Mika 2 - Libuka Lya Kuyela

Ncuungu batambulanga bakakuyandisha bancepwe

¹ Makando wabo, baya ba kubalika bya kuluwa na kuyongola byabibi ha shikati sha wushiku ha malili wabo. Oho kunashi lumenemene ba kuwana shikati, sha kutenda byabibi ebye banayongolonga.

² Bakupukula na kushimba byuma bya baminabo, oho bakushinga mafuba ba kuwashimba. Oho bakushinga matala ba kuwashimba. Kowa lupashi hinge wuheti wendi bilishiwahe.

³ Nyambi ya Ngula uli na kwamba ngayi, monenu, na kuyongola kuleta malwa hahenu, kami mufwako kutwesha kukapanza. Mukekala mu makalikiza, kami kukaliyemeza mufwako.

⁴ Oho shiya shikati shakakumina, bantu bakamihengamina na kwimbila lwimbo lwa kuyena ngayi, “Twalobeshiwakale, Nyambi ya Ngula unatuyangulu litunga lyetu, na kupana baya batutwalile mu wuntapwa.”

⁵ Nohobene, shikati shakakuma sha kubweshela litunga ku bantu ba Nyambi ya Ngula, kowa hinge umo kukwenu ukawana shitapilo.

⁶ Bantu ba ku shimikila kukwami bakwamba ngayi, “Hinga utushimikila, hinga utulubulwila bya noho. Etu kukekala na lisheni tufwako.

⁷ Kati obe ukuhanganika ngayi bantu ba Ishalela banakutiwi ndi? Kati Nyambi ya Ngula ukutwesha kutatililila ndi? Kati ukutwesha kutenda byuma bya nehe ndi? Mazu wendi enga amawahe kukwetu bakakutenda byabiwahe.”

⁸ Munafutulukili bantu bami ngonehe bamalamo. Bantu bami oho ba kuboka kufuma ku nzita, bakuhanganika bali mu ku mwena, mu kutatilila ngayi mubapukule bivwalo byabo.

⁹ Munatanda bakaza bantu bami mu matala abo amawahe, na kufumisha mfuywezi zami ku banababo mwaya myaka.

¹⁰ Katukenu, muye. Kuno hikowa mwanya waku kwangulukila, ndaba wubi wenu unaleteshe ngayi lino litunga lilobeshiwe.

¹¹ Enu mukushinga bamiluwe bali na mazu akwongeza na kwamba ngayi, “Nikulubulula kukwenu bya kuvula kwa waine na malovu.”

¹² “Enu mashaliza a Ishalela, nikamiwanika hamo ngonehe bambelele ba kuboka ku mutanga. Litunga lyenu likekala na bantu babengi, ngonehe mabuyishilo anenzala na bambelele.”

¹³ Nyambi ukabashinkwilila nzila na kubafumisha mu wulungo. Bakashoboloka na kututikila mumapangati. Nyambi ya Ngula, mwene yabo, niye ukenda kumbili ku batwaminina.