Mika 5 - Libuka Lya Kuyela

¹ Enu Bantu ba Yelushalema, kungululenu bakanzita benu. Bamalamo betu banatuzinguluku na kutu kandamika kulwisha kalela wa Ishalela.

Nyambi ukukulupisha Kalela ukafuma ku Mbetelehema

² Obe Mbetelehema Efulata, hinge ndi uli wamushe mukati ka mavumo a Yunda. Mumwobe kukafuma umo ou ukenga kalela ha Ishalela. Ou watatikile kwikalako ku matena akunyima shikuma.

³ Nyambi ya Ngula ukalehela Ishalela ku bamalamo bendi hantu shikati shiya oho ou mbuyama ukushinga kubeleka nabeleke. Niho Baishalela bekalile mu wuntapwa bakaboka ku bawushinda wabo.

⁴ Oho uya kalela akeza, ukalela bantu bendi ngonehe litanga lya bambelele mu nyala namu maleema a lizina lya Nyambi ya Ngula, ou Nyambi yendi, ndaba bantu nimwabo hano hanci bakalimuka wunene wendi,

⁵ pe ukaleta ku mwena. Oho Baashiliya bakazinguluka litunga lyetu na ku shiwula twimbi twetu. Tukamwimikila balishani mutanu na babili na babilolo mutanu na bahatu babalume ngayi babalwishe.

Nyambi ya Ngula ukulamwina na kushushula bantu bendi

⁶ Bakalela litunga lya Ashiliya na Nimulondi na mpoko ya mukwale. Bakatulamwina ku Baashiliya, oho bakengina mu litunga lyetu kuzinguluka na kubelamina ku zinginza zetu.

⁷ Niho mashaliza a Ishalela bakekala mukati ka matunga, mukati ka mishobo ya bantu babengi ngo mume wakuli Nyambi ya Ngula, ngo mamata akuwila ha mwila, bantu bakakinka mitima yabo kuli Nyambi ya Ngula kaliha kuli baminabo.

⁸ Kami mashaliza a Ishalela bakekala mukati ka matunga, mukati ka mishobo ya bantu babengi ngonehi shimbwi uli mukati ka tunzama twa mu lishaka, ngonehi mwana shimbwi uli hakati ka litanga lya bambelele, owe ukwinga ngayi, oho akupita hakati kabo ukubalyatangila na ku bashanyona shanyushanyu kami kowa ukatwesha ku balamwina.

⁹ Ishalela ukakatula liboko lyobe na kukoma bakakukulwisha na bamalamo bobe nimwabo bakalobeshiwa.

¹⁰ Nyambi ya Ngula ukwamba ngayi, “Ha mutena uyo, nikashimba bambishi benu mukati kenu, kami nikalobesha na makoloyi wenu,

¹¹ niho nikalobesha minzi ya litunga lyenu na kunyemuna bipata byenu nimwabyo bya ngovu.

¹² Nikalobesha wulozi wenu, kukekala kami na bambuki mufwako.

¹³ Nikalobesha tunankishi twenu na zimpangwa munaziki mukatikenu, pe kukashintama hanci ku milimo ya maboko wenu kami mufwako.

¹⁴ Nikatungula zimpangwa za Ashela mukatikenu na kulobesha minzi yenu.

¹⁵ Nikabweshela wubi ku wubi mu wukali wami na kupilama kwami ha matunga aya abulile kunyombatala.”