Milimo 17 - Libuka Lya Kuyela

Paulu na Shilashi ku Teshalonika

¹ Paulu na baminendi bapitile mu Amfwipolishi na mu Apoloniya, bezile ku Teshalonika, nimo mwekalile shinangonge ya Bayunda.

² Ngo shiheka shendi, Paulu wenginine mu shinangonge. Ha Matena ahatu aku Katala, wambile nabo hanebye byatikitiwa,

³ na kubatontolwela na kwamba shintwantwa ngayi Kilishitu wafwaninine kuyanda na ku shanguka ku bafu. Paulu wambile ngayi, “Yeshu ou ni ku shimikila kukwenu, niye Kilishitu.”

⁴ Bamo kukwabo bakulupilile, balifungilile kuli Paulu na Shilashi. Wingi wabo bengile Bangiliki aba balemeshelenga Nyambi hamo na bakazi babalemu.

⁵ Ngoboni Bayunda bamo aba babulile kukulupila bekalile na mwili, bakungulwile bantu bababi bakubula milimo bawaniwilenga ha myanya ya kulandishila kwiza mukutenda mushunga. Niho bayile ku litala lya Yashoni na kushinga Paulu na Shilashi ngayi babatutwishe ku bantu.

⁶ Oho babulile kubawana, bakwatile Yashoni na bakakukulupila bamo kubatwala kuli bakulwane ba mu munzi. Pe babilikizile ngayi, “Bantu aba banalete wukalu mu kaye nimwamo banezi kuno

⁷ na Yashoni unabatambulu. Nimwabo aba ba kutenda bya kukana ndayano za Nkeshali na kwamba ngayi kuli Mwene wamina lizina lyendi Yeshu.”

⁸ Bantu na batulela ba munzi bapilamine oho bayuvwile byuma ebye.

⁹ Oho Yashoni na baminendi bapatalile uya mulandu waku bashobola, pe babalehele ngayi baye.

Paulu na Shilashi ku Mbeliya

¹⁰ Wanguwangu, oho kwengile wushiku, bakakukulupila bafumishile Paulu na Shilashi na kuya ku Mbeliya. Oho ba kumineko, benginine mu shinangonge ya Bayunda.

¹¹ Bayunda ba ku Mbeliya bengile bantu ba mitima ya ku shoboloka kupitakana baka Teshalonika, ndaba batambwile lizu na kuyipwiziza, kami mutena na mutena bashingishishilenga byatikitiwa ngayi bamone ndi ebye ambile Paulu bya kupwisha.

¹² Nohobene babengi mukati kabo bakulupilile, ku Bangiliki bambuyama babalemu hamo na balume bakulupilile.

¹³ Ngoboni Bayunda ba ku Teshalonika, oho bayuvwile ngayi Paulu unashimikili lizu lya Nyambi kami na ku Mbeliya, bezileko nabo mu kuhonga bantu.

¹⁴ Hohobene bakakukulupila batumine bantu ngayi bafumishe Paulu ku liwate, ngoboni Shilashi na Timoteo bashalile ku Mbeliya.

¹⁵ Bantu bashindikizile Paulu bakamukumishile mu Atene. Niho babokele ku Mbeliya, Paulu hinga abalaya ngayi bakatongweze Shilashi na Timoteo, ngayi beze wanguwangu kukwendi.

Paulu na Shilashi ku Atene

¹⁶ Paulu oho atatilililenga Timoteo na Shilashi ku Atene, moyo wendi wayenene shikuma, oho amonene ngayi munzi unenzala na tunankishi.

¹⁷ Nohobene walyambashaninenga mu shinangonge na Bayunda na Bakamatunga bakakulemesha Nyambi. Walyambashanine na bantu awanine ha mwanya wakulandishila ha mutena na mutena.

¹⁸ Bakangana bakakanzunga ka Baepikule na Bashitoika, balikananganishile nendi. Bamo bambile ngayi, “Kati ou mubwayi ukwamba bishini?” Bamina bambile ngayi, “Uku moneka uku shimikila bya banyambi bashenge.” Bambile nahiyo ndaba Paulu washimikilile ncango zaziwahe za Yeshu na bya ku shanguka ku bafu.

¹⁹ Niho bamutwalile Paulu ku nkuta yatumbiwile Alipangashi, bambile ngayi, “Etu tukushinga kulimuka oku ku longesha kwakupya.

²⁰ Ndaba byuma ebye uku shimikila byabipya, nohobene tukushinga kulimuka ngayi byuma ebye bya nahiti.”

²¹ (Bantu nimwabo ba Atene na bayeni bekalile kuyo, bamanishile shikati shabo mu kuyuvwilila byabipya na kwambola.)

²² Paulu wemanine hakati ka kanzunga ka Alipangashi, wambile ngayi, “Enu bantu ba Atene, mu byuma nimwabyo niku mona ngayi muli bakakulemesha.

²³ Ndaba aha nazinguzuku mu munzi na ku mona byuma mu kulemesha, ninawana kaala katikitiwi ngayi, ‘Kuli Nyambi wakubula kulimukiwa.’ Nohobene ou mu kulemesha wakubula kulimuka, niye ni ku shimikila kukwenu.

²⁴ Nyambi ou walengele kaye na byuma nimwabyo bilimo, niye Mwene wa liyilu na hanci. Kwikala mu matala akulemeshela akutendiwa ku bantu wufwako.

²⁵ Kami kumulemesha bantu na maboko wufwako, ngo wakubula shamina. Ndaba niye ukupanika ku nimwabo wumi na moyo na byuma nimwabyo.

²⁶ Kufuma ku muntu umo Nyambi watendele mishobo nimwayo ya bantu ngayi bekale hano hanci. Wayakile bikati bya ku fwanina na zinginza za kuzika kwabo.

²⁷ Nyambi washingile ngayi bantu bamushingeshinge, kampe ba kumuwana. Ngoboni niye kaliha wekala kwakutali nanetu.

²⁸ Ndaba umo wambile ngayi, ‘Mumwendi tukuyoya na kwenda na kwikala.’ Ngonehe baka ku tangashana bamo ba kukwenu bambile ngayi, ‘Etu kami tuli bana bendi.

²⁹ “Nohobene ndaba ngayi tuli bana ba Nyambi, kaliha twafwanina kuhanganika ngayi Nyambi ukufweka ngo ngolinde hinga shiliva, hinga limanya lya ku baziwa na kukeya kwa muntu.

³⁰ Nyambi kwanuka bikati biya bantu bekalile na wulube wufwako, ngoboni wuluno ukulayelela bantu nimwabo ngayi batenguluke ku wubi wabo.

³¹ Ndaba wemikile mutena ou akayata bantu ba hano hanci na kwoloka na muntu uyo emikile, kami unalimukishi bantu haneshe ha kumushangula ku bafu.”

³² Oho aba bantu bayuvwile shambo sha ku shanguka ku bafu, bamo bamuhepele, ngoboni bamina bambile ngayi, “Tukakuyuvwa kami na shambo eshe.”

³³ Niho Paulu afumine mukati kabo.

³⁴ Ngoboni bantu bamina bamukonkele na kukulupila. Hakati kabo hekalile Ndeonishi wa mu Alipangashi na mukazi umo watumbiwile Ndamali na bamina.