Mateo 6 - Libuka Lya Kuyela

Bilongesha bya ha shishemo

¹ “Keyenu ngayi mubule kutenda milimo yenu ya kwoloka ku meho a bantu, ngayi mwanga bamimone. Ndi mukwinga noho kukatambula ncuungu kuli Tatiyenu wa muyilu mufwako.

² “Nohobene ndi ukupana shuma ku wakuyanda, hinga umonesha, ngonehe batendanga bakashishweka mu mashinangonge na mu zimbanza ngayi bayemeziwe ku bantu. Mwa shikuma nikumitongweza ngayi batambulakale ncuungu yabo.

³ Ngoboni ndi ukuyavwa wakuyanda, liboko lyobe lya shimoho hinga lilimuka eshe likutenda liboko lya shilyo,

⁴ ngayi shishemo shinge sha kulimba, pe obe Tatiyobe ou uku mona bya kulimba ukakupana ncuungu.

Bilongesha bya ha malombelo

⁵ “Oho mu kulombela, hinga mufweka ngonehe bakashishweka, ndaba bahaka kwimana na kulombela mu mashinangonge na mu zimbanza, ngayi mwanga bantu babamone. Mwa shikuma nikumitongweza ngayi batambulakale ncuungu yabo.

⁶ Ngoboni oho ndi ukulombela, ingina ku kampenci kobe, kami Tatiyobe ou wamonanga bya kuwi, ukakupana ncuungu yobe.

⁷ “Oho mu kulombela, hinga mufweka ngonehe batendanga bakamatunga, ndaba nibo bahanganikanga ngayi bakayuvwiwa ndaba ya mazu abo amengi.

⁸ Ngoboni hinga mubahembwiliza, ndaba Tatiyenu ukulimuka ebye mukushinga shilolo mumulombe.

⁹ Haya lombelenu nehi ngayi, ‘Tatiyetu uli muyilu, lizina lyobe lilemeshiwe.

¹⁰ Wene wobe wize, shifungo shobe shitendiwe hano hanci, ngonehe shatendiwa muyilu.

¹¹ Tupanike lelo byakulya watupanikanga ha mutena ha mutena.

¹² Tuyatile milandu yetu, ngonehe etu twayatilanga bakakutubipishila.

¹³ Hinga utwingiza mu byezeko, ngoboni utulamwine ku mukawubi.’ Ndaba wene wenga wobe na ngovu na wuwahe, myaka nimwayo. Ameni.

¹⁴ “Ndaba ndi mu kuyatila bantu milandu yabo, Tatiyenu wa muyilu kami ukamiyatila.

¹⁵ Ngoboni ndi mu kubula kuyatila bantu milandu yabo, Tatiyenu kukamiyatila milandu yenu wufwako.

Bilongesha bya kuzila kulya

¹⁶ “Pe oho mu kuzila kulya, hinga mwinga ba kuhomba ngonehe bakashishweka, ndaba ba kukanyanyana ku zimpala zabo ngayi bantu balimuke ngayi banazili kulya. Mwa shikuma nikumitongweza ngayi batambulakale ncuungu yabo.

¹⁷ Ngoboni oho ukuzila kulya, uliwabe mazi ku mutwe wobe, pe uyowele ku lupala lwobe.

¹⁸ Ngayi bantu hinga balimuka ngayi unazili kulya, ngoboni ulimukiwe tuhu kuli Tatiyobe, ou wakubula ku moneka. Kami Tatiyobe ou wamonanga bya kuwi, ukakupana ncuungu yobe.

Wuheti wa muyilu

¹⁹ “Hinga mulikongela wuheti hano hanci, haya hali tunzembule na ndala bikuwulobesha, kami bezi ba kutubula na kuyiba.

²⁰ Ngoboni likongelenu wuheti muyilu, oku kwabula tunzembule na ndala bikutwesha kuwu lobesha, kami bezi kutwesha kutubula na kuyiba bafwako.

²¹ Ndaba oku kuli wuheti wobe na mutima wobe kami niko uli.

Lumuni lwa lutu

²² “Liho nilyo lyenga lambi ya lutu. Nohobene liho lyobe ndi liku mona shiwahe na lutu lwobe nimwalwo lukekala na lumuni.

²³ Ngoboni ndi liho lyobe kaliha lilishiwahe, lutu lwobe nimwalwo lukekala mu mincimpwe. Ndi lumuni luli mumwobe lunengi mincimpwe, pe mincimpwe yikenga yayinene shikuma!

Nyambi na wuheti

²⁴ “Kowa muntu ukutwesha kwinga mukamulimo wa bahekulyendi babili. Ndaba ukazimba umo na ku haka wamina, hinge hamina ukenga wakulunga ku umo na kulimbulula wamina. Kutwesha kutendela milimo Nyambi na wuheti mufwako.

²⁵ “Nohobene nikumitongweza ngayi, hinga mulikekula ndaba ya wumi wenu ngayi, mukalya bishini, hinge ngayi mukanwa bishini, hinge ha lutu lwenu ngayi mukavwala bishini. Kati wumi kupitakana bivwalo na lutu kupitakana byakulya bifwako ndi?

²⁶ Monenu ku tuyoni twa muyilu, ndaba kukuna, hinge kuteza tufwako, kami kulonga mu bishete tufwako, ngoboni Tatiyenu wa muyilu watulishanga. Kati enu kaliha munapitakana shikuma tuyoni ndi?

²⁷ Kati yani hakati kenu ha kulikekula ukutwesha kutalihisha ku mwimo wendi na utali wakulingana nkokola yendi?

²⁸ “Ndaba ngani mu kulikekula ndaba ya bivwalo? Monenu ntemo za mu lishaka eshe za kulanga. Kutenda milimo zifwako, hinge kulitendela bivwalo zifwako.

²⁹ Ngoboni nikumitongweza ngayi, hinge Mwene Sholomoni na wuheti wendi nimwawo, kaliha wekalile na bivwalo byabiwahe shikuma bya kufwanikiza na yimo yaneze ntemo.

³⁰ Haya ndi Nyambi ukuvwika nahiyo mwila wa mu lishaka, owe uliko lelo, pe nzona hiukuyumbiwila mu liziko, kati ukabula kumivwalika byabingi ndi? Enu bakakukulupila kwakushe!

³¹ “Nohobene hinga mulikekula ngayi, ‘Tukalya bishini?’ Hinge ‘Tukanwa bishini?’ Hinge ‘Tukavwala bishini?’

³² Ndaba ebye nimwabyo ba kubishinga bakamatunga, pe Tatiyenu wa muyilu ukulimuka ngayi mu ku fwanina kwikala na byuma ebye nimwabyo.

³³ Ngoboni ha kutatika shingenu Wene wa Nyambi na kulunga kwendi, pe byuma ebye nimwabyo ukamipanabyo.

³⁴ Nohobene hinga mulikekula habya nzona, ndaba mutena wa nzona ukalimonena byuma byawo. Lehenu mutena ulimonene binawufwanini.