Milimo 18 - Libuka Lya Kuyela

Paulu mu Kolinte

¹ Munyima ya byuma ebye Paulu wafumine mu Atene, wayile ku Kolinte.

² Kuyo wakawanineko Kayunda ukutumbiwa ngayi Akwila, niye wahemuwilile mu Pontashi, wamuwanine ngayi nafumu sha wuluno ku Itali hamo na Pulishila mukazendi, ndaba Kilaundiyashi wayakile ndayano ngayi Bayunda nimwabo bafume mu Loma. Paulu wayile na kubamona,

³ pe ndaba naniye wengile mukakutenda matente ngonehe nibo, wakekalile nabo na kutenda nabo milimo hamo.

⁴ Ha Matena aku Katala nimwawo, Paulu wambilenga ku Bayunda na Bangiliki mu shinangonge, ngayi ezeke ku batengulula.

⁵ Oho Shilashi na Timoteo bezile kufuma ku Mashendoniya, Paulu wayakile shikati shendi nimwasho ku kushimikila lizu, wapakilenga ku Bayunda ngayi Yeshu niye Kilishitu.

⁶ Oho Bayunda bamukananganine na kumuhandula wabashiyile, pe watotomwene lukungu ku bivwalo byendi wambile ngayi, “Mukeza wenu wikale ha mitwe yenu, ami mulandu nifwawo. Kufuma kulelo nikaya ku Bakamatunga.”

⁷ Oho abashiyile, wayile na kwikala mu litala lya muntu wamina watumbiwile Tayitashi Yashitashi ou wengile mukakulemesha Nyambi. Litala lyendi lyekalile hahepi na shinangonge.

⁸ Kilishipashi ou wengile mukakutwaminina wa mu shinangonge na baka litala lyendi nimwabo bakulupilile kuli Mwene na Bakakolinte bamina babengi, oho bayuvwile lizu bakulupilile, pe bazubilishiwile.

⁹ Wushiku wamina, Paulu wekalile na shimono, muneshe Nyambi ambile kukwendi ngayi, “Hinga utina, twalililaho ku shimikila, hinga wushiya,

¹⁰ ndaba ami nili nobe, kami kowa muntu ukakulwisha na kukulemeka, ndaba nili na bantu babengi muno mu munzi.”

¹¹ Niho Paulu ekalilemo mwaka umo na zingonda mutanu na imo, halongesha bantu lizu lya Nyambi.

¹² Oho Ngaliyo engile kalela wa Akaya, Bayunda baliwanikile, niho bakwatile Paulu, pe bamutwalile ku nkuta.

¹³ Bambile ngayi, “Ou muntu uli na kukandamika bantu ngayi balemeshe Nyambi mu nzila ya kulwisha ndayano!”

¹⁴ Ngoboni oho Paulu ashingile kwamba, Ngaliyo wambile ku Bayunda ngayi, “Shinga ebye byambo bya kutenda wubi, hinge bya mulandu wawunene, shinga nikutwesha kumiyuvwilila enu Bayunda.

¹⁵ Ngoboni ndaba bya mayipu a mazu na mazina na ndayano zenu, bimanishenu enu bamwine. Ami kutwesha kwinga mukakuyata bya noho nifwako!”

¹⁶ Niho abatandile mu nkuta.

¹⁷ Pe nimwabo bakwatile Shoshiteneshi, mukulwane wa shinangonge, niho bamukamine kumbili ya nkuta. Ngoboni Ngaliyo kaliha wayakileko bihanganiko.

Paulu ukuboka ku Antiyoke

¹⁸ Paulu wekalile na bakakukulupila matena amengi mu Kolinte, niho ayile ku Shiliya mu wato, hamo na Pulishila na Akwila. Paulu washehele huki zendi mu Shenkeliya, ngonehe shiheka sha Bayunda sha ku monesha ngayi nalama kulibeza.

¹⁹ Oho akumine ku Efweshe, Paulu washiyile Pulishila na Akwila, niho enginine mu shinangonge, pe walikananganishile na Bayunda.

²⁰ Bantu bamunyepele ngayi ekale nabo matena amengi, ngoboni kaliha wetabilile.

²¹ Nohobene wabatongwezele oho abashalishilenga ngayi, “Ndi Nyambi ukwitabila, nikaboka kami kukwenu.” Niho afumine ku Efweshe, wayile na wato.

²² Oho afuwikile ku Sheshaliya, wakankalalile ku Yelushalema na kushangwisha litengo, niho akunkulukilile ku Antiyoke.

²³ Oho ekalilemo matena akwezekela, wafunzukile, pe wayile na kuzingula litunga nimwalyo lya Ngalatiya na Fwilingiya, washumishilenga bandongesha nimwabo.

Apoloshi mu Efweshe na mu Kolinte

²⁴ Ha shikati shiyo Kayunda wamina watumbiwile ngayi Apoloshi, ou wahemuwilile mu Alekizandiliya, wezile ku Efweshe. Wengile mukakulimuka ku shimikila, kami walimukile shikuma biya byatikitiwa.

²⁵ Bamulongeshele nzila ya Mwene, pe wekalile na ntukumina shikuma, washimikilile na ku longesha shiwahe bya Yeshu, walimukile tuhu kuzubilisha kwa Yowano.

²⁶ Watatikile ku shimikila na kukanca mu shinangonge. Oho Pulishila na Akwila bamuyuvwile, bamutwalile kukwabo, pe bakamulongeshele nzila ya Nyambi shiwahe shikuma.

²⁷ Oho Apoloshi ashingile kuya ku Akaya, bakakukulupila ba mu Efweshe bambile nendi mazu akumushumisha, niho batikitilile bandongesha ba mu Akaya ngayi bamutambule shiwahe. Oho akumine ku Akaya, wayavwile shikuma baya bakulupilile na nceshe za Nyambi.

²⁸ Walikananganishile shikuma na Bayunda mwaanancanana, waliyavwishile byatikitiwa kupaka ngayi Yeshu niye Kilishitu.