Milimo 14 - Libuka Lya Kuyela

Paulu na Mbanambashi mu Ikoniyamu

¹ Haya mu Ikoniyamu Paulu na Mbanambashi benginine mu shinangonge, bashimikilile lizu na kukanca, pe bantu babengi shikuma ku Bayunda na ku Bakamatunga bengile bakakukulupila.

² Ngoboni baya Bayunda bakanine kwitabila, bahongele Bakamatunga na kuvulanganya mitima yabo ngayi balwishe baya bengile bakakukulupila.

³ Niho Paulu na Mbanambashi bekalile shikati shashitali, hibashimikila na kukanca bya Mwene ou wabapanine wupaki ku lizu lya nceshe zendi na kubapana ngovu ngayi batende bimonekesho na bikomokesho.

⁴ Ngoboni bantu ba mu munzi balitapile hakati, bamo ba kundamine ku Bayunda, bamina ba kundamine ku bantumwana.

⁵ Niho Bakamatunga na Bayunda hamo na bakakutwaminina bekalile na bihanganiko bya kuyandisha bantumwana na kubapuha mamanya.

⁶ Oho bantumwana balimukile, batininine ku Lishitila na Ndeliba, minzi ya mu Likaoniya na ku litunga lya hahepi nayo.

⁷ Kuyo niko bashimikililenga ncango zaziwahe.

Paulu na Mbanambashi mu Lishitila na Ndeliba

⁸ Haya mu Lishitila mwekalile muntu wekalile na mawulu akunyata, kaliha wendelenga, wengile shihole kufuma kukuhemuwa kwendi.

⁹ Wayuvwilenga mazu ambilenga Paulu. Pe Paulu wamuconcomekele, wamonene ngayi unakulupili, kami ukutwesha kunyongomanishiwa,

¹⁰ Niho ambile na lizu lyalinene ngayi, “Yimana nkonke na mawulu wobe!” Uya muntu wakilukile, pe watatikile kwenda.

¹¹ Oho bantu bamonene ebye atendele Paulu, babilikizile mu lulimi lwabo lwa Shilikoniya ngayi, “Banyambi banahuluku, banezi kukwetu mu shifwekesha sha bantu!”

¹² Batumbile Mbanambashi ngayi Zeushi, pe Paulu bamutumbile ngayi Hemeshi ndaba wengile mukakushimikila wamunene.

¹³ Niho mukankombela wa nyambi Zeushi, uya nyambi bazikilile litala ha munkanda wa munzi, waletele bankunzi na maluba ku bipana bya munzi ndaba mukankombela hamo na bantu, bashingile kukombelela nkombela ku bantumwana.

¹⁴ Ngoboni oho bantumwana ba Mbanambashi na Paulu bayuvwile noho, batabwile bivwalo byabo, niho betukilile mukati ka bantu na kubilikiza ngayi,

¹⁵ “Enu bantu, kati ndabangani mukutenda ebye? Etu kami tuli bantu ngonehe enu, tukumishimikila ncango zaziwahe ngayi mutengulukile kuli Nyambi wakuyoya, ou walengele liyilu na hanci na liwate na biya bilimo nimwabyo ngayi mufume ku byuma ebye byowa.

¹⁶ Kushikale, walehele bantu nimwabo ngayi bendenga mu biheka byabo.

¹⁷ Ngoboni walipakile niye mwine ngayi niko ekala ndaba ya byuma byabiwahe atendanga. Wamipananga mvula wakufuma muyilu na mbuto ha bikati byabiwahe. Wamipananga byakulya na kuwahililisha mitima yenu.”

¹⁸ Hinge na mazu awa, bantumwana kaliha batweshele kukanisha bantu ngayi hinga bakombelela kukwabo.

¹⁹ Niho kwezile Bayunda bafumine ku Antiyoke mu Pishindiya na ku Ikoniyamu, bakandamikile bantu, pe bapuhile Paulu mamanya, niho bamukokelele ha munkanda wa munzi, bahanganikile ngayi unafu.

²⁰ Ngoboni oho bandongesha bakungulukile na kumuzinguluka, wapindukile, pe wenginine mu munzi. Oho kwashile, wayile na Mbanambashi ku Ndeliba.

Paulu na Mbanambashi ba kuboka ku Antiyoke mu Shiliya

²¹ Paulu na Mbanambashi bashimikilile ncango zaziwahe mu Ndeliba, pe bawanine bandongesha babengi. Niho babokele kami ku Lishitila na ku Ikoniyamu na ku Antiyoke mu Pishindiya.

²² Bashumishile bandongesha na ku bakowamina ngayi bazamine mu kukulupila, babatongwezele ngayi, “Tuku fwanina ku mona makando amengi ngayi twingine mu Wene wa Nyambi.”

²³ Paulu na Mbanambashi bahatile bakulwane mu matengo nimwawo. Pe ha kulombela na kuzila kulya, babayakile kuli Mwene ou ba kulupililile.

²⁴ Oho bapitile mu Pishindiya, bezile ku Pamfwiliya.

²⁵ Oho bamanishile ku shimikila lizu mu Pelinga, bayile ku Ataliya.

²⁶ Kufuma kuyo benginine mu wato niho bavuwile, pe babokele ku Antiyoke, kuyo baba kundikile ku nceshe za Nyambi ha kutatika mulimo ou banamanishi.

²⁷ Oho bakumine ku Antiyoke, ba kungwile bakalitengo hamo, babatontwelele ebye nimwabyo Nyambi atendele mumwabo na neshe ashinkwilile shipana ku Bakamatunga sha kukulupila.

²⁸ Bekalile matena amengi kuyo hamo na bandongesha.