lya Shayipulashi, twalulumanine ku mabukubuku alyo, niho twayile ku Shiliya. Twafuwikilile mu Tile, ndaba muyo nimo shishepe shalongwelenga biyeko.

⁴ Twawaninemo bandongesha bamo, niho twekalile nabo matena mutanu na abili. Na ngovu za Moyo, batongwezele Paulu ngayi hinga aya ku Yelushalema.

⁵ Oho shikati sha kwikala nabo shamanine, twabashiyile, niho twayilenga ha mukala wetu. Bakakukulupila nimwabo hamo na bakazabo na banababo, batushindikizile. Twashiyile munzi, pe oho twakumine ku shibumbo, twashungumanine niho twalombelele.

⁶ Twalishalishile umo na wamina niho etu twenginine mu shishepe, pe nibo babokele kukwabo.

⁷ Twatwalilileho mu mukala wetu. Kufuma ku Tile twayile ku Pitolemayashi, twalishangwishile na bakakukulupila, pe niho twonzele nabo mutena umo.

⁸ Oho kwashile, twafumine kuyo niho twayile ku Sheshaliya. Twakekalile mu litala lya Fwilipu mukakushimikila, ou wengile umo wa ba mutanu na babili.

⁹ Fwilipu wekalile na bana ba bambuyama banaa bakubula kuyekiwa, aba balubulwilenga.

¹⁰ Oho twekalile kuyo matena amengi, kwezile muluwe wamina lizina lyendi Angabushi, wafumine ku Yundeya.

¹¹ Oho akumine kukwetu, washimbile mukunzi wa Paulu, walimangilewo ku maboko na ku mawulu, wambile ngayi, “Moyo wa Kuyela ukwamba ngayi, ‘Bayunda mu Yelushalema nisho bakamanga mwine ou mukunzi na kumupanika ku maboko a Bakamatunga.’ ”

¹² Oho twayuvwile ebye, etu hamo na bantu bekalile kuyo twalambililile Paulu ngayi hinga aya ku Yelushalema.

¹³ Ngoboni Paulu wakumbwile ngayi, “Kati muli na kutenda bishini oho mu kulila na kuntabula mutima? Ndaba naliwahishilakale, kaliha kumangiwa tuhu, ngoboni kufwila lizina lya Mwene Yeshu mu Yelushalema.”

¹⁴ Oho akanine kumukandamika, twamulehele, pe twambile ngayi, “Shifungo sha Nyambi shitendiwe.”

¹⁵ Munyima ya matena ayo, twalibalakanyine, niho twayile ku Yelushalema.

¹⁶ Bandongesha bamo ba ku Sheshaliya twayile nabo, batutwalile ku litala lya Nashoni kuya twafwaninine kwikala. Minashoni wengile waku Shayipulashi, kami wengile umo wa bakakukulupila bakutatika.

Paulu ukuzingula Yakoba

¹⁷ Oho twakumine mu Yelushalema, bakakukulupila batutambwile na ku wahilila.

¹⁸ Oho kwashile, Paulu wayile netu kuli Yakoba, kuyo kwakungulukilile bakulwane nimwabo ba litengo.

¹⁹ Munyima ya kulishangwisha, Paulu watontwelele nimwabyo atendele Nyambi mukati ka Bakamatunga ha mulimo wendi.

²⁰ Oho bayuvwile ebye, bayemezele Nyambi. Pe bambile kukwendi ngayi, “Wunamono taha obe kawushinda wetu Paulu ngayi, makulukazi anga a Bayunda banengi bakakulupila, kami nimwabo banalifungwili ku ndayano.

²¹ Banabatongweze byobe ngayi unalongeshenga Bayunda nimwabo bekala mukati ka Bakamatunga ngayi bafutamine Ndayano za Moshesha, unatongwezenga ngayi kaliha banafwanini kutwala bana babo ku mukanda hinge kulama biheka bya shihemwa.

²² Haya kukatendiwa nahiti? Ndaba mwa shikuma bantu babengi bakayuvwa ngayi obe unezi.

²³ Nohobene tenda eshe tukukutongweza. Tuli na balume banaa muno aba banalibeze.

²⁴ Bashimbe uye na kuliyelesha nabo hamo, ubayumbile ebye bikushingiwa, ngayi batweshe ku shehiwa ku mitwe yabo. Pe bantu nimwabo bakalimuka ngayi ebye babatongweza byobe kaliha bya kupwisha, ngoboni obe ukuyoya ngo mwayila Ndayano za Moshesha.

²⁵ Haya Bakamatunga aba banengi bakakukulupila, tuna batumini liñwati lya kubatongweza eshe tunayata ngayi, kaliha banafwanini kulya byakulya banakombelele ku tunankishi, hinge kulya mukeza, hinge kulya kayamana nashikiwi nkozo, kami banafwanini kulilama ku wunjenge.”

²⁶ Paulu niho ashimbile baya balume, pe oho kwashile, watendele shimbo sha kuliyelesha hamo nabo. Niho ayile mu Litala lya Nyambi na kubatongweza ngayi akenga matena anga kutwala ku mutena wamamaninino wakuliyelesha, oho nkombela ya muntu na muntu eze yikatweshe kutupuliwa.

Paulu ukukwatiwila mu Litala lya Nyambi

²⁷ Matena mutanu na abili oho shilolo amane, Bayunda ba mu litunga lya Esha, bamonene Paulu mu Litala lya Nyambi, bahongele bantu nimwabo, pe bamukwatile.

²⁸ Babilikizile ngayi, “Enu bantu ba Ishalela, tuliyavwenu! Ou muntu niye uku longesha bantu nimwabo kuti na kuti kulwisha bantu ba Ishalela na ku bakanisha kulama Ndayano za Moshesha na za Litala lya Nyambi. Haya nehe unalete Bakamatunga mu Litala lya Nyambi na Kubipisha mwanya ou wa kuyela.”

²⁹ (Bambile ebye, ndaba bamonene Tolofwimashi waku Efweshe, balihamo na Paulu mu munzi, pe bahanganikile ngayi Paulu namulete mu Litala lya Nyambi.)

³⁰ Niho munzi nimwawo wayakukile, bantu nimwabo betukile hamo, bakwatile Paulu, bamukokelele ha munkanda wa Litala lya Nyambi. Hohobene bashinkile bihala bya ku Litala lya Nyambi.

³¹ Oho bashingile kumuziha, lizu lya kumine ku mukulwane wa banzita wa Baloma ngayi Yelushalema nimwayo yili mu mushunga.

³² Pe niye wanguwangu washimbile banzita na bakakulama, wetukilile kuya kwekalile likunge. Oho bantu bamumonene na banzita, balehele kukama Paulu.

³³ Niho uya mukulwane wa banzita wayile kuli Paulu wamukwatile, pe wambile ngayi amangiwe na mawenge abili. Niho epwile ngayi, “Kati ou muntu niye yani? Kami unatende bishini?”

³⁴ Pe bamo mukati ka likunge babilikizile shuma shimo, bamina shashenge. Kwekalile miyoyo, pe mukulwane wa banzita wakwangile ku yuvwishisha ebye byatendiwile, niho atongwezele bantu bendi ngayi batwale Paulu bakamupatile mu litala lya banzita.

³⁵ Oho bakumine ha kukundamina, banzita bakatwile Paulu ndaba ya mushunga wa bantu.

³⁶ Likunge lya bantu baya bakonkelenga munyima babilikizilenga ngayi, “Azihiwe!”

Paulu ukulilamwina

³⁷ Paulu oho ashingile kutwaliwa ku litala lya banzita, wambile ku mukulwane wa banzita uyo ngayi, “Nikutwesha kwamba kukwobe ndi?” Niye wamwipwile ngayi, “Wukulimuka kwamba Shingiliki ndi?

³⁸ Kati kaliha obe Kaengepita ou nalete mishunga sha wuluno, ou na twaminini banzita 4,000 mu libelelengwa ndi?”

³⁹ Ngoboni Paulu wambile ngayi, “Ami nili Kayunda wa mu munzi wa Talishashi mu Shilisha, muntu wa likota lya lukena lwalunene. Nikunyepa ngayi umpeko shikati sha kwamba ku bantu.”

⁴⁰ Oho amwitabilishile, Paulu wemanine ha tukandamisho, walabizile bantu na liboko ngayi bamwene. Pe oho bamwenene, Paulu wambile mu lulimi lwa Shihebelu.