Milimo 16 - Libuka Lya Kuyela

Timoteo ukuya na Paulu na Shilashi

¹ Paulu wakumine ku Ndeliba, niho ayile ku Lishitila, kuyo kwekalile ndongesha wa lizina lya Timoteo. Mandiyendi wengile Kayunda kami wengile mukakukulupila, tatiyendi wengile Kangiliki.

² Timoteo wekalile na mpupo yayiwahe mukati ka bakakukulupila ba ku Lishitila na Ikoniyamu.

³ Paulu washingile Timoteo ngayi aye nendi, pe wamutwalile ku mukanda. Watendele nahiyo, ndaba Bayunda bekalile mu zimbalila ziyo, nimwabo balimukile ngayi tatiyendi wengile Kangiliki.

⁴ Oho bapitilenga mu minzi, babatongwezele mazu aya bamangile bakakukulupila na bakulwane ba mu Yelushalema ngayi bawalame.

⁵ Pe matengo nimwawo ashumine mu kukulupila, kami akulilenga ha mutena na mutena.

Shimono sha Paulu mu Tolowashi

⁶ Bayile na kupita mu litunga lya Fwilingiya na mu Ngalatiya, kami Moyo wa Kuyela wabakanishile ku shimikila lizu mu Esha.

⁷ Oho bakumine ku nginza ya Mishiya, bezekele kuya mu litunga lya Mbitiniya, ngoboni Moyo wa Yeshu kaliha wabetabilishile.

⁸ Niho bapitile mu Mishiya, pe bayile ku Tolowashi.

⁹ Ku wushiku, Paulu wekalile na shimono muya amonene muntu waku Mashendoniya hinga emana, pe wamunyepele ngayi, “Yeka kuno ku Mashendoniya, ukatuyavwe!”

¹⁰ Pe oho Paulu amonene eshe shimono hohobene twakatukile na kuya ku Mashendoniya, ndaba twahanganikile ngayi, mwa shikuma Nyambi unatwihana ngayi tukashimikile ncango zaziwahe kukwabo.

Lindiya ukutenguluka mu Fwilipu

¹¹ Twafumine ku Tolowashi na wato, pe twalulumanine ku Shamotilake, oho kwashile, twafuwikilile mu Neyapolishi.

¹² Oho twafumine kuyo twayile ku Fwilipu, munzi wakutumbalala mu Mashendoniya, ou wekalile mu maboko a Baloma. Twekalile kuyo matena amengi.

¹³ Ha Mutena Wakukatala twatutikile ha munzi, pe twayile ku shibumbo sha mushinzi, niko twahanganikile ngayi tukawana mwanya wakulombelela. Twekalile hanci na kwamba ku bambuyama ba kungulukileko.

¹⁴ Mbuyama wamina watumbiwile Lindiya mukakulandisha makwiza a wuhombo, wa mu munzi wa Tiyatila, ou wengile mukakulemesha Nyambi, watuyuvwililenga. Niho Mwene ashinkwilile mutima wendi ngayi ayuvwishishe ebye ambilenga Paulu.

¹⁵ Oho niye azubilishiwile na baka litala lyendi, watwihanine, pe wambile ngayi, “Ndi munanyakako ngayi nili mukakukulupila muli Mwene, tuyenunga mukekale mu litala lyami.” Niho atukandamikile.

Paulu na Shilashi ba kutwaliwa mu tolongo ku Fwilipu

¹⁶ Ha mutena umo, oho twayilenga na kulombela, twalihanganine na mbuyama umo wa ndungo, ou wekalile na mayimbwe aya amutwesheshele kwaula biya bikatendiwa kumbili. Waheteshele bamwine wendi shikuma nanebye ambilenga.

¹⁷ Wakonkele Paulu nanetu, habilikiza ngayi, “Aba bantu banengi bakamilimo ya Nyambi Wakukangana, ba ku shimikila kukwenu nzila ya kupuluka!”

¹⁸ Watendelenga noho matena amengi. Niho Paulu apilamine, wafutukile, wambile ku mayimbwe ngayi, “Nikukwambila mu lizina lya Mwene Yeshu Kilishitu ngayi, fuma mumwendi!” Pe afumine ha shikati shiyobene.

¹⁹ Ngoboni oho bamwine wendi bamonene ngayi haya kulumbeza kwabo kwa kuwana mali ku namana, bakwatile Paulu na Shilashi, babatwalile ku bakandayano ku mbanza ya ha munkanda.

²⁰ Babatwalile ku bakakuyata, pe bambile ngayi, “Aba bantu banengi Bayunda, bali na kuleta mushunga mu munzi wetu.

²¹ Bali na ku longesha biheka ebye tukubula ku fwanina kutambula hinge tukubula ku fwanina kutenda etu Baloma.”

²² Likunge lya bantu baliwanikile na kulwisha Paulu na Shilashi. Niho bakakuyata batabwile bivwalo bya Paulu na Shilashi, niho batongwezele bantu ngayi babakame.

²³ Oho bamanishile ku bakama zinyanzi zazingi, babengizile mu tolongo, balayile mukakulama ngayi batuyili abalame shiwahe.

²⁴ Oho mukakulama ayuvwile noho, wabengizile mukati ka tolongo, wamangilile mawulu wabo mu likulo.

²⁵ Hakati ka wushiku Paulu na Shilashi balombelelenga na kwimbila nyimbo za kulemesha Nyambi, batuyili babayuvwilililenga.

²⁶ Wanguwangu kwekalile kukanka kwakunene kwa hanci, mwimbi wa tolongo wanyenkanine na bihala nimwabyo byashinkulukile, kami mawenge nimwawo ashobolokele.

²⁷ Niho mukakulama tuyili mu tolongo wapindukile mu tulo, oho amonene bihala bya tolongo binashinkuluku, wahomwene mukwale wendi ngayi alizihe, ndaba wahanganikile ngayi batuyili banashili.

²⁸ Ngoboni Paulu wabilikizile ngayi, “Hinga ulilemeka! Nimwetu nimo tuli!”

²⁹ Niho mukakulama ehanine ngayi bamuletele lumuni, wenginine na wangu mukati, wawile hanci ku mawulu a Paulu na Shilashi hakanka.

³⁰ Niho abatutwishile ha munkanda, wambile ngayi, “Enu bahekulu, niku fwanina kwinga nahiti ngayi nipuluke?”

³¹ Bakumbwile ngayi, “Kulupila muli Mwene Yeshu, pe ukapuluka obe na baka litala lyobe.”

³² Niho bashimikilile lizu lya Mwene kukwendi na ku baya nimwabo bekalilenga mu litala lyendi.

³³ Wabashimbile shikati shiyo sha wushiku, niho ayoweshele ha bitombo byabo. Hohobene, wazubilishiwile hamo na baka litala lyendi nimwabo.

³⁴ Niho atwalile Paulu na Shilashi mu litala lyendi, wabapanine byakulya, pe wawahililile ndaba wakulupilile muli Nyambi hamo na baka litala lyendi nimwabo.

³⁵ Oho kwashile, bakakuyata batumine bamapokola ku mukakulama ngayi, “Leha obo bantu bayenga.”

³⁶ Mukakulama tuyili watongwezele Paulu ngayi, “Bakakuyata banamba ngayi obe na Shilashi nimishobolole. Haya mu kutwesha kuya. Yenunga na ku mwena.”

³⁷ Ngoboni Paulu wambile kukwabo ngayi, “Batukama kumbili ya bantu, oho shilolo batuyatishe, etu tuli Baloma, kami batuyaka na mu tolongo, haya bakushinga kutufumishila kuwi ndi? Byo! Balehenu nibo bamwine beze na kutufumisha.”

³⁸ Bamapokola bayile na kutongweza awa mazu ku bakakuyata. Oho bayuvwile ngayi Paulu na Shilashi bengile Baloma, batinine.

³⁹ Niho bezile na kulishisha kukwabo, pe babatutwishile ha munkanda, babanyepele ngayi bafume mu munzi.

⁴⁰ Paulu na Shilashi bafumine mu tolongo, pe bayile ku litala lya Lindiya. Kuyo bakaliwanine na bakakukulupila niho babashimikilile mazu akubashumisha. Niho bayile.