Mika 3 - Libuka Lya Kuyela

Mika ukwambila bantwamina ba baishalela

¹ Niho nambile ngayi, “Yuvwililenu, enu bantwamina ba Ishalela, kati kaliha munafwanina kuyata byambo na kubiketula mu kupwisha ndi?”

² Enu mwazimba byabiwahe na ku haka byabibi, mwayubanga shikonde sha bantu bami na ku sheka nyama ku bifupa byabo.

³ Mwalyanga bantu bami, mwayubanga bikonde byabo na kucancola bifupa byabo na kubaketozola bituntula ngo bakuya mu kuyiteleka mu nyungu.

⁴ Mukabilikiza kuli Nyambi ya Ngula, ngoboni kukamikumbula wufwako, ha shikati shiyo ukaholeka lupala lwendi kukwenu, ndaba munabipishi.

⁵ Nyambi ya Ngula ukwamba ngayi, “Neheboni bya bamiluwe aba ba kushanwisha bantu bami, oho muntu umo nabayumbulu pe hiba kumulubulwila ngayi kuli ku mwena, ngoboni ndi ku bayumbula wufwako, pe ba kumulobela nzita.”

⁶ Nyambi ya Ngula ukwamba ngayi, “Nohobene enu bamiluwe shikati sha wushiku mufwako kukekala na bimono na mincimpwe yikamizilila ya kumi kwangisha kulubulula. Mutena ukalelela ha bamiluwe, pe mutena ukashipila hahabo.”

⁷ Bakabimono na bambuki bakashampuliwa kami bakayeneshiwa, nimwabo bakafwika zimpala zabo, ndaba Nyambi ku ba kumbula wufwako.

⁸ Ngoboni ami Mika, nenzala na ngovu na Moyo wa Nyambi ya Ngula, pe kami nenzala na kuyata shiwahe na kukanca, kwa kutongweza bazukulya Yakobo kuluwa kwabo na bazukulya Ishalela wubi wabo.

⁹ Yuvwililenu enu bantwamina ba Ishalela, enu mu kukana kupwisha. Mukutengamisha kuyata nimwako kwakuwahe.

¹⁰ Mu kuzika lukena lwa Ziyoni niyebene Yelushalema mu nzila yayibi ya kuyita mukeza.

¹¹ Batulela bekalamo ba kuyata na kutambula mazika kanwa. Bakankombela bekalamo ba kulandiwa na mali ngayi balongeshe bantu ebye bikubawahilisha. Bamiluwe bekalamo ba kulandiwa na mali ngayi balubulwile bantu ebye bikubawahilisha. Hinge niho bakukulupila kuli Nyambi ya Ngula bakwamba ngayi, “Kowa malwa akatwalilila ndaba Nyambi ya Ngula uli mukatiketu?”

¹² Nohobene ndaba yanenu, Ziyoni ukalimiwa ngo mfuba, Yelushalema ukafutuka mushiinzi wa mamanya, na lipili lya zikiwa Litala lya Nyambi likafutuka lipumbu lya kuzika.