Mika 4 - Libuka Lya Kuyela

Nyambi ya Ngula ukalela hano hanci mu ku mwena

¹ Shikenga nehe ha matena akeza kumbili, lipili elye hanemana Litala lya Nyambi ya Ngula, likenga lyalitali kupitakana mapili amina na kutumpuka mukati ka binkanda, pe matunga amengi akakunkula kukwalyo.

² Bantu babengi bakeza na kwamba ngayi, “Yekenu tukankalale ku lipili lya Nyambi ya Ngula, ku Litala lya Nyambi wa Ishalela, ngayi akatulongeshe twafwanina kutenda, mwanga tukende mu zinzila zendi.” Ndaba ndayano zikufuminina mu Ziyoni, na lizu lya Nyambi ya Ngula likafuma mu Yelushalema.

³ Nyambi ya Ngula ukayata byambo mukati ka matunga, na kumanisha nkani za bantu ba mishobo yayingi. Bakafula mikwale yabo kwinga makahu, na milinga yabo bakafulaho zimpoko. Matunga kukalwa na matunga amina afwako, hinge kuliwahishila bya nzita afwako.

⁴ Muntu na muntu ukekala mu ku mwena, mu nceto ya mutondo wendi wa mukuyu namu mikolobozi yendi ya shinyanca. Nisho anamba Nyambi wa Makunge.

⁵ Litunga na litunga likulemesha na kwombatala lizina lya nyambi yabo, ngoboni etu tukwombatala lizina lya Nyambi ya Ngula, niye Nyambi yetu mwaya myaka.

Nyambi ya Ngula ukabwesha bantu ba Ishalela kufuma mu wuntapwa

⁶ Nyambi ya Ngula ukwamba ngayi, “Ha mutena uyo, nika kungula babihole na kuwanika hamo nimwabo bapanzanine na baya namoneshele malwa.

⁷ Babihole na baya bapanzanine nikabafutula matunga akushuma, pe ami Nyambi ya Ngula nikabalela ha Lipili lya Ziyoni mwaya myaka.”

⁸ Obe Yelushalema, uli kapeshi kakumonena matanga, na shinkanda sha bantu bamu Ziyoni, ngovu zobe za mwaka za kulela zikeza kami kukwobe. Ngovu za wene zikaboka ku Yelushalema.

⁹ Haya bishini ukukalokela shikuma na kulila? Haya shumangani ukuyuvwa kukola shikuma ngo mbuyama uli na kushinga kubeleka. Kati wufwendi mwene ndi? Kati mukakukubela unalobo ndi?

¹⁰ Bantu bamu Ziyoni, likondololenu na ku shunga, ngo mbuyama uli na kushinga kubeleka. Wuluno mushiye lukena na kuya mungawungawu, mukaya mu Mbambiloni. Muyo nimo Nyambi ya Ngula akamilamwina na kumifumisha ku liboko lya bamalamo benu.

¹¹ Haya matunga amengi analikungwili hamo ngayi amilwishe. Akwamba ngayi, “Yekenu tulwishe Ziyoni mwanga tulobeshe olu lukena.”

¹² Ngoboni kulimuka bihanganiko bya Nyambi ya Ngula hinge ntendelo yendi bafwako. Ukaba kungwila hamo na ku bashila, ngonehe mpeka banakungwili ha likotwelo.

¹³ Nyambi ya Ngula ukwamba ngayi, “Enu bantu bamu Ziyoni, katukenu mukashushule bamalamo benu. Nikaminga ba ku shuma ngonehe nkunzi wakushuma uli na mashengo a byondo na zimpazi za lubemba. Mukacancola matunga amengi na kufungwila ebye bapukwile kuli Nyambi ya Ngula. Wuheti wabo ukafunguliwila kuli ami Mwene wa hano hanci nimwaho.”