Milimo 10 - Libuka Lya Kuyela

Pita na Koniliyashi

¹ Kwekalile muntu umo mu Sheshaliya watumbiwile ngayi Koniliyashi, wengile mukulwane wa banzita ba Baloma baya batumbiwile ngayi “Banzita ba ku Itali.”

² Wengile muntu wakushinga bya Wunyambi. Pe niye hamo na baka litala lyendi nimwabo bengile bakakuyuvwila Nyambi bowa, kami wapaninenga bishemo bya kuyavwa ku Bayunda ba kushepwa, pe walombelelenga kuli Nyambi shikati nimwasho.

³ Ha mutena wamina oho shikati shashingile kukuma ku sha wulikumi na mutanu, wamonene shimono, wamonene lingeloyi lya Nyambi heza kukwendi, wambile ngayi, “Obe Koniliyashi!”

⁴ Koniliyashi wapenzele kukwendi na bowa, pe wambile ngayi, “Kati bishini Hekulu?” Lingeloyi lya kumbwile ngayi, “Nyambi unawahilili na malombelo wobe na milimo yobe yayiwahe, haya uli na kukukumbula.

⁵ Tuma bantu ku Yopa na kwihana umo wa lizina lya Shimoni, ou watumbiwa ngayi Pita.

⁶ Watulila ku litala lya Shimoni mukakunyuka bitembe, liya lyazikiwa ku nkumo ya liwate.”

⁷ Oho uya lingeloyi ambile nendi ayile, Koniliyashi wehanine bakamilimo bendi babili mu litala na umo wa banzita ou wengile mukakushinga bya Wunyambi ku baya batendelenga milimo yendi shikati nimwasho.

⁸ Wabatongwezele nimwabyo byatendiwile, niho abatumine ku Yopa.

⁹ Oho kwashile, kuwana bashili ha mukala bali na kuhenyena kwakwipi na Yopa, Pita wayile hayilu ya litala na kulombela, ku shikati sha mwaana.

¹⁰ Wekalile na nzala kami washingilenga byakulya, pe oho bamuwahishililenga byakulya, wekalile na shimono.

¹¹ Wamonene liyilu linashinkuluku, pe shuma sha kufweka ngo likwiza lyalinene, shanyenzumukilililenga hanci hinga shamangiwa ku zinkomi zasho zinaa.

¹² Mwekalile mishobo nimwayo ya tuyamana na biya nimwabyo byalikokanga bya hano hanci na tuyoni twa mu mbimbayilu.

¹³ Lizu lyambile kukwendi ngayi, “Pita, katuka uzihe, ulye!”

¹⁴ Ngoboni Pita wambile ngayi, “Byo Mwene! Ndaba hinga natanga shilolo nilye shuma shimo sha mazilo hinge sha kubula kuyela.”

¹⁵ Lizu lyambile kami kukwendi ngayi, “Eshe anayeleshe Nyambi, hinga ushitoya ngayi sha mazilo.”

¹⁶ Shiya shuma shamonekele bikati bihatu, niho shatwaliwile kuyilu.

¹⁷ Oho Pita alikomokelele ngayi shimono eshe amonene shikutontoloka nahiti, bantu baya atumine Koniliyashi, oho bawanakale litala lya Shimoni, kami bemanine ku shipana.

¹⁸ Pe behanine na kwipula ngayi, “Muli na muyeni kuno wa lizina lya Shimoni Pita ndi?”

¹⁹ Oho Pita ekalile na kuhanganika ha shimono shiyo, niho Moyo wambile kukwendi ngayi, “Kuli bantu bahatu, ba kukushinga.

²⁰ Katuka kami huluka uye nabo, hinga ushintazala, ndaba ami ninabatumu.”

²¹ Niho Pita ayile ku bantu baya batumiwile kukwendi, pe wambile ngayi, “Ami uno, uya mukushinga. Haya munezili Byumangani?”

²² Bambile ngayi, “Koniliyashi mukulwane wa banzita niya unatutumu. Wenga muntu wakwoloka, kami mukakuyuvwila Nyambi bowa, wampupo yayiwahe mu litunga lya Bayunda nimwamo. Lingeloyi lya kuyela lyamutongweza ngayi akwihane, uye ku litala lyendi, ngayi ayuvwe ebye ukamba.”

²³ Niho Pita abengizile mu litala, pe balanganine kuyo. Oho kwashile, Pita wayile nabo na bamo bakakukulupila ba ku Yopa bayile nendi.

²⁴ Pe oho kwashile, Pita wakumine mu Sheshaliya. Koniliyashi wabatatilililenga, kami wehanine bawushinda wendi na bahoni bendi hamo.

²⁵ Pita oho enginine, Koniliyashi wamushimbawilile, pe wawile ku mawulu wendi, wamulemeshele.

²⁶ Ngoboni Pita wamwimikile, pe wambile ngayi, “Yimana na nami nili muntu tuhu.”

²⁷ Pita wenginine nendi mu litala hibaya na kwambola, wawanine bantu babengi banakunguluku.

²⁸ Pita wambile kukwabo ngayi, “Mukulimuka enu bamwine ngayi ndayano zetu kwitabilisha Kayunda kuliwanika na Mukamatunga hinge kumuzingula zifwako. Ngoboni Nyambi unamoneshe ngayi kaliha ninafwanini kutoya muntu umo ngayi wa mazilo hinge ngayi wakubula kuyela.

²⁹ Nohobene oho munantumini bantu, ninezi kukwenu na kubula kukanangana. Haya munanyihanini bishini?”

³⁰ Koniliyashi wambile ngayi, “Matena anaa akunyima nekala na kulombela mu litala lyami ngo ku shikati shino, shikati sha wulikumi na mutanu ku mazolo, pe namona muntu unemana kumbili yami navwala bya kubyazima,

³¹ wambile ngayi, ‘Obe Koniliyashi Nyambi nayuvwu malombelo wobe kami unanuku milimo yobe yayiwahe.

³² Nohobene tuma muntu ku Yopa, akehane Shimoni Pita, uli mu litala lya Shimoni mukakunyuka bitembe ou wazika ku nkumo ya liwate.’

³³ Niho nanyankupisha kukutumina bantu, kami unawahishi aha unezi. Haya tuli kuno ku meho a Nyambi, ngayi tuyuvwilile nimwabyo ebye anakutongweze Mwene.”

Mazu a Pita

³⁴ Niho Pita atatikile kwamba ngayi, “Mwa shikuma namono ngayi Nyambi kaliha wekala na shihota.

³⁵ Ngoboni ku matunga nimwawo, ou ukumuyuvwila bowa na kutenda byakwoloka, ukumutambula.

³⁶ Mukulimuka lizu elye atumine Nyambi ku bantu ba Ishalela, ku shimikila ncango zaziwahe za kuleta ku mwena kupitila muli Yeshu Kilishitu ou Mwene wa nimwabo.

³⁷ Mukulimuka byatendiwile mu Yundeya nimwamo, kutatika mu Ngalileya, munyima ya ku shimikila kwa Yowano ha bya kuzubilisha.

³⁸ Mukulimuka Nyambi eshe ayitilile Moyo wa Kuyela na ngovu hali Yeshu waku Nazaleta na neshe endelenga na kutenda byabiwahe na kunyongomanisha baya nimwabo bekalile ku ngovu za Shatana, ndaba Nyambi wekalilenga nendi.

³⁹ Tuli bapaki ba byuma ebye atendele mu litunga lya ba Yunda na mu Yelushalema. Bamuzihile, pe bamukolekele ha shishempakano.

⁴⁰ Ngoboni Nyambi wamushangwile munyima ya matena ahatu, pe wamuholwele ngayi bamumone.

⁴¹ Kaliha bamumonene bantu nimwabo, ngoboni ndele bapaki baya bahatiwile kuli Nyambi, etu twalile na kunwa nendi oho washangukakale ku bafu.

⁴² Watulayile ngayi tushimikile bantu na kumupaka ngayi niye uya Nyambi ahatile, ngayi enge mukakuyata babomi na bafu.

⁴³ Miluwe nimwabo bamupakile, ngayi ou nimwendi ukukulupila mumwendi, wubi wendi bakawuyatila kupitila mu lizina lyendi lya ngovu.”

Bakamatunga ba kutambula Moyo wa Kuyela

⁴⁴ Shikati shiya Pita ambilenga awa mazu, Moyo wa Kuyela wezile hahabo baya nimwabo bayuvwilenga lizu.

⁴⁵ Pe Bayunda bakakukulupila baya bezile na Pita kufuma ku Yopa, bakomokele ndaba Nyambi kami wayitilile shishemo sha Moyo wa Kuyela ha Bakamatunga.

⁴⁶ Ndaba babayuvwile hibamba mu zindimi, kami balemeshele Nyambi. Niho Pita ambile ngayi,

⁴⁷ “Kati yani ukutwesha kukanisha aba bantu ngayi hinga bazubilishiwa na mema? Banatambulu Moyo wa Kuyela ngonehe tunawutambulu etu.”

⁴⁸ Wabatongwezele ngayi bazubilishiwe mu lizina lya Yeshu Kilishitu. Niho bamunyepele ngayi ekale nabo matena amashe.