Milimo 15 - Libuka Lya Kuyela

Shikungulukilo sha ku Yelushalema

¹ Bantu bamo bezile ku Antiyoke kufuma ku Yundeya, balongeshelenga bakakukulupila ngayi, “Kutwesha kupuluka mufwako ndele muye ku mukanda, ngonehe kwatikitiwa ku Ndayano za Moshesha.”

² Paulu na Mbanambashi batutukile nabo nkani. Niho bayongwele ngayi Paulu na Mbanambashi na bamo ba ku Antiyoke, baye ku Yelushalema ku bantumwana na ku bakulwane na kubepula ha shambo eshe.

³ Litengo lya batumine, bapitile ku litunga lya Fonisha na Shamaliya, babatongwezele eshe Bakamatunga banatengulukili kuli Nyambi. Awa mazu awahililishile shikuma bakakukulupila nimwabo.

⁴ Oho bakumine ku Yelushalema, bakalitengo babatambwile shiwahe na bantumwana na bakulwane. Paulu na Mbanambashi babatongwezele byuma nimwabyo ebye Nyambi atendele kupitila mumwabo.

⁵ Ngoboni bakakukulupila bamo aba bengile ba kumbalila ya Bafwalishi bemanine bambile ngayi, “Shinafwanini ngayi Bakamatunga babatwale ku mukanda na kubatongweza ngayi balame Ndayano za Moshesha.”

⁶ Bantumwana na bakulwane ba litengo bakungulukile hamo mu kuhanganika ha shambo eshe.

⁷ Oho bambwele shikati shashitali, Pita wemanine, pe wambile kukwabo ngayi, “Bawushinda wami, mu kulimuka ngayi shikati sha kunyima Nyambi wahatile mukati kenu, ngayi nishimikile ncango zaziwahe ku Bakamatunga, mwanga bayuvwe na kukulupila.

⁸ Kami Nyambi ou ukulimuka mitima ukupaka kukwabo Bakamatunga na kubapana Moyo wa Kuyela, nehe awupanine kukwetu.

⁹ Nyambi kaliha watutapulwile mukatiketu nanibo, ngoboni wayeleshele mitima yabo na kukulupila.

¹⁰ Haya, shumangani mukwezeka Nyambi na kuyaka mpongoho ha zincingo za bandongesha, eye babulile kutwesha batatizetu hinge etu kuyishimba?

¹¹ Ngoboni tukukulupila ngayi tukapuluka na nceshe za Mwene Yeshu Kilishitu, ngonehe bakapuluka nibo.”

¹² Pe mu shikungulukilo nimwabo bamwenene, bayuvwililile kuli Mbanambashi na Paulu oho bambilenga bya bimonekesho na bikomokesho ebye atendele Nyambi ku Bakamatunga hahabo.

¹³ Oho bamanishile kwamba, Yakoba wakumbwile ngayi, “Bawushinda wami, Nyuvwililenu!

¹⁴ Shimoni unatontololo eshe Nyambi azingwile Bakamatunga ha kutatika, ngayi ahate mukati kabo bantu bakatumbiwa na lizina lyendi.

¹⁵ Mazu a bamiluwe akulitabila nanebye, nehi kwatikitiwa ngayi,

¹⁶ ‘Munyima yanebye nikaboka, nikemika litala lya Ndavita liya lyawile. Nikatendulula mapembe alyo, pe nikaliwahisha.

¹⁷ Nikatenda noho ngayi bantu nimwabo bashinge Mwene, na Bakamatunga baya ba kutumbiwa na lizina lyami.

¹⁸ Nisho ambile Mwene uya waholwele byuma ebye nimwabyo ku shikale.’ ”

¹⁹ Yakoba wazaminine kwamba ngayi, “Eshe shinengi shihanganiko shami ngayi, hinga tuyandisha Bakamatunga banatengulukili kuli Nyambi.

²⁰ Ngoboni tubatikitile liñwati lya kubatongweza ngayi hinga balya bya mazilo ndaba binakombeleliwi ku tunankishi, bafume ku wunjenge na kubula kulya kayamana wakushika nkozo, hinga mukeza.

²¹ Ndaba Ndayano za Moshesha zalabiwilenga bikati bya kunyima mu mashinangonge ha Matena nimwawo aku Katala, pe mazu wendi ashimikiwilenga mu minzi nimwayo.”

Liñwati lyatikitiwilile ku Bakamatunga bakakukulupila

²² Niho bantumwana na bakulwane, hamo na litengo nimwalyo, bahanganikile kuhata bantu mukati kabo ngayi babatume ku Antiyoke hamo na Paulu na Mbanambashi. Bahatile Yundashi watumbiwile Mbashambashi hamo na Shilashi, bantu ba maleema hakati ka bakakukulupila.

²³ Batwalile liñwati likwamba ngayi, “Bawushindawenu bantumwana na bakulwane ba kushangwisha bawushinda bakakukulupila ku Bakamatunga ba mu Antiyoke na mu Shiliya na mu Shilisha.

²⁴ Tunayuvwu ngayi, bantu bamo ba mu kazunga ketu banamikabakanishi na kumishipisha ku mitima na mazu awa twabulile ku balaya.

²⁵ Pe oho twa kunguluka, twaliyuvwashana kuhata bantu na kubatuma kukwenu. Bakwiza hamo na bakakuhakiwa Mbanambashi na Paulu.

²⁶ Aba bantu banalitupulu ndaba ya lizina lya Mwene Yeshu Kilishitu.

²⁷ Nohobene tunatumu Yundashi na Shilashi, nibo bakamitongweza byuma na kanwa, ebye tunatikiti mu liñwati.

²⁸ Ndaba shinamoneke shiwahe ku Moyo wa Kuyela na kukwetu ngayi, hinga tumitwika muziho wawunene wakupitakana ebye binafwanini.

²⁹ Hinga mulya biya binatupuliwi ku tunankishi na mukeza na tuyamana twa kushika nkozo, hinga mutenda wunjenge. Ndi mukalizilika ku byuma ebye mukutenda shiwahe. Yikalenu shiwahe.”

³⁰ Bantumwana batumiwile, pe bayile ku Antiyoke. Bakungulwile nimwabo bakakukulupila hamo, babapanikile liñwati.

³¹ Oho balilabile, bawahililile ndaba ya mazu alyo akubashumisha.

³² Yundashi na Shilashi aba bengile bamiluwe, bashimikilile ku bakakukulupila mazu amengi na ku bashumisha.

³³ Oho bekalile matena amashe, bakakukulupila babafunzwile mu ku mwena kuboka ku baya babatumine. [

³⁴ Ngoboni Shilashi wahanganikile ku shala kuyo.]

³⁵ Ngoboni Paulu na Mbanambashi bashalile mu Antiyoke, balongeshele na ku shimikila lizu lya Mwene hamo na bamina babengi.

Paulu na Mbanambashi bakulitapa

³⁶ Oho kwapitile matena amo, Paulu wambile kuli Mbanambashi ngayi, “Tuyenga kami na kuzingula bawushinda wetu mu minzi nimwayo muya twashimikilile lizu lya Mwene, tukamone ndi bali na hiti.”

³⁷ Mbanambashi washingile ngayi baye na Yowano watumbiwile Mako.

³⁸ Ngoboni Paulu wahanganikile ngayi kaliha shuma shashiwahe kuya nendi ndaba wabashiyile oho bashili ku Pamfwiliya, kami kufuma haya kaliha wayile nabo ku mulimo.

³⁹ Niho kwakatukile nkani zazinene mukati kabo, pe balitapile. Mbanambashi washimbile Mako, benginine mu wato, pe bayile ku Shayipulashi,

⁴⁰ ngoboni Paulu wahatile Shilashi, bakakukulupila babalombelelele nceshe za Mwene. Pe bayile.

⁴¹ Wayile ku Shiliya na Shilisha na kushumisha matengo.